انا وولد اخوي(تعديل العنوان)
 

السلام عليكم

ماني حمل مقدمات لاني طاقة طاقة خلاص.
الموضوع باختصار، اخوي (عنده مرض نفسي من بعد زواجه)، تطلقت منه زوجته قبل شهر، اخذت البنت عمرها3 سنين معاها عند اَهلها و رمت الولد عندنا بدون ما تاخذ رأينا حتى، فجأة يطق الباب و الولد بعفشه يقول بعيش عندكم !، عمره 8 سنوات.
و الولد اصلا ما يبي يروح بيت جدته لأمه، بيئة بيتهم جدا سيئة انه يتربى فيها اطفال، ما حنا كامل، لكن بشهادة امه قالتلها بلسانها "ما اتمنى عيالي يربون وسط اخواني".
المهم ان اخوي رافض و و امه رافضه انه الولد يروح بيت جدته، و جايبينه عندنا على زعم ان جايبنه عند امي!!! و هم عارفين تماما ان امي كبيرة و ما تقدر تقول بالولد!!
و انا لو جينا لرغبتي انا بعد اتمنى ان الولد يتم عندنا، لكن مو كل شيء المفروض يمشي على هواي.
انا اقدر اقول ان هذا اكثر شهر تعبت فيه بحياتي، الولد يحبني و أعني له الكثير، محد مهتم له فالبيت غيري.
لكن انا طقيت خلاص،و بنفس الوقت قلبي مكسور عليه.
يصحيني من النوم يقول متى تصحين تلعبين معي؟ و الله وقتها ما ادري ابكي قهر و لا غبنه.
الولد طول يومه فالبيت، و هو ماشاء الله ذكي و يحب القراءة و كل شوي يجي يعلمني أشياء جديدة يتعلمها، بالبداية كان الوضع عادي بس الحين خلاااص ما عدت اقدر، يبيني طول اليوم ارافقه، يا رانيا شوفي و يا رانيا بقولك قصة و يا رانيا انتي تحبيني؟ هيا تعالي نلعب.
، و يزعلني لما يبي يقول شي و اكون اسمعه، يقول لا ركزي انتي ما تسمعيني زين ، وبنفس الوقت عنيييد ، و يصاارخ لو زعل، اعتقد متأثر بأبوه، (ما يخرج الشارع و لا عندنا جيران)
هذا غير والدتي اللي تعتقد أني خلاص المفروض مسؤولة عن كل شي بالبيت بحكم اني الوحيدة المتخرجة من اخواتي! ههههه وبعد ذا كله تقول ما فيني خير.
اعوذ بالله من الشيطان الرجيم صرت ما احب أسمعهم ينادون اسمي. صرت اجلس اتخيل اني عايشة لحالي كحلم. ما لي و لا علي.
انا انسانة عندي حياة، عندي أشياء أسويها في يومي! مو معقول طول وقتي مسخر بس لهم.
مره حبيت ارتاح ف غرفتي ، فجيت وقلت لامي تبين شي قبل ادخل قالت لا، جيت لولد اخوي و أعطيته أشياء يلعب فيها و قلت له يا ماما انا الحين مشغولة، اذا خلصت شغلي جيت العب معك، و رحت الغرفة، تخيلوا ان خلال النص ساعة بس جات امي 3 مرات و هو 4 مرات. و الله قعدت أصيح
اكتشفت ان انا اللي احزن ف الموضوع كله.

بقولكم شي، قبل فترة تقدم لي واحد لكن رفضت لاني عارفة ان نفسيا لسا مو حمل عائلة و مسؤلية.

اعتقد ان واجب علي اني اهتم للولد، مو احسان مني، لكن هذا اللي المفروض يصير، من له يعني بالله؟
مشكلتي اني مو عارفه أتصرف مع الولد و ماني عارفه كيف أتخلص من توتري و عصبيتي صرت خايفة يحوشني مرض عضوي من كثر ما افكر.
ما ادري ايش اقول، انتم قولولي و ادعوا لي.




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]