السلام عليكم ورحمة الله وبركاته

أنا متزوج من 8 سنوات ولنا طفلة عمرها 5 سنوات
أنا وزوجتي موظفين قطاع خاص نعمل للساعة 5 تقريباً كنت أوديها وأجيبها للدوام، وبعد السماح بالقيادة صارت تروح وتجي بسيارتها الخاصة.
عمري 35 وعمرها 32

حصل خلاف بعد زواجنا بخصوص المصاريف واتفقنا على التالي:
أنا أتحمل ايجار البيت والفواتير كهرباء ماء نت وجميع مصاريف البيت بالإضافة لشراء المنزل.
نتشارك نص بنص في أمور الترفيه كالسفر والمطاعم والكوفيهات وأيضاً راتب الخادمة ومدارس الأطفال.
هي تتحمل مصاريفها الشخصية كالملبس وأدوات التجميل.
والحمدلله متفاهمين إلى حد ما وأحب زوجتي وهي تحبني ولكن عندي مشكلتين عجزت ألقى لهم حل.

الأولى: الطبخ، زوجتي للأسف ماتعرف تطبخ وتتقرف من اللحم والتقطيع وحتى الدجاج ماتعرف تنظفه لازم أجيب لها شيء منظف وجاهز. صبرت عليها مو شهر أو شهرين .. صبرت 8 سنين لكن للأسف مافيه فايدة، ببداية الزواج كنت أقول معذورة ممكن أهلها ماعلموها وبصبر عليها، كلمتها كثير وتناقشنا كثير وجبت لها كتب طبخ من جرير وفتحت لها مقاطع طبخ في اليوتيوب وقعدت أطبخ معها، تتعدل اسبوع اسبوعين وترجع على عادتها، بعد 3 سنوات من الزواج جبنا شغالة وكانت تعرف تطبخ وصارت هي اللي تطبخ لنا خلال السنتين وبعد ماسافرت رجعنا على وضعنا وللعلم زي ماذكرت كلنا موظفين قطاع خاص نداوم للساعة 5 لكن مو هذا السبب لأنها حتى في الويكند وفي الاجازات ماتطبخ إلا قليل بعد ما أقولها أكثر من مرة واذا طبخت تطبخ مرة زين وعشر مرات الله يعز النعمة، في الويكند دايم أصحى قبلها وأجلس أنتظر تصحى بعد الظهر عشان تسوي فطور أو غداء!!
إذا زعلت وشديت عليها بالكلام تتعدل فترة اسبوع عشر أيام وبعدها ترجع لعادتها القديمة.

المشكلة كنت أيام كثير أعذرها وأقول ممكن تعبانه ممكن راحت عليها نومة ممكن ممكن ..
لكن الآن بنتي عمرها 5 سنوات، الله يشهد أكلها كله مطاعم أو مايتعدى (كورن فليكس ، بيض ، خبز) و رز في الشهر مرة بعد طلعت الروح، الحمدلله كله نعمة من رب العالمين بس مايصير كذا، المشكلة حتى إذا طبخت طبخها ليومنا هذا سيء ومو راضي يتحسن، دايم اعبي الثلاجة خضار وفاكهة وأنعام، وبالأخير 90% يروح للزبالة الله يعزكم لأن محد يلمسه. كل هالسنوات ماكنت قادر أعزم أحد عندي في البيت لأني عارف البير وغطاه، وكل عزايمي كانت في استراحات أو مطاعم.
وإذا مثلاً كنا معزومين أنا وزوجتي في بيت أو استراحة عند أحد وبتاخذ معها أكل كانت تطلب من الأسر المنتجة وتاخذه معها.

كلمتها كثير كثير ومرة صار نقاش هادئ وقالت لي أنت مو تحبني؟ قلت أكيد قالت إذا تحبني لازم تتقبلني بعيوبي وأنا عيبي ماعرف أطبخ وماحب الطبخ!!

والآن في الفترة الأخيرة صارت تسوي حركة جديدة إذا جاء وقت الأكل تطلب من المطعم وما أدري إلا صوت الباب يطق واصل الطلب، سكت كم مرة وشكرتها لكن خذتها عادة، واخر مرة قلت لها مايصير كذا خلاص نبي أكل بيت تعبنا من المطاعم، سكتت وماردت علي.

بصراحة جد تعبت من أكل المطاعم، أنا مو مقصر معاها في شيء والحمدلله حتى بخصوص تقسيم المصاريف كنت دايم أجيب لها أشياء وهدايا خارج الحسبة من نفسي ومابي أحسسها إن العلاقة اللي بيننا رسمية، وكل سنة في ذكرى زواجنا أجيب لها طقم ذهب أو شنطة أو هدايا قيمة .. والحمدلله حياتنا بشكل عام متفاهمين ومنسجمين ومو من الناس اللي دايم مشاكل وهواش، بالعكس تمر السنة والسنتين بدون أي مشاكل تذكر .. طبعاً موضوع الطبخ يصير نقاش بسيط وتتعدل فترة زي ماقلت وأنا برضو من الناس اللي بالهم طويل .. الآن أحس خلاص وصلت حدي ومدري وش الحل.

المشكلة الثانية ماتبي أطفال كثير وتقول نجيب 2 كافي؟ أنا أبي أقل شيء 5 إذا ربي كتب، بس هي مو مقتنعة وتقول تعب علي وما أتحمل ومن هالكلام الفاضي، وتناقشنا كثير بالاخير تقول إن شاء الله، بس أحسها مو جادة وبس تبي تسكر الموضوع وخايف يجي وقت بسبب السن ماتقدر تحمل وتحطني أمام الأمر الواقع.

الآن بصراحة أفكر وأقول ممكن نعمة وخيرة من رب العالمين إن اللي بيننا طفل واحد، لأني بدأت أفكر بالزواج من أخرى وشايل فكرة الطلاق من راسي إلا في حالة إنها طلبت الشيء هذا وأصرت عليه، وبنفس الوقت أبي حلول أخرى إذا ممكن لأني فعلاً أحبها ومابي أكسرها وأتزوج عليها.

أرجوكم أشيروا علي
وآسف جداً على الإطالة




المصدر...