خالاتي وأبوي والورث ؟؟؟؟
 

السلام عليكم ورحمة الله وبركاته..

مشكلتي بإختصار , أنا لي 5 خوات وأنا الصغرى والحمد لله متزوجات ..طبعا الوالدة متوفاه أكثر من عقد أسكنها الله الفردوس الأعلى
من الجنة وجميع المسلمين , والله يطول لنا بعمر الوالد على الطاعة ....

أنا متعلقة بالوالد من كنت صغيرة متعلقة فيه وبشدة كان من يروح ويطلع كنت دائما معه دائما معه مستحيل افارقه وما كنت أنام إلا بحضنه ( طبعا إلى عمر 7سنوات ) وأنا ماافارقه أبدآ ,
وهو نفس الشئ مايحب مفارقتي أبدآآآ , طبعا الوالدة الله يرحمها كانت موظفة وراتبها أكثر من ممتاز , طبعا صارت ظروف كثيرة وتوفت الوالدة وتزوج الوالد وجاله مايتمنى (أولاد) , وبدت المشاكل من قبل جدتي وخالاتي والسبب ( خذوا جميع ورثكم من ابوكم ) ومن نروح لخالاتي : ترى البيت بيتكم روحوا اشكوا ابوكم , ترى العماير لكم خذوها من أبوكم , ترى ترى ترى
( يعني يبون يحرضونا عليه جدا جدا يكرهونه ) ..

اللي حاصل قبل شهر ونص تقريبا اجتمعوا ( مع اني قللت روحاتي لخالاتي لأني ما أحب أحد يتكلم على ابوي او يضحك عليه لو منهو كان ) طبعا راحوا خواتي الكبار وبعدين قالوا لي
إن خالتي فلانة قالت اشكوه هذا حقكم ولازم يطلع من عينه بكرة الأولاد ياخذون الحلال , طبعا أنا إنقهرت من كلامهااا وكتبت في الواتس أب خاطرة عن أبوي وأرسلته لها
لقيتها كاتبه: عاد زودتيها حبتين في أبوك ترى أبوك إنسان لسانه متبري منه !!!!
أنا بصراحة انفجرت وكتبت لها: من الآخر الله سبحانه وتعالى يقول ( واشكر لي و لوالديك ) , والرسول صلى الله عليه وسلم يقول ( أنت ومالك لأبيك) , وبعدين إنتي على أي أساس
تدخلين في حياتنا من شكى لك الحال وإذا شايفة أبوي لسانه متبري منه , الحين بالأول شوفي لسانك السيء إنتي وبعدين تعالي تفنني في الحكم عن أبوي !!! ومن بعدها حذفتها من كل شئ ولاعاد كلمتها (لأنها زودتها وإحنا دايم ساكتين)

طبعا هذي جميع المشكلة ..
وأنا اللي مضيق خاطري شيئين ( وهو عن أبوي مابي أحد يتكلم فيه ويحضرنا عليه ويقول الورث والورث ) ..
الشيء الثاني( تحسفت على الكلام اللي قلته لخالتي انه لسانها سيء وكذا وضاق خاطري وإذا ذكرت هالموقف أتحسف إني تسرعت بآخر كلامي ووصلت لهالمرحلة في العتاب )

فضفضة مع ملاحظة : أبوي بالأساس تغير كثير قل إهتمامه فيني بالأصل وساعات إذا شافني ماعاد استشعر بفرحته لي زي قبل ويقابلني أحيانا بجفاء ... وأحيانا
كلامه تجريح وقسوة (بس لو أيش هي الظروف ماأرضى فيه ولا أرضى يجي طاريه بشيء يسيء له)

وفقني الله واياكم لما يحبه ويرضاه ..




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]