عمري 40 وأتعرض للتنمر !!

عمري 40 وأتعرض للتنمر !!

السلام عليكم

أتمنى تعرضون مشكلتي

عندي مشكلة وماني فاهمها بالضبط

بداية انا رجل عمري 40 سنة عندي ماجستير في الإقتصاد من الولايات المتحدة
أعزب ، أسكن لوحدي وأحب دايم أكون لوحدي ومرتاح لوحدي
حالي حال نفسي مسالم
الحمد لله أموري الدنيوية تمام وأتمنى تزين آخرتي
عندي مشكلة ماني قادر أفهمها
كيف رجل كبير في السن مثلي يتعرض للتنمر بدون أي سبب ؟
نعم ، بدون سبب
من ناس ما أعرفهم يتنمرون عليّ ويضحكون عليّ بدون سبب
المواقف اللي كان علي كتييييير
بس راح أذكر 4 مواقف فقط

الموقف الأول ::
كنت مرة أمارس رياضة المشي في ممشى مشهور في الرياض
تعرض لي شابين ويمشون في مسار معاكس وواحد منهم صدم بكتفي متعمد
التفت عليه بس كمّل مشي وهو يضحك
كملت مشي ، وفي اللفة الثانية صدم في كتفي مرة ثانية
تجاهلني وهو يضحك ، وهنا لحقته وصرخت عليه واتجمعوا الناس وانتهاء الموضوع.


الموقف الثاني ::
كنت في أحد معارض الالكترونيات الكبيرة لوحدي
قضيت وقت لاباس به في المعرض اتنقل بين اقسامه يعني اخذت اكثر من لفه
كيف فيه موظفين بنت وولد اعمارهم
كانوا يناظرون في ويضحكون ضحكة مكبوته
وفي آخر مرة مريت على قسمهم سمعت الموظفة وهي تقول لزميلها بصوت خافت
( شفه جا )
وبعدها انفجروا بالضحك حرفيآ ، والناس التفتوا عليّ
لدرجة ان مدير القسم كان قريب جاا سألني وش فيه ؟
قلت له موظفينكم يعتبرون الزباين نكت يضحكون عليهم
راح لهم سحبهم للمكتب شكله وبخهم .


الموقف الثالث ::
دخلت أحد الكافيهات بعد تعب يوم في العمل
حبيت أرتاح شوي
جلست على طاول كان آخر طاولة لاصقه بالجدار
بعدها بشوي ،
جلست خلفي عائلة امرأتين ومعهم ولدين صغار
سمعت وحده منهم تقول للثانيه ( شفي ذا قاعد لحاله )
طبعآ طنشت ولا التفت لها
بعد شوي ، يجي ولد وحده منهم عمره تقربا ٣ سنوات يضربني ويهرب
وامهم وصاحبتها يضحكون
تكرر الموضوع مرتين
بعدها التفت عليهم الا اشوف وحده منهم تصور بالجوال
تصور انجازات ولدها وهو يضرب رجل في سن أبوه !
اول ما التفت عليهم خبت الجوال وتغير وجهها
قمت قلت لها ليه تصورين؟
قالت انت تتوهم ، قلت لها وريني جوالك رفضت
ارتفع الصوت وجا صاحب الكافيه و قال خلني اشوف الكاميرات
وفعلا ، طلعت تصور ولدها وهو يتنمر على رجل كبير في السن
قلت لها لو انتشر المقطع راح ارفع عليك قضية والدليل في الكاميرات
وصاحب الكافيه طردها وهي تبكي .


الموقف الرابع ::

دخلت مطعم عشان اطلب
وكانو فيه قبلي شابين في نهاية العشرينات
يعني مش مراهقين أو أطفال
وكانت نظراتهم غريبة لي وكأني عدوهم
المهم ، هم نزلوا قبلي وكانت سيارتهم واقفه قدام المطعم
خلصت طلبي وانا رايح لسيارتي لأنها كانت بعيده شوي عن المطعم
وانا ماشي على الرصيف مروا بجنبي بسيارتهم واحد منهم فتح قزاز السيارة
ورمى عليّ علية كولا قزاز فاضيه !!!
طيب ليش ؟
الى اليوم ماني فاهم السبب !


والمواقف غيرها كثير
بصراحة انا مدري وش السبب
هل هو شكلي ؟
هل لأني قصير القامة؟ (طولي 169 سم )
هل لأني أكون لوحدي، وهذا شي يدعوا للتنمر والعدوانية ؟
جلست في أمريكا 4 سنوات ولا تعرضت لأي موقف مسيء
والحمد لله علاقاتي مع زملائي في العمل طيبه ، وعندي صداقات محدودة جدآ
محدثكم شخص بكامل قواه العقليه والعلمية والحمدلله، يعني لا أتوهم أو اتخيل كلها مواقف حقيقية غير مفهومه المغزى أو السبب .
حاولت أجد المشكلة فيني لكن لم أجد .

أتمنى أقرأ أرائكم ووجهت نظركم حيال موضوعي
لأني فعلآ بدأت أضيق من المجتمع اللي أنا عايش فيه

شاكر لكم وقتكم الثمين للقراءة والرد.

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

ulvd 40 ,Hjuvq ggjklv !!

المصدر...