زوجي هزأني قدام اهله ورحت عند اهلي
 

السلام عليكم ورحمة الله وبركاته
الموضوع ان زوجي مايحترمني واللي مصبرني عليه عيالي عندي 3 ولدين وبنت الله يخليهم
بقولكم شلون يعاملني امس طابخه له الغداء المندي اللي يحبه واحنا عالسفره ناكل راز وجهه بالجوال وياكل المهم قلت له يافلان شوف وولدك ولدي عمره سنه ومعلمته ان اذا كح ولا عطس يحط ايده على انفه او فمه) واهو فيه كحه فكل شوي يكح ويحط ايده على فمه والله بس قلت له شوف قام يصرخ علي ويقول انا ماني فاضيلك ولا فاضيله وصوته عالي حتى اهله سمعوا الصراخ ..
طبعا بعد ماشلت الغداء ونظفت رحت له وقلت له ليش تصرخ علي انت تشوف اني استاهل ردت فعلك هذي قام يصرخ علي مره ثانيه وطلعت عنه وسكرت باب الغرفه عليه
اليوم مثلا سألته سؤال جدا عادي وصار يصرخ واهو طالع قلت لبنتي قولي لابوك ان البيبي ماعنده حليب وقالت له جاء يصرخ علي صراخ يعني فضايح تخيلو الجيران يسمعون يقولي ليش مو انتي اللي تطلبين ليش مطرشه البنت وسبني ولعني وسكت عنه بعدين صار يكلمني وانا اكلمه كلمه ورد غطاها
وقالي لاتقلبين وجهك قلت له انت السبب معاملتك مو زينه كلهااهانات وصراخ ونقد بعدها قلت له بجهز عيالي ووصلني عند اهلي بزورهم وطلعنا على انه بيوديني عند اهلي قالي وش ناقص من اغراض البيت خلينا نروح نتقضى ورحنا بنده شرينا واحنا راكبين السياره قالي افتحي الشنطه بحط الاغراض واهو يحط الاغراض انا ركبت عيالي السياره وولدي الصغير جلسته مع اخوانه المهم واحنا بالطريق ولدي الصغير قام وقف بجزمته على الكرسي حق السياره قام يصرخ ويهزأني انتي ماربيتي عيالك ولو في سيارة اخوك كان ماخليتينهم يسوون كذا انتي وعيالك حثاله!!!!
وخلاص صرت اقوله اتأدب وش حثاله وماربيت ووسخه المهم وصلنا البيت واحنا مالنا مدخل منفصل يعني لازم نمر على اهله واليوم جمعة خواته وانا داخله قام يقولي قدامهم يالله يالله بس بصراخ طبعا ويسوي بايده ذي الحركه اللي كأنه يهش ذبانه طبعا حزت في خاطري وبدل ماكنت داخله طلعت وقلت له بصوت واطي بروح عند اهلي فعلى طول تخيلوا طلع وركض للسياره وقالي يالله بوديك
وولدي مسكين خاف وقام يصيح ويوم وصلنا قالي جيبي المفتاح وماعطيته قلت له لما أخذ اغراضي ساعتها اعطيك المفتاح قالي والا غراض اللي شاريها وين احطها قلت له تبرع فيها
وقلت له اذا تأدبت وعرفت كيف تعامل بنات الناس تعال.
طبعا انا عارفه ماراح يجي لانه ياما سواها في فترة حملي مثلا صرخ علي بمكان عام ورحت لاهلي وضليت عندهم ولا سأل عني ولا عن عياله وفي بداية زواجي كلمه ابوي وخالي بنفس هالموضوع ويتحجج ويطلع مبررات لصراخه علي ..
انا ماكان ودي اجي لاهلي وصابره ومتحمله فوق طاقتي لكن توصل انو قدام اهله يفشلني ويعاملني هالمعامله الزفت كافي الفضايح اللي يسمعونها بعد يشوفوني بهالوضع والله حزت في نفسي اني امر قدامهم وبنفس الوقت حسيت ان مابقى اهانه اتحملها ماتحملتها لين متى وانا بصبر...
انا رسلت بالواتس ان بدل ماتعدل نفسك وتبطل فضايح تروح تكمل قدام اهلك وتعلم اللي مايدري..
ياناس انا تعبت منه ابي حل
اداره نزلوا موضوعي ..




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]