عدم تقبلي لخطيبي ( تعديل العنوان )

عدم تقبلي لخطيبي ( تعديل العنوان )

السلام عليكم
انا ملكت من كم شهر
لما شفت زوجي ما حييت شكله ابد😭
كان عندي خلفيه عن شكله لما وافقت بس لما شفته ع الطبيعهه غير غير
كنت ادري ان شكله مو مرا بس قلت وش ابغى بواحد شكله حلو ومعيشني في نكد
بس مدري وش غير كلامي فجاءه
مدري ايش صار فيني
جلست فترة نفسيتي زفت كنت بس ابكي امي كانت تقول عين وابوي يقول تعبانه نفسيا خلنا نوديها دكتور
كانهم كانو يحاولون يتجاهلون السبب الرئيسي اني ماحبيت الولد ابد يحاولون يقنعوني ويقنعون انفسهم ب اعذار واهيه
المهم انه يبغا يتواصل معي يجيب الهدايا يبغى يتقرب مني
ويحاول في اهلي انه يكلمني قال اخوي ترا زودتيها بعطيه رقمه يمكن الجنية اللي فيك تفك
المهم انه بدا يكلمني
واكتشفت قد ايش انسان طيب وحنون ويدور رضاي
فيه مواصفات يتمنونها كل البنات بس انا مو طبيعيه

المهم ذاك اليوم كلم امي عن موضوع الزواج انه بعد شهرين مدري ايش صار فيني كان انكبت علي موية بارده انهرت وعصبت قالت امي انتي ماتستاهلينه انتي يبغالك رجال يدق خشمك علشان تعرفين ان الله حق
واخوي يقول اعوذ بالله يادلع البنات الرجال سوا كل شي تبينه وانتي خليك معنده لين يكرهك ويدور غيرك
قعدو يضغطون علي انا ماودي اظلمه معي ادري انه يستاهل البنت الاي تحطه في عيونها

انا والله العظيم اني قاعده احاول في نفسي احبه واتقبله
انا لما اكلمه اكون قاعده على اعصابي ماني مرتاحه ابد هو طيب بس انا نفسيه
انا زواجي بعد شهرين وانا ماسويت ولا شي ماني متحمسه ليش
امي تحاول فيني تقولي سوي وسوي وانا لا حياه لمن تنادي
تاخذني معاها السوق بالغصب علشان اقضي ونرجع ويدينا فاضيه
اشوف قد ايش اني اعذب امي
امي مسكينه تحب زوجي تحس مثل عيالها واحس اني خربت عليها فرحتها
ذاك اليوم اسمعها تدعي ان ربي يشرح صدري له ويحببني فيه
صرت حتى انا ادعي زيها لان ماني متخيله اني اكمل حياتي معاه وانا هذا وضعي
انا اللي ابغاه منكم تدعون لي وتنصحوني يمكن القى الرد اللي يحسن وضعي وتفكيري
لا تقولون تطلقي لان لو بيدي ماجيت اشتكي
انا تعبت من احساسي ذا معد صرت اقدر اركز لا في دراسه ولا حياتي احس اني صرت حابسه نفسي في قوقعة اكتئاب طوال الوقت معد انا قادره اخرج منها وافرح مع الناس والعالم
مؤخرا صرت اخذ دواء مهدي واحس اعصابي هدت شوي معاه بس ان برضه مقدر اتخلص من ذا الاحساس
لا اله الا الله
سبحانك اللهم وبحمدك اشهد ان لا اله الا انت استغفرك وأتوب إليك

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

u]l jrfgd go'dfd ( ju]dg hguk,hk )

المصدر...