مرحبا يا اخوان ، كيفكم عساكم بأحسن حال .. انا جايتكم باستشارة وشوروا علي لاهنتم زوجي انسان طيب وكريم ووظيفته كويسه ومرموقه وحالتنا المادية قبل كورونا كانت ممتازه وطبعا مثل الكل تضررنا بعد كورونا صحيح حالتنا للحين تعتبر جيدة جداً لكن اكيد مو نفس قبل يعني يادوب صرنا نمشي حالنا لاخر الشهر ، عندي طفلين صغار وورا بعض مره وعسرين وصياحين والفرق بينهم بسيط وعسرين جدا بشكل جنوني فاعندي عاملة تساعدني فيهم ، تمام ؟ السالفه يا طويلين العمر ام وابو زوجي متوفين الله يرحمهم ومافي الا حماواتي خواته [ علاقتي فيهم رسميه جداً] وكلهم متزوجات وكبار بالسن وبرضو حالتهم المادية تعتبر ممتازة ويمكن افضل مننا ، خصوصا وحدة منهم تبارك الله حالتهم ممتازه ومرفهة ، مشكلتي ان مع تغير الظروف المادية زوجي ماتاقلم خصوصا وان عليه قروض مثل غالب الشعب ف صار يزن ويحن علي اني اسفر العاملة او انه يبيع ارض لنا او سيارتنا عشان يوفي القرض ويرجع ينفك الراتب وهالاشياء كلها مرفوضه بالنسبه لي وانتحارية وغير مدروسه وبتخسرنا اكثر ، قاعده احاول فيه يصبر بس مب راضي يصبر وصاير كل شوي يتشكى مع ان والله العظيم ماعاد فيه اي كماليات او رفاهية اغلب مصاريفنا اساسية اجار فواتير مقاضي وطبعا ماعاد لي مصروف شخصي منه وتقبلت هالشي لين الله يزينها بس يعني والله العظيم مره ضاقت يعيد ويزيد بنفس الموضوع !! المهم اني والله بالصدفه اليوم اكتشفت بجواله يشهد الله مابحثت هو كان مفتوح محادثاته مع حماتي هذي اللي تكلمت لكم عنها فوق ، يا بنات مصدومه والله بشكل شبه يومي تطلب منه يحول لها مره 100 ومره 70 ومره 60 ! يعني مصاريفها اليومية ، يوم جلست احسبها تقريبا حول 700 ريال هالشهر ف كيف وهي لها شهور على هالحال ، عليها بالعافيه واخته بس يا جماعة هي متزوجه وعندها بيت ملك وعندها دور عدها دورين مأجرتها وصرافة زوجها بيدها وعيالها كبار وعندها خدامه وحنا تونا ماعندنا الا هالارض وعجزانين نبنيها وعيالنا لهم مصاريف وصغار معقول العدل انه يقعد يحاسبني ليل نهار ويبي يمشي عاملتي اللي تساعدني واخته والله كل شوي تكلمه كانه مسؤول عنها ويحول لها كل شوي ! جدا قاهرتني واشوفها استغلاليه خصوصا انها كل شوي تدق بالحكي لاخوانها ان الخوات مايتعوضون والزوجه بدالها الف ولاتفكرون تخربون علاقتكم فينا ، هي عندي بالسناب والله يهنيها ماتقعد من قهوة للثانية ومن شاليه للثاني وتلبس هاي براندز والله بمبالغ خرافيه شانيل وال في وخلافه معقول كل شوي تطلبه مبالغ زي كذا ! مو عارفه كيف اتصرف معاهم الاثنين هو اكيد ينحرج منها مع علمه بوضعها المادي ومجبور وهي صراحة استغلاليه جدا مستغله حبه لها يعني وتجيه بطريقة المسكنه مادري وش الحل بحيث اوقفهم الاثنين عن هالاستهبال اللي على حسابي وبنفس الوقت ما احرج نفسي واحطها بمشاكل ومايعرفون اني ادري خصوصا زوجي ! فكرت صراحة ادقها بالحكي ان حالتنا هالشهور سيئة يعني وماعاد نلحق ولا وش اسوي شوروا علي ، واكرر اقسم بالله لو حالتنا نفس قبل او انه مايتشكى فوقي كل شوي كان والله ماقلت شي ابد

وبشكل عام يعني كل حماواتي كذا استغلاليين بس هذي الجحهم لدرجة انها حتى بليلة زواجنا طلبت منه حق المكياج والشعر لها ولبناتها ولا ماراح تحظر !! وياليتها يعني فوق هالاستغلال محسنه علاقتها فيني او في اطفالي لا والله تعاملها معانا حدا جامد ولا عمرها سالت او تواصلت ، انا الحين اكلمكم وماعندنا الا 300 ريال لاخر الشهر وهي طالبه منه امس ورايحه تتقهوى وتصور .. شوروا علي ..




المصدر...