انانيته مضيقه علي حياتي ..
 

السلام عليكم ورحمة الله وبركاته

انا متزوجة من خمس سنين عندي ولدين ..مشكلتي مع زوجي باختصرهاا لكم وابيكم تشورون علي اذا قراري وتفكيري صح او غلط .. زوجي مو من اقاربي يعني بعيد عننا فلما اتزوجنا انصدمت باشياء كثيييير فيه واهلي كمان بالبداية مستغربين من تصرفاته معاي بس متغاضين عشان لا يتدخلون ..اول شي ومن اول شهر لقيت منه قلة احتراام موب طبيعيه يعني ممكن يصرخ علي او ييسبني ويدعي علي علي اتفه الاسباب سواء كنا بروحنا او قدام اهله او بمكان عام قدام الناس كنت وقتها انصدم منه معقولة تطلع منه هالتصرفات وما كنت متوقعه اساسا انه لسي في رجاال من هالنوعية تعودت عند اهلي وكل محارمي عموما ان الرجال يحترم الحرمة مهماا كان ومايعلي صوته حتي اخواني اشوفهم يحترمون زوجاتهم كثييير كنت ازعل واحيان ابكي واتجاهله ويجي يعتذر ويقولي معليش موب قااصد وعاي هالحال ليومنا ذا ماتغير اسلوبه ، ثاني شي هو موظف وراتبه الحمدلله يعتبر كويس وممكن يكفينا وزوود بس حضرته له ستة سنين عنده مشروع صغير من يووم تزوجنا وكل رااتبه واي قرض ياخذه رايح لهالمشروع ابد ماعنده مسؤولية بالصرف علينا يعني يعطيني بالاعياد 500 وخلاص لاعد تطلبين ابد فلوس ..ولاحظو 500 لي انا واولادي سوا مدري تسوي ايش ولا ايش ولما افهمه واحاول معاه انه ما تكفي والمشروع مو كل شي وان شاءالله ربي بيبارك فيه بس بيتك اهم وعيالك اهم والله يصرف عليه بالشهر فوق العشرة الاف مع رواتب العمال واحنا ابد مو في حسبته حتي لما يكون معاه فلوس مستحيل يفكر فينا وايش ناقصنا اهم شي يكفي نفسه ..ماسك بشكل يغبن يخليني انقهر وكل مرة يقولي معليش الحين المشروع مايجيلي منه شي الا لما يكبر يعني اعطيه سنه كمان وهالكلام من يوم ماتزوجنا يعني خمس سنوات .. كل طلعاته وسفراته لازم تكون مع اصحابه عشان ينبسط بس معانا احنا لا بعد مايأست كل محاولاتي معاه قلت خلاص مابحبس نفسي وعيالي عشانك ..اعفيته من الطلعه معانا وصرت اخرج مع تهلي سواء زيارات او سوق او اي طلعه ..الحين له تقريبا سنه مانعني اطلع معاهم نهائيا مسوي علينا احتكاار فظيع والسبب انه مايطيق يجلس بالبيت واحنا مو فيه المشكله انه مايجلس معنا اصلا حتي لما اروح لاهلي حدي الساعه 12 ويقولي يلا حتتي لو في عندهم مناسبة تستلزم اني اجلس لين بعد 12 كمان ..يسوي مشكله ويتهاوش معاي وبالاخير يرجعني البيت وهذا كله اهلي مايدرون عنه لاني مااشتكيلهم بس يلاحظون ..نفسيتي اتغيرت كثييير صرت دايم متضايقه ولا لي نفس بشي او اسوي شي بسبب الحبسة اللي حنا فيها انا وعيالي والله احيان تمرر شهور وانا ماغير من بيتي لبيت اهلي او اهله انقطعت عن العالم وعن كل شي بسبب سيطرته بخيل بوقته وبماله وحتي بعواطفه حتي لما اجلس احن عليه عشان يطلعنا شوي حتي لو خرجنا يجلس مكشر او لاهي بجواله لين اكره الطلعه ونرجع وهذي ماتصر الا بالسنة حسنة ..حتي اهلي لا جوو خارجين يعزمونا وهو يعتذر بسبب ان مامعاه فلوس صارو اهلي يلمحون لي انه ليش كذا حابسك وانا غلطتي اني كنت اتعذرله ومعليش عشان شغله وظروف ..المهم بعد هذا كله واللي انا متحملته جا قبل اسبوع قالي انا ابي اسافرر اغير جوو وابي اروح وانتي راضيه .. انا زعلت وضاقت فيني يعني انا اللي متحمله وصابرة وهذي اخرتها وفهمت منه انه رضيت ولا مارضيتراح يسافر بكل الاحوال قلتله خلاص نروح سوا قالي لا ماعندي فلوس تكفي مع انه يقدر يدبرها بس مستكثرها علي ويبيني اروح انتظره عند اهلي لين يرجع وارجع انطق بالبيت مرة ثانية ..قلتله خلاص الفلوس اللي معك تقدر تمشينا فيها موب لازم نسافر او خلينا نكمل اللي ناقص بالبيت او او او .... بس بدون فايدة انا من يوم ما قالي وانا زعلانه ومتضايقه منه وهو داخل خارج يراضيني بس مو قادرة اتحمل خلاص .. يمكن بعصكم يشوف اني مكبرتها بس والله هالاشياء كلهاا تضيق الصدر حيييييل ..الحمدلله ماازكي نفسي بس علاقتي بربي زينه ولله الحمد ومحافظة علي مظهري بكل النواحي وبشهادته هو .. انا الحين حاطة براسي انه لا سافر بروح لاهلي وماعد برجعله الا اذا شفت حاله تعدل بس مابقوله اني مانيب راجعه .. مدري اذا تفكيري صح او لاا بس صدق ماعد اقدر افكر بشي غير راحة بااالي ونفسية اولادي ..اتمني منكم تشورون علي وجزاكم الله خيير ..




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]