مشكلتي تتعلق بأخوي ووالدتي
 

السلام عليكم ورحمة الله وبركاته،
بقولكم المعطيات بشكل عام حتى تفهمون الوضع، الوالد متوفي 5 أخوات جميعهم متزوجات (واخوي الكبير 32 وزوجته والوالدة وانا الاصغر24 سنة ساكنين جميعاً ال4 بفيلا واحدة)، راتب أخوي قليل نوعا ما لكن افضل من غيره بكثير و يكفيه هو وزوجته انا متكفل بكل شيء بالبيت أكل كهرباء رواتب خدامات وأدفع عن الوالدة قرض وأمشي فلوس شهريا لأخواتي اذا احتاجوا وقد خذيت قبلها قرض لأخوي لزواجه بتكاليفه كاملة والحمدلله تم على خير.،
راتبي ممتاز الشكر والفضل لله. لكن انا لم اعد احتمل المصاريف هذه جميعاً لوحدي ومااقدر اقول نقتسم المصاريف جميعا لأخوي ولو مشاركة بالشيء البسيط لأنهم تعودوا ان جميع المصاريف علي انا وخاصة بعد زيادة الالتزامات من كهرباء وماء وبنزين، للعلم انا أحب الانفاق على نفسي والسفر، اخي والوالدة ينظرون لهالشيء انه مضيعة للمال والمفروض هذا المال انفقه عليهم وعلى البيت. وهذا يقهرني كثيرا كاني لم اتعب على هذا المال ويرون ان هم الاحق فيه، اخوي اول ماينزل راتبه يشتري له كماليات واشياء ليست بالضروره ثم ياتي يطلب الوالدة فلوس والوالدة تجي تطلبني واعطيها وتروح تعطيه وعلى هذا المنوال لانهم بالنهاية يعرفون اني موجود وبعطيهم واقصر على نفسي كثيرا علشان اعطيهم. أخوي وحنا لبعض صح بس الى متى على هذه الحالة ووراي زواج والتزامات كثيرة، كتبت الموضوع لاني مابي ازعل الوالدة بشيء اذا رفضت لاخوي طلب، زوجة اخوي تقارن كثيرا بيني وبينه بالسيارة واللبس والسفر والمظهر وهذا سبب حزازية لاخوي تجاهي وبعد الزواج بمدة منها صار يحاول انه يشوه سمعتي قدامها سواء بغير المسؤولية او عدم الاهتمام لاي احد ومبين لها انه هو يتكفل بكل شيء بحكم انه الاكبر وعليه التزامات كثيرة وانا مجرد اني اضيع فلوسي مع اخوياي وبالسفر! . والموضوع الاخر زوجته كثيرا تفتح موضوع له اني اخذ اختها وهم من منطقة بعيدة وليست لي رغبة كيف اسكر هذا الموضوع ايضاً. الله يعطيكم العافية‏‏‏‏
 ‏‏‏‏‏‏




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]