غيرتي من اختي الصغيره ضيعتتها وانا نادمه ؟ ما الحل
 

السلام عليكم ورحمة الله وبركاته

رمضانكم مبارك اخواني وخواتي واسأل الله ان يتقبل منكم صالح الاعمال والدعوات
مشكلتي غيرتي من اختي وراح اشرحه لكم بالتفصيل واطلب منكم حسن الراي والكلمه ارجوكم
فأني والله ظلمت اكثر مما ظلمت

انا كنت اغار من اختي الصغيره تصغرني بخمس سنوات خريجة جامعيه وانا حصلت على المتوسط وتركت الدراسه عمري الان 36وعمرها 29
اجمل مني بشيئ قليل لكن حظها اعظم مني امي وابوي يحبونها اكثر مني ويدلعونها ويطلبون طلباتها وانا بالكاد يسمعون كلمتي
انا ماسكه البيت كله على راسي وهي بس متى ماراقت اشتغلت معاي
تنخطب اكثر مني من اشخاص ممتازين ومناصب ووسامه وانا اذا انخطبت من رجال متزوجين وانذال
الكل يتغزل بجمالها واخلاقها وانا ي دوبك احد يثني على لبسي او صبغة شعري
بس هي كل من شافها تغزل بمالها وملامحها وجسمها مع انها ليست اجمل بكثير لكن حظها


هنا زمام المشكله اختي كانت تنخطب كثييير بس اغلب الخطاب كانت ترفضهم بس قبل 6 سنوات انخطبت من شخص خلوق على كلام اخواني ومن سؤالهم عنه كان يعمل في القطاع العكسري وبنفس الوقت كان رجل اعمال
الكل بارك لها وفرح لها وسوو لها احتفالات وباركوا لها وانا مهمشيني ونظراتهم لي نظرات شفقه واستغراب انو ليش ما خطب الكبيره وهي بعمره اللي هي انا م
ع انها بس خطبة كلام بس شالوها شيل من الارض وانا محد معطيني وجه
ما ادري وش صار فيني رحت السوق واخذت شريحة مجهوله وارسلت رسائل لجوال امي ان الولد خربان وصايع و راعي مشاكل وقلت عنه كلام كثير
وختمت الرساله ب قريبه لفلان وخايفه على بنتكم وانتم ناس طيبين
ومحد عرف مصدر الرساله .. امي صدقت ورفضت بس اخواني كانو مقتنعين بالولد بس امي خافت جدا واصرت على اخواني يرفضون
وماتصدقون قد ايش فرحتي لمن كنسلوا الخطبه .. بس والله مو انا السبب اهلي واقاربي هما السبب بتصرفاتهم معاي

قبل سنه تقريبا وافقت اختي على خاطب اخر من زملاء اخواني كان يعمل محامي وصارت نفس الحركه الكل بارك لها وبجلها وشالوها عن الارض
ووصلوها للسما حتى صاحبات امي لمن يزورونا يعاملونها معاملة سيدة المجتمع وتجلس بنص المجلس ويحترمونها وانا اللي ماسكه اهلي وبيتنا على راسي وخلوقه مع الناس بس اصب لهم القهوه ومكاني اخر المجلس لاني ما انخطبت زي اختي
نفذت نفس الخطه القديمه وارسلت رساله من رقم مجهول على جوال امي بس ما نجحت الخطه هالمره امي ماصدقت بعد ماشافت زوجه خطيب اختي السابق مبسوطه ومعززه ومكرمه
وارسلت الرساله نفسها لجوال اخوي صاحب الخاطب وماصدق لانه يعرف صاحبه

هنا سلمت للامر الواقع واستسلمت ودعيت الله يرزقني باحسن من خطيبها
ملكت وسوو لها حفله كبيره .. وخطيبها صار يعشقها عشق مو طبيعي من الهدايا اللي يجيبها لها
ومن المحادثات اللي بينهم في الواتس اب كت اقراها لمن تنام اختي اخذ جوالها واقرا كلامه لها وابكي من القهر
وكل ما اشوفها دالسه تسولف معاه وتكلمه اموووووووت الف مووته واروح ااتخاصم معاها واعطيها اي شغله علشان تقوم ماتكمل كلام معاه
ما اعرف ايش صار فيني خليتها لمن نامت واخذت رقمه وارسلت له رساله من رقم مجهول اسب فيها اختي وانها وصخه ماتنضف نفسها ولابيتها
واخلاقها شينه وانا ماتحبه وما وافقت عليه الا علشان فلوسه ووضيفته زينه ومنصب ابوه
وان ولها علاقات في تويتر والاستقرام وبعض الالعاب واعطيته حساباتها في واسائل التواصل الاجتماعي
وانقهر منها لانها كانت ترد على بعض التغريدات للرجال وكان يغار عليها غيره مو طبيعيه خصوصا انه كان ينقهر منها انها ماكانت تبدادله كلمات الغزل والحب
لانها تخجل منه وماتعودت عليه واستغليت الكلام هذا ضدها
صارت بينهم خلافات وصارت تزيد يوم عن يوم
وانا استمريت في التواصل معاه طول فتره خطبتهم
بعد شهرين بالظبط طلقها وانفصل عنها اختي تاثرت كثير بعد طلاقها وصارت تبكي من اتفه سبب
وتزعل وتعصب بسرعه وصارت تجلس لوحدها كثير وعبوسه ولاتضحك انا فرحت فرحه عجيبه بطلاقها بس والله العظيم حزنت عليها حزن عظيم بس غصبا عني سويت هالحركه اقسم بالله من ظغوطات العالم اللي حولي وتفرقتهم بيننا
بس صرت اطبطب عليها وادلعها علشان تنسى .. بس بعدها خطيبها صار يحاول يرجع بس اخواني يرفضون لانه اهملها ومن زعله بسيطه طلقها


بعده بحوالي 4 اشهر انخطبت لواحد افضل منه وارسلت لخطيبها الاول انه وافقت على الخاطب الجديد وباعته ب ارخص ثمن
و و و بعدها انقطع خلاص وماعاد يبغى يرجعها

ماقدرت اوصل لرقم الخاطب الجديد بس كنت ادعي الله وابكي ان خطبتها ماتتم والحمد لله ماتمت
ومن بعدها صارت تنخطب لرجال متزوجين او مطلقين وعندهم اطفال وترفض او ماتتم خطبتها

الان انا ندمانه على كل شي سويته ندمااانه اشد الندم ونفسي اصلح اللي سويته
زواجي بعد العيد من رجل متزوج بس طيب جدا بس ماكان اطيب من خطيب اختي السابق
وتعلقت فيه بقدر ماتعلقت اختي بخطيبها جدا وافكر انه لو انفصل عني ماراح اتحمل بعده واستشعرت وحسيييت بشعور اختي الصغيره واجلس ابكي على حالها
ما اعرف كيف استسمح منها وهي اصلا ماتدري عن خططيي وانو انا اللي ورا كل شي علشان كذا ماتدعي وعلى بالها انه نصيب ولا لو تدري كان تذبحني وتستلمني بالدعوات
ساعدوني بطريقه استسمح فيها من اختي واصلح اللي سويته فيها
والله العظيم ماسويته الا من قهر ولا انا مو حسوده ولا اعرف احسد

وجزاكم الله خير




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]