مشكلتي مع زوجي أنه وسيم
 

انا متزوجة من شاب وسيم كتير وفيه كل الصفات اللي بتحلم فيها أي بنت.
وهي هيي مشكلتي إنه حلم أي بنت والمشكلة الأكبر يا جماعة إنه رغم حبه إلي إلا إنه نسونجي كتير وبيتطلع بالنسوان و وين نكون لازم نرجع على البيت متخانقين بسبب إن البنات بيتطلعو فيه وفي منهم بيوصلو لدرجة يغازلوه وأنا معو تخيلو.
والمشكلة إنه هو بينبسط بهالشي أوقات بندم أني تزوجت شب بهالوسامة والمشكلة الأكبر إني اكتشفت إنو عم يسهر مع نسوان وعندو علاقات ولما واجهتو وصارحتو صار يقلي هي مجرد نزوات وعلاقات عابرة أما إنتي الأساس وإنتي الحب الحقيقي ومرة زعلت وتركت البيت لما سمعتو عم يحكي مع وحدة، واللي خلاني ارجع هو حبو إلي، اجا راضاني ورجعني على البيت معززة مكرمة وقلي البيت ما حلو بلاكي ووعدني يبطل هالشغلات وظبط وضعو فترة قليلة شهر ورجع لعادتو من جديد ولما طلبت الطلاق منو صار يترجاني سامحو ووعدني إنها آخر مرة، ورجعت من فترة من أسبوعين شكيت بأمرو مرة تانية قمت راقبتو وطلع شكي بمحلو قمت صرت قلو طلقني وتزوجها قلي لك كيف بدي طلقك واتزوج وحدة عاهرة ، حدا بيبدل غزلانو بقرود؟
يعني بذمتكم هادا انسان طبيعي؟
ومرة مرضت ودخلت المشفى بقي جنبي وصار يبكي من خوفو عليي ووعدني إنه يمشي متل ما بدي ولما شفيت وطلعت تفاجئت إنو متعرف على الممرضة ومعو رقمها
يعني بذمتكم هادا إنسان طبيعي؟
صار يقول إنه أخد رقمها منشاني أنا لو لزمني شي يسألها بس خلص ما بوثق فيه أبدا، كل ما بيروح محل بضل على أعصابي والمشكلة إنو هلأ انا حامل في شهر الثاني وطاااير عقلو إنو حيصير أب بس أنا ما مبسوطة لأني ما بعرف إذا راح كمل معو أو لأ
وهو بصراحة مانو حدا خبيث بالعكس هو حدا كتير طيوب وحنون وكريم وبيعاملني باحترام وكل طلباتي أوامر وحتى أهلو ناس صعبين شوي وبيتسلطو على كل كناينهم إلا أنا لأني طيبة معهم وفارضة عليهم ودي باخلاقي العالية ، بس عندو هالسوسة رح يجلطني، واللي مصبرني أكتر هو حبي إلو بعشقو وبموت فيه وحامل منه .
شو الحل




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]