تعقيب للمره الاولى اتوكل على الله واتطلق؟؟
 

هذا رابط مشكلتي

عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]


ربي يسعدكم جميعا..

هدّيتوني بردودكم والله.. الله يجزاكم خير..

صديقتي اللي سألتني عن ايجابياته..

عنده ايجابية واحدة وهي انه بارّ جدّا بأبوه واهله كلهم ويحب اهلي برضه ويحترمهم ويخاف منهم بعد..

بالنسبة لعلاقتي بأهله جدّا ممتازة واهله صراحة ناس عسل فوق الوصف ابوه وزوجة ابوه واخواته يحبوني اكثر منه ومايرضون علي وانا متأكدة لو جربت واشتكيت لهم بيعلقونه ويجلدونه لين يقول آمين..

لكن ماعمري ماعمري اشتكيت لا لهم ولا لاهلي..

اللي يقول مادريتي قبل تاخذينه.. لا مادريت..
كان كل شي مختلف المدينة اللي كان يشتغل فيها بداية الزواج جميلة جداً وكان ياخذنا معاه ف الاجازات وننبسط.. وبعدها نقل وراتبه نقص وسيارته انعدمت من كثر السفر والايجار غالي هناك غير ان صاحب الشقة رفع علينا الايجار غير ان اهله يمرون بظروف صعبة ولازم يساعدهم من فترة لفترة.. والشقة قاللي ضيقة ومؤقت وبننقل منها والى الآن مكانك سر.. علما بأني نهائي ماقد ضغطت عليه في موضوع الشقة..

اللي تقول ما اساعده ياجماعة من لما أخذته راتبي نصه له تصليح لسيارته مصاريف البيت والولد والايجار والسفريات وكل شي ادفع وماقول لا..

لكن حاليا رصيدي ((صفر)) لاني قاعدة ابني وتديّنت الكثير ولسه ماخلصت.. للعلم ماني جالسة استثمر لنفسي.. ابني لنا بيت نسكن فيه عشان افكّه من الايجار..

واللي يقول الحمل مأثر.. ايه والله مأثر ماكذب عليكم تعبانة جدا وبس منسدحة والوحم لاعب فيني نحفانة لا اكل ولا مويه حتى.. اهله الله يسعدهم مايقصرون معي لكن هو ابدا مو هامّه الا نفسه.. يبغى كل شي نفس قبل.. اول ماشاف مني تقصير راح يشتكي لاهلي يقول ماتطبخ ماتهتم بولدها ماتعطيني حقوقي... الخ ويهددني بيتزوج يقول الحياة ماوقفت عليك استغفر الله يفكر البنات بيتسابقون عليه..


طفشت من حركته طيب قبل الحمل كنت ماوقف اكرف.. والحين قصرت بس 3 شهور وقلب الدنيا..!! لكن فكرت فيها لقيت نفسي انا الغبية لي 5 سنوات منطمّة وساكتة ليه ماشتكيت منه ليه ماتركته..!!

واللي يقول اكتب وانا مروووقة لا والله بالعكس نفسيتي متأزمة وبس ابكي عشان ولدي بيتشتت.. والا هو في ستين داهية.. والله الحياة عند اهلي اجمل بكثير اصلا مافيه مجال للمقارنة يارب لك الحمد.. مادري وش صبّرني على ذالغثى استغفر الله..

نسيت اقولكم من سلبياته كسوووول.. يحب يتسدح ويتبطح.. ومايبغى يساعد حتى مدخل البيت يطفشني لين يقوم يغسله.. ومره عطيته اغراض يوديها الجمعية العاب وكذه لقيتها مرمية فوق السطح ومره عطيته ملابس لي راح اعطاها اخوه يوديها آآآه ياقلب العنى..

صراحة شي لايُطاق.. وصلت الازمة اني اخلص دوامي 12:30 واطلع 2 عشان لاشوف وجهه.. طيب وش الحل معه فكرت في الطلاق لكن من كلامكم حسيت بالذنب عشان ولدي.. طيب شرايكم اطفشه؟؟ اخليها تجي منه هو احسن؟؟ وش اسوي؟؟




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]