بنات الزوج وامهم
 

متزوجه منذ اكثر من عشر سنوات
تزوجت انسان منفصل لديه بنتين والاهل ماتأكدو من موضوع الطلاق حياء او احترام
قالو اهم شي سمعة الرجل والناس كلهم يأكدون على موضوع انه منفصل
اكتشفت بعد الزواج انه غير مطلق وانها على ذمته ولكن منفصلين لاكثر من خمس سنوات
والحياة بينهم منتهيه ولديه بنتين منها
الام عايشه هي وبناتها بمكان مستقل لحالهم
اول زواجي عانيت جدا من تعامل بناته رغم صغر السن لكن لااحترام ولاادب
ومن اتصالات الزوجه ولكن طنشت خصوصا اني عرفت انها على ذمته
كانت تهددني وتنبهني من موضوع الحمل واياك تحملين حتى بناتها الصغار علمتهم
وصارو كل ماشوفهم ينبهوني لدرجة يسبون ابوهم وانه حرام تجيبين عيال منه
مضت السنوات وكتب ربي الذريه وصار عندي طفل اشتعلت النيران وزادت المشاكل من تجاههم
ورفضو بنات زوجي يشوفون اخوهم وصرت ارسل لهم صور عشان يحنون بالاخير هم اخوان
ولكن لاحياة لمن تنادي قلوبهم قاسيه مع مرور السنوات الحمدلله معي خمسة اطفال الان
في هذي السنين مرينا بظروف صعبه ولو اشرح وافصل بيطول الشرح
سنين مر زوجي بظروف ماديه وضغوطات وكنت واقفه واتحمل وشايله بيتي وعيالي وادعم معنويا قدر المستطاع
بينما بنات زوجي ماراعو طروف والدهم وبالعاميه سحبو على ابوهم
مايعرفونه الا بالفلوس والطلبات
انتقلنا وعشنا في شقه اصغر والحياة صارت اصعب مارضو يجون يزورونا بهالمكان او يقضون كم يوم معنا ومع اخوانهم
الان وبعد اكثر من عشرة سنوات تبسرت امورنا بفضل الله وكتب لنا رب العالمين السكن ببيت ملك
الحين رجعو يضايقوني يوم شافو البيت واني ابي اخذ اثاث واني فرحانه
صارو يبون يتدخلون ويبون يأثثون وانه بيت ابوهم وصارو يجون له بالكلام الحلو او بالمعنى الاصح عرفو ابوهم الحين
لدرجة ان امهم اي زوجته السابقه تقول ابي اجي اشوف البيت مع بناتي ومافيها شي
معليش ياجماعه انا صح كل هالسنوات طيبه واراعيهم لكن انا تحملت وصبرت بينما هم تخلو عن ابوهم وقاطعوه انا دعمت معنويا وساعدت وتعاملت احسن معامله وهم ماشفت منهم شي
كنت انتظر الاحترام سنين ماكنت ابي منهم شي
لكن الحين يتذكرون ابوهم واخوانهم عشان بيت
يتمشون داخل البيت ويعطون ارائهم بطريقه مستفزه وانا اسكت عشان خاطر ماتصير مشاكل ويكونون قراب من ابوهم واخوانهم وماتخرب العلاقه
يتمشون بالبيت ويفتحون الدولايب ويفتشون ويشوفون وش فيه بالمطبخ
لو انهم يبون ياكلون البيت ببتهم بس تفتيش ونبي هذا ونبي هذا ويطلعون محملين اكياس من اغراض بيتي
وحده تقول ليش هذا كذا ؟ وهذا احسن نغير مكانه وهذا لونه مو حلو
وترد الثانيه حلو هالمكان بس لازم يكون الاثاث حلو بصير بعزم صديقاتي هنا بعدين واذا بنحتفل بعيد ميلادي
المره الجايه بنجيب امنا تشوف البيت !!
والله عندي لسان لكن اي تدخل بيطلعوني انا السيئه وبتخرب علاقتهم بأبوهم وعقب بيقولون انا السبب
وخلقه هم يدورون على سبب للزعل الله لايبلانا ومايعرفون ابوهم الا بالفلوس والطلبات من يوم عرفتهم
ياجماعه حطو نفسكم مكاني وعطوني التصرف الصح بهذه الحاله
ابي استقل وابتعد عنهم بنفس الوقت مابي اكون سبب شر بينهم وبين ابوهم عطوني حلول
اخذ مشورة اختي لكن رايها بيسبب مشاكل كبيره وبيتصير قطاعه




عفوا ,,, لايمكنك مشاهده الروابط لانك غير مسجل لدينا [ للتسجيل اضغط هنا ]