خلي امك تربيك من جديد ياقليله الادب
 

السلام عليكم

متزوجه وعندي ٣ اولاد توأم اعمارهم ٤ سنوات ونص الحمدلله مستقره مع زوجي

الجمعه اللي فاتت كان اهل زوجي مسوين عزيمه على غدا يعني عزيمه لعيالهم وحريمهم كل واحد حرمته وعياله
المهم اخوان زوجي٤ كلهم ساكنين بشقق فوق بيت ابوهم الا زوجي ساكن بشقه اجار
لان عمي لما بنى البيت بنى ٤ شقق بس المهم ..

قبل صلا الجمعه قلت لزوجي تطلع من المسجد لا تصعد ع طول انزلك انا عشان مانتاخر وجهزت نفسي و عيالي من قبل الصلاه لما طلع زوجي من المسجد نزلت ع طول وركبنا السياره ومشينا اتصلت امه قالت وينكم قال لها زوجي بالطريق
المهم الساعه ١ و٢٠ دقيقه بالضبط حنا عندهم

لما دخلت عليهم لقيتهم كلهم موجودين وشفت البزارين جالسين يتغدون سلمت عليهم وقلت احسن شي انكم خليتو البزران يتغدون اول عشان نتغدى براحتنا

ضحكو
وحده منهم قالت تغدينا وخلصنا تاخرتو انتم
قلت الله اكبر توها الساعه ماجات وحده نص بلا كذب وانا اضحك عبالي يمزحون
جلست شوي واقول بنفسي غريبه موجالسين يجهزون السفره الا اسمع صوت زوجي ينادي امه قال لها مابقيتو لي غدا قالت والله مافي عندي ليه اللي عند الرجال مخلص .. قال ايه
قالت له باقي رز بدون لحم قال لها خلاص خلاص انا شوي اطلع اتغدى

بوقتها صدقت انهم تغدو وخلصو شوي الا جتني تقولي قومي كلي بقى من الغدا في الصحن وتأشر على الصحن اللي جالسين فيه البزران والله ياناااس انو كلوه عظم مافي ولا نتفه لحمه وحتى الرز متبعثر بالصحن محيوس حوووس لبن وسلطه من البزران قلت لها انتي شايفه شي يتاكل .. قالت لعيالي قومو كلو قلت لها لا انا شوي اطلب لهم غدا

عاد انا كنت جايبه معي كيكه كبيره وعيالي من وانا في البيت متشفقين عليها وانا اقولهم معليه بيت جده اعطيكم ..

المهم قمت للمطبخ وجبت كيكتي الا قالت ام زوجي خليها العصر نحلي فيها مو اللحين شبعانين

قلت عيالي جوعانين وهم من البيت متشفقين ع الكيكه
وحطيتها كلها لعيالي حتى بدون صحن قلت لهم كلو ..
خليتهم ياخذوون راحتهم اكلو منها لين شبعو والباقي محيوسه رجعتها بالكرتون وناديت الشغاله قلت لها تعالي شيليها عشان نتقهوى عليها العصر قالت ام زوجي لا لا ارميها قرف محيوسه

قلت لها توك قلتي قومي كلي من بقايا البزران .. جت على عيالي

المهم ضلينا ابو نص ساعه عادي سواليف شوي الا يتصل زوجي ورديت قدامهم عشان مايقولو انو انا اللي اتصلت قالي يلا نمشي قلت له بدري قال جوعااان بروح اتغدى خلينا نروح نتغدى بمطعم قلت له طيب ..


قمت وقلت يلا ماشيه وسلمت على ام زوجي وحبيت راسها وانا امشي قالت لي قولي ل أمك تربيك من جديد ياقليله الادب التفت عليها الكل ساااااكت طالعت كذا ومشيت ..

مع العلم عمري ماتهاوشت معها واعاملها بالحسنى ...
للمعلوميه ام زوجي ماهي هذيك العجوز الطايحه بالعكس متشببه ومهتمه بنفسها وبلبسها االي يشوفها مايقول عندها ٩ عيال وبنات ..

طبعا ماقلت لزوجي عن اللي صار .. وامس قالي نروح بيت اهلي قلت له تعبااانه مااقدر اروح ..

أسالكم بالله تشووفوون اني غلطانه .. حبيت اعاملهم بالمثل عشان يحسو شوي

وكيف اتصرف لا شفتها




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]