ايــــــه ده انتى لســــــــة متخطبتيش !!!!

السلام عليكم ورحمة الله وبركاته


كيف حالكن يا غاليات

النهارده عايزين نتكلم بصراحة شوية يابنات
هنتكلم فى موضوع شاغل بال الكتيييير....

السؤال ده اكيد كتير مننا سـمعه
ايه ده هو انتى لسة متخـطبتيش ..!!

واللى تقولك

ايه يابنتى مفيش جديد ولا ايه عايزين نفرح بيكى بقى..!!

وكأنها هي اللي بتنـزل تجيب العرسان وتلمهم من الشارع!
أوأنها لما هتقولها كده هتشحن همتها
عشان تدور على الزوج ده بنفسها

واللى تقولك يابنتى انزلى ورى نفسك للناس عشان يشوفوكى
و يجيلك العريس انتى كده طول منتى قاعده فى القمقم ده مش هتتجوزى
والمصيبة الاكبر بقى لو كانت لابسة نقاب تقوم الدنيا ومتقعدش
كل لما واحدة صحبتها تتخطب يقولولها منتى اللى عملتى فى نفسك كده لابسالى البتاع ده مين هيشوفك
ابقى قابلينى لو حد لف على وشك

ولا لو اخت راحت فرح صحبتها وحد قابلها هناك
تبدأ الحرب عليها ولا حول ولا قوة الا بالله العلى العظيم

يقولولها ياحبيـبتى انتى لسة متخطبتيش....؟ معلشى

واللى يقولها طب متخطبتيش لحد دلوقتى ليه يابنتى
هتفضلى قاعده لإمتى ..؟
دول اللى قدك واللى اصغر منك اتجوزوا وانتى لسة قاعده

وطبعا الاخت تروّح بيتها تفضل تفكر فى الموضوع ويشغل كل تفكيرها وحتى يشغلها عن الامور الاهم فى حياتها
اللى هيا مخلوقة عشانها

والموضوع ده طبعا خطير جدااااااا وهو اللى بيخليكى تبعدى عن ربنا وتضيعى كتير من الطاعات منك
وازاى يا اختى الغاليه تنسى ان الزواج ده رزق من الله ووقت ما يكون مكتوبلك تتزوجى هتتزوجى ..فى اليوم كذا فى الساعة كذا مبيكونش فى اى تأخير
وشوفى
حين سُئل الحسن البصرى -رحمه الله- عن سر زهده فأجاب
علــمــت إن رزقـــيّ لـن يأخــذه غيــري فأطمئــن قلبــي


وبعدين سبحان الله يا ستـى ميهمكيش كلام الناس
لان الناس عمرها مهترضى عنك اتجوزتى متجوزتيش هيفضلوا يتكلموا سدأينى

ياحبيبة قلبى اتركـى كل شئ لمالك الملك الذى بيده كل شئ
ما عليكى الا الدعاء بأن يرزقك الزوج الصالح
وبإذن الله ستجدى الخير كله

وبعدين تعالى معايا وشوفى النماذج دى

يمكن أنا عاشرت حواليا قصص ناس كتير في الزواج وسبحان الله الرزاق.. كل واحدة خدت رزقها في وقتها

أعرف اللي اتخطبت وهي لسه في الجامعة لأول مرة وفسخت واتخطبت كذا مرة وتفسخ وترتبط واتقدم لها ناس كتير
وفي الآخر اتجوزت بعد ما اتخرجت بكذا سنة

وأعرف اللي كان أول واحد يتقدم لها في حياتها كلها .. كان بعد التخرج بسنيـــــن

وأعرف واحدة كان عندها 18 سنة واتخطبت أهو في السن ده.. وسبحان الله ربنا يعافينا سقطت من البلكونة وماتت ..
ربنا يرحمها يارب

وأعرف شلة .. اللي يقال عنهم أقلهم جمالا هم اللي اتجوزوا الأول وأنجبوا كمان
واللي كانوا أجمل منهم .. منهم اللي اتجوزت ومنهم اللي لسه


فسبحان الله .. الرزق جاي في وقته

وربنا أعلم أي مرحلة أصلح لها تتزوج فيها

ممكن واحدة تكون عصبية جدا تتزوج وهي بشخصيتها دي تتطلق بعدها بكام شهر
فسبحان الله فترة الامهال دي تربية لها عشان يحسن خُلقها وتتعلم الصبر .. لأن بعد الزواج مفيش وقت لسه تتعلم وتتخلق
كله تطبيق تطبيق


واللي مكنتش نضجت بصورة كافية قبل الزواج .. هتتعلم بعد الزواج
بس هتتشوى على الجنبين زي ما بيقولوا
يعني هتتربى برضو بس على جمر الحياة وصعوباتها

مسألة السن دي ماتشغليش بالك بيها عشان ما تتعبيش نفسك وتنكدى على حياتك بدون داعي

الخلاصة أننا خلقنا فقط للعبادة

قال الله تعالى :" وَمَا خَلَقْتُ الْجِنَّ وَالإِنسَ إِلاَّ لِيَعْبُدُونِ * مَا أُرِيدُ مِنْهُم مِن رِّزْقٍ وَمَا أُرِيدُ أَن يُطْعِمُونِ " (سورةَ الذاريات)
فالبنت أو المرأة هي في حال عبادة
سواء تزوجت او لم تتزوج

فالأفضل ليكى ياغالية تتركى التفكير فى هذا الامر ولا تضيعى وقتك واشرعى فى تعلم العلم الشرعى ده اللى هيفيدك

الجواز جاى جااااااااى
دلوقتى ..بعد سنه..بعد سنتين..تلاته.. هتتجوزى ....
بس اللى متعرفهوش انك اول ما هتتجوزى
هتكونى مشغوله جداااااا خاصة اذا انجبتى اطفال ...
فالوقت ده ياحبيبتى الغاليه هو افضل وقت لتحصيل العلم والعمل به
والتفرع لعباده الله عزوجل وسدأينى ستأتيكِ الدنيا وهى راغمة

ومش معنى كده ان شاء الله لما تتزوجى تقولى انا مش فاضية وتهملى فى العباده ..... لا طبعا احنا قلنا اننا خلقنا للعباده سواء لسة بنت او تزوجتِ

طيب فى واحدة هتسألنى

اعمــــل ايه الناس كلهم بيقولوا عنى بقيت عانس ؟

يا سبحـان الله محنا قولنا نسيبنا من كلام الناس اللى بيودى لورا ده
ولو اهتميتى بيه هتعملى ايه ...هتخسرى كتيييير...اقولك ليه
لانك هتكونى عايزه ترضيهم فعشان كده اول واحد يتقدملك
هتوافقى على طول والله بقى ملتـزم مش ملتـزم
منتى عايزه ترضى الناس بقى
وبعدها هتكونى خسرتى كل شئ
فمن الافضل انك تسيبك منهم ولا تهتمى بأى كلمة
واعرفى ان وقت ما قدرك هيجى خلاص ....
واعرفى بردو ان ربنا مش هيضرك واكيد مأخر زواجك لخير
وقولى دائماً ( لعلـه خيـر )

واحده تانيه تسألنى
طب مأنا ممكن اتجـوز أى واحد والسـلام وبإذن الله أحاول معاه بعد الزواج يمكن ربنا يهديه؟

مش عايزين نضحك على بعض
اولا الهدايه بيد الله سبحانه وتعالى
ثانيا احنا بنجاهد فى نفس واحده والله المستعان ربنا يعيننا
هنقدر نتحمل نفس تانيه نجاهد فيها

ياحبيبة قلبى انا قلتلك ماعليكى الا الدعـاء والتضرع الى الله
فى اوقات الاجابه وافضل وقت هو وقت نزول الملك جل جلاله
فى الثلث الاخير من الليل ينتظر عباده ليستجيب لهم دعائهم ويغفر لهم ذنوبهم
فإغتنمى هذه الفرصه العظيمـة من
اكرم ملك وهو الله سبحانـه وتعـالى

وخلى هدفك عالى ان يرزقك الله الزوج الصالح المصلح
مش اى زوج

وربنا سبحانه وتعالى هو اكرم ملك وبإذن الله ستجدى الخير كله
معلش طولت عليكوا ياحبيباتى فى الله

بارك الله فيكن ورزقكن جميعا الازواج الصالحين المصلحين الذين يكونون عوناً لكن على طاعة الله عاجلاً وليس آجلاً
ومش عايزين ننسى يا حبيباتى ونذكر بعض
اى اخت تتزوج بإذن الله قُريّب

تنوى بإذن الله هى وزوجهـا لو ربنا ميسر لهم الحال يبقى يتوكلوا على الله ويبدأوا فى المشروع ولو لسه مش متيسر اوى.. بردو مينسوش المشروع بل يبذلوا قصارى جهدهم ويدعو ربنا يوفقهم وييسر لهم انهم ينفذوه

عايزين الكل ينوى النيه دى يابنات

المشروع عبارة عن

انهم يبنوا بيت مكون من ثلاث طوابق

الطابق الاول : معرض لبيع كل ما يحتاجه
المسلم والمسلمه من كتب اسلاميه وزى اسلامى
للاخوه يقيم عليها زوجها واخوه معه
وللاخوات تقيم عليه هى واخوات معها

الطابق الثانى : دار لتحفيظ القرآن

الطابق الثالث : تكون جمعية شرعيه تخدم الايتام والارامل والمساكين والفقراء وكل من يحتاج


على فكره المشروع مش صعب وعايزين كلنا نكون عندنا النيه دى
واحده هتقول انتى عايشه فى الاحلام
على فكره لو قدمتى النية وصدقتى الله ربنا هيصدقك وهيرزقك الزوج اللى يعينك على فعل هذا

***اصـدق الله يصـدقـك***

ربنا يجعلنا من الصادقين المخلَصين المخلِصين الصالحين
اللهم اميـن

نســألكم الدعاء بظهــر الغيب



نستودعكم الله الذى لا تضيع له الودائع

مما اعجبنى

السلام عليكم ورحمة الله وبركاته

حبيبتي .. أم ميار
ما شاء الله .. اختيار ونقل موفق يا الغالية
موضوع قيم وفكره رائعة حبيبتي
وخصوصا ان هذا الموضوع يشغل بال الكثير من بناتنا
وأهم شيء النية الصادقة
نسأل الله أن يرزق بنات وشباب المسلمين الأزواج الصالحين
وأن يصلح أحوال المسلمين لما فية الخير والصلاح
شكرا لطرحك حبيبتي لهذه القضية المهمة

جزاكِ الله خير .. وجعله في ميزان حسناتك
حفظك الله ورعاكِ

غاليتي أم ميار..
اسمحي لي حبيبتي برأي ؟
كنت أتمنى الموضوع يكون باللغة العربية الفصحى
لكي يفهمه الجميع بسهوله
أراه موضوع مهم وغاية في الأهمية
مع شديد احترامي واعتذاري

نعم اختي الغالية
في كثير من الناس هيك
بورت جهودك

بارك الله فيكِ حبيبتى ....
وجزاك الله كل خير