عروس وابي انفصل
 

السلام عليكم ،،
اولا وقبل كل شي ، وضعي والله مو (دلع و لا هبل بنات)
انا اخر العنقود وتوني متزوجه لي تقريبا شهرين ونص عمري 25 ،
(علاقتنا وقت الملكه كانت حلوه ومره مرتاحين ، بس من بعد الزواج كل شي تغير)
طوول هالفتره عايشه بضيقه مو طبيعيه واحنا طالعين ضايقه واحنا في البيت ضايقه وبس ابكي ،، ماقدرت اتأقلم مع وضعي حاليا ،، زوجي احسه كأنه اخوي مافيه مشاعر ابد ، حتى لما نطول عن بعض مده كبيره ما افقده نهائي ولا اشتاق له ولا لبيتي ،، وهو بالعكس يحبني وبس يسأل ويتطمن و يشتاق ،،
انا ساكنه بمنطقه بعييده عن اهلي واهل زوجي ،، منطقه مانعرف فيها احد ابد وكل شهر ازور اهلي اسبوع و اهله اسبوع ،وباقي الاسبوعين ارجع لمنطقتي ،، احس بتشتت وعدم استقرار ابد حياتي كلها سفريات ولا نقدر نجلس بمنطقه وحده
ولما اكون مع اهلي احس براحه مره اني مو معه ، بس يجي في بالي اني بس اسبوع وبرجع لوضعي وبسافر تجيني ضييقه ، من يجي ياخذني نرجع اطلع من عندهم وانا ابكي مابي ارجع لوضعي وبيتي مو طايقه حياتي ابد ،، هالحاله ما بدت معي الا بعد شهر العسل لما خلاص وصلنا لمنطقتنا ودخلنا البيت ،، دوام زوجي مره صعب و يوميا يطلع بالليل من المغرب او العشاء للفجر واحيانا يستلم ١٢ ساعه يومي ،، اكون كل هالفتره لحالي واذا جاء ي دوب نجلس سوا وننام ولا في مجال يغير دوامه لمنطقة نعرفها قبل 5 سنوات (ماكنت اعرف بوضع الدوام قبل الزواج) ،،ماعرف اذا الحاله اللي امر فيها اكتئاب مابعد الزواج والا لاني فقدت اهلي والا المشكله فيني ، كثير يقولون لي اصبري بتتعودين بس والله مو قادره ي دوب تحملت شهرين ونص ،، ابي ارتااح وارجع لنفسي قبل ايجابيه وفرفوشه واطلع من الحاله اللي انا فيها ، حاليا نفسيا مرره تعبانه واحس بوحده مو طبيعيه ولا ابي اكمل ، كل هالشهرين وانا بضيقه مايعلم فيها الا الله
مو مرتاحه بهالزواج ماحبيته مافيه قبوول ابد ولا ابي يكون في اطفال وبكره اضطر اجلس عشانهم ،، انا افكر بالانفصال بما انو الوضع كذا و لا ابي اظلمه معي لاني نكدت عليه و كل يوم مشاكل عشان وضعنا مو مستقر ،، وللامانه الرجال مرره طيب و كل شي فيه كويس ماشفت منه شي مو حلو ،، بس المشكله فيني انا ،، ماابي اكمل حياتي معاه وبهالوضع ولا قلت له شي ، ابي افكر واخذ قراري بدون تسرّع ،،

- ملاحظه ،، اخذت جلسات استشاره اجتماعيه ونفسيه عند اخصائيين بس ما طلعت بنتيجه

اسبابي بالانفصال ،، مافي مشاعر ، مافي استقرار ، نفسيا تعبت كثير

..
تشوفون اسبابي كافيه اني ما اكمل؟! ، والا ايش الحل الله يسعدكم!


بدووون تجريح رجاءً




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]