طفشت من تصرفات زوجي ..
 

السلام عليكم ورحمة الله وبركاته

بداية اعذروني اذا اطلت بشرح المشكله لأني تعبت واحتاج اسمع ارآء عقلانيه ومنطقيه للي حاصل معايه ..

انا متزوجه ليا سنه من ولد عمي وكلنا نفس العمر ، وكان فيه حب من الطفوله وهما ساكنين بمدينه غير مديتنا ، حياتي معاه ابدا ماتخلو من المشاكل الزوجيه واصبر نفسي واقول شي طبيعي اول سنه بسبب اختلاف الطباع وكل شخص يبغى يثبت ذاته فيه صفات بزوجي عجززت اتقبلها رغم انو فيه ايجابيات كثيره وهيا مصبرتني عليه ،اما سلبياته تناقشت معاه بخصوصها بس يرجع نفس السيناريو وكأن مادارت نقاشات طويله عريضه .. انا برضو فيني سلبيات صارحني فيها وعدلت من شخصيتي كثير للأحسن وبشهادته

المهم من فترة الملكه لاحظت بعض من هالسلبيات .. وحصل موقف وقتها انو طلعت لصحباتي واتأخرت وانصدمت انو متضايق وزعلان ويتصل كل شويه ويقولي يلا خلاص ارجعي وانا اللي اخرني وقتها البنت كانت ماسكتني للعشاء هيا وامها واتفشلت منهم وجلست ، ومع ذلك بررت له وكنت اعتذر وامشي الموضوع مع انو اشوف وقتها مايحق له يزعل اولاً لأن لو تفهم موقفي كان عذرني وثانيا لأني في بيت اهلي لسى ماصرت في بيته عشان اقول يحتاجني اكون بالبيت ، وقبل اطلع استأذنت منه واهلي عارفين كل شي وانا من الناس اللي مااحب اخرج كثير اصلا بالشهر مره لو طلعت ..

تطور هالموضوع لبعد الزواج بس الحمدلله انو ماعندي صديقات في المنطقه اللي فيها زوجي كل اللي اعرفهم اهله وبعض قرايبنا وجارتي واروح لهم مع اهله ، وعلى كثر ماكان مضايقني انو بسكن بمنطقه مالي فيها اي صديقه الى انو صرت اقول الحمدلله عشان مااتعرض معاه لتصادمات ، وكمان يقولي بعد 12 الليل ماتكلمي صديقاتك ويزعل اذا شافني اسولف مع وحده هالوقت وصرت ماعاد اسولف معاهم بالليل ..

و اذا جيت انزل لأهله لازم اعطيه خبر مثلا قبلها بيوم مع انهم ساكنين تحتي ياناس انا ساكنه معاهم بنفس العماره ، وحصلت لي مشكله كبيره في احد المرات بسبب هالشي وهوا انو وقتها كان حاصل بيننا خلاف وطفشت من جلسة البيت قمت تجهزت ولبست عباتي وجيت طالعه قال وين قلت عند اهلك قال لا لاتطلعي قلت ليش قال ليش ماقلتيلي قبل انك بتطلعي مو على طول تشيلي عباتك ويلا بطلع ، وانقهرت منه وقلت انا فين بروح يعني بنزل تحت عند اهلك ، ورفض انقهرت منه وعاندته ونزلت وزعل وتدخلو وقتها حتى اهالينا للصلح بيننا ، بعدها رحت اعتذرت منه لأن طلعت بدون رضاه وبنفس الوقت كنت احس بالظلم والتسلط لأن انا ماطلعت من وراه كل ذنبي عشان ماقلتله قبل اتجهز ، وعشان مارحت مكان غريب بس نزلت حق اهله ، اعتذرت عشان الحياه تمشي وعشان خلاص تعبت من المشاكل اللي تحصل بسبب امور تافهه

اتخرجت من الجامعه بنفس سنه زواجي وكان طموحي اتوظف بنفس مجال تخصصي لأن مره احبه ولأن خاطري يكون لي دخل خاص اساعد فيه امي لأن وضعنا المادي شويه صعب من بعد وافاة والدي الله يرحمه وكان من ضمن شروطي بالعقد الوظيفه وصدمني بعد زواجنا برفضه انو اكون موظفه وتناقشت معاه لمن طفشت وبالأخير صبرت وسكت وقلت مع نفسي هوا مو مقصر عليا بشي وماعاد فتحت الموضوع مع انو مازال بخاطري ..


وليتها وقفت على كذا والله كثير موقف يبغالها صفحات عشان احكيها بس الموقف اللي خلاني اجي اكتب مشكلتي هنا هوا موقف حصل امس .. انا حاليا عند اهلي لمن هوا يرجع من سفرة عمل ويجي ياخذني ، وكنت من اسبوع اسولف معاه انو بطلع صحباتي متجمعين ومكلميني اجي من زمان ماشفتهم قال اوك وحصل ظرف لوحده من البنات واجلنا جمعتنا للأسبوع ذا اللي هوا امس وقلتله يومتها جمعتنا اتأجلت ، والله وجا امس تجهزت وكلمت اخويه يوصلني وكل شي وجيت ارسله بطلع وكذا ، مافتح المسج واتصلت عليه من جوال امي لأن ماعندي رصيد رد عليا وكان طالع وقتها مع اصحابه وماشاف المسجات وقلتله يافلان انا بطلع لصديقاتي اللي قلتلك عليهم قام يقولي متصله وانتي خلاص قدك متجهزه وطالعه ليش ماعلمتيني امس انك بتطلعي اليوم ، قلتله امس انت كنت مسافر ماامداني اعلمك قال بس وصلت واعطيتك مسج ليش ماقلتي وقتها قلتله نسيت ومااهتميت اصلا لان خبرتك من اسبوع وقلتلي اوك اطلعي ، جلس يقول لا لاتطلعي واحاول فيه برضو رافض قلتله والله يافلان حزعل منك ومااكلمك لا تنكد عليا و تحرجني مع البنات مره خاطرهم يشوفوني ووعدتهم اجيهم برضو مافيه فايده ، قلتله خلاص مع السلامه وقفلت وانا ابكي من القهر والتسلط ، رجع اتصل فيني اخر الليل مارديت ولاعاد افكر ارد عليه بصراحه خلاص طفشت من كثر ماتكلمت معاه في اسلوبه هذا

وهالمره فعلا ماعاد بمشي له هالأسلوب لو اضطر فيني الأمر ادخل بيننا احد كبير وفاهم يفهمه انو الحياه الزوجيه سلسله ومرنه اكثر من كذا والتشدد الزايد منفر .. حاليا انا حامل وماافكر بالطلاق ايش رايكم باللي حاصل امانه هل هو شي طبيعي ومن حقه يتصرف كذا ؟! والا انا اللي مو فاهمه الحياه الزوجيه !

اعتذر مره ثانيه ع الإطاله وشاكره لكم مقدما.




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]