السلام عليكم ورحمة الله
مشكلتي عايشه مع ناس مافيها ذره رحمة ناس ماتفكر غير بنفسها وبس
متزوجه من 8 سنوات عمري24وعندي 3 اطفال (فرق عمر بيني وبينه عشر سنوات ونص متزوجته من لما كنت في اول ثانوي )
وعايشه مع اهل زوجي بغرفتين وحمام ومطبخ ضيقه مره هي بالاساس كانت غرفه وحمام واقسموها الغرفه سووها غرفتين والحمام صار حمام ومطبخ المساحه كلها 7امتار في 8 امتار حتى ممر لي مافي الدرج من صالتهم فاشوفهم يوميا ومتدخلين بحياتي في كل شي حتى الكيسه اللي في يدي لازم يدرون وش فيها وبكم
ومن اين لك هذا ووو
ومشاكلنا كلها يسمعونها بسبب صراخه ويتدخلون بطرق مباشره وغير مباشره اكثر من مره اسمع ام زوجي تقول لزوجي الحرمه مايجيبون خبرها الحرمه غيرها حرمه
الحرمه مايقابلونها طول الوقت عيش حياتك روح وتعال(هذا الكلام بس علي انا اما على ازواج بناتها عكس الكلام بالضبط مالك الا مرتك وعيالك عز مرتك تعزك بنت الناس ماهي لعبه) خبيثه
وولدها مو مقصر فيني احترام مافي ابد دايما يصرخ علي ويسبني ويلعني على اتفه الامور طبعا( نفس شخصية امه دايما تصرخ وتقول كلام ماينقال سب ولعن)
ومصروف حقي مافي واي شي اشتريه محاسبه عليه يضرب ويقسم ويطرح ويحسسني بالندم لاني شريت لي شي مع انه راتبه عالي وماعليه التزامات لاقروض ولاشي بس يشتري بهالسيارات المرسيدس والبي ام ب60 و70 الف ويستعرض فيهم وامه تشجعه يشتري سيارات لكن لو يشتري لي بنطلون ولا عطر تجيب سالفة مدري مين اللي تجمع ولو قال زوجها نشتري مدري ايش اهي اللي ترفض واهي اللي تحاسب على الفلوس ..
صرت حتى الاكل لو بنشتري من السوبر ماركت ادعي ربي ان مافي بيتهم احد وامه تكون طالعه كأني مسويه جريمه لان تتطمش علينا واحنا نمر بالاكياس و تعلق وتسأل عن السعر وكثير وليش ولو تشوفنا بعدها بكم يوم طالبين من المطعم تقول توكم شارين اغراض للبيت خلصوا يعني ! ! تسوي عمرها تسأل واهي لا قصدها ليش ماطبخت زوجتك
وزوجي ينكد علي انتي تحبين الخساير انا قايلك اطبخي لكن انتي هموله وو (مع العلم ام زوجي مو كبيره مره بالعمر عمرها تقريبا 54سنه)
زوجي يعاملني معامله خادمه ماخذني اطبخ وانظف بس واذا
تعبت او الاطفال اشغلوني وبقى شويه امور ماامداني خلصتها مثلا شاف شوية ملابس مو مغسوله ولا ماكنست او ما كويت ملابسه يبهذلني انتي ماتستاهلين شي انتي مهمله انتي مالك لزمه وتبين شقه كبيره بعد وووو وطبعا بصراخ وسب ولعن وتصير امه تستلم ملابسه وحتى الغدا يتغدى عندها كأنه عقاب لي
طبعا هاللشي يستفزني انا انسانه مو مكينه اتعب امرض اوقات يجيني طفش لاني انظف وعيالي يوسخون وطول اليوم واقفه على راسهم لايجي ابوهم ويقلب الدنيا علي واضربهم اذا مانضفوا ورتبوا والله ماودي اضرب لكن ماابي اسمع لي كلام وتصير فضيحه او انه يتصرف معاي كانه مستغني عنه وامه تكفي وتوفي واجلس وضايق صدري ومتوتره واهو ولاهمه اهم شي الشغل كامل . تجيني الام في بطني وزايده هالايام ب مكان العمليه لاني اولد قيصري واذا قلت له احسه يغير الموضوع او يمشي عني وانا اتكلم.
ادرس في الجامعه سنه ثالثه اتمنى اخلص دراستي مأجله سنتين بسبب ظروفي ومشاكلي معاه وهالشي زايد الطين بله
محتاجه وقت لنفسي اذاكر فيه احل واجباتي
من ارجع من الجامعه وانا انظف واطبخ وفوق كذا مقصره عنده مدري وش يبي
احس خلاص واصله معاي ابي اهج من بيت اهله
ابي خصوصيتي ابي دولاب ارتب فيه ملابسي لان ماعندي والسبب ماله مكان ملابسي وملابسه اطويهم واحطهم بسله من 8 سنوات لليوم
ابي استقر ابي اعزم اهلي ابي مكان خاص فيني ابي اطلع بدون ماناس يحققون معاي على وين؟ ومن وين جايين؟
ابي لاصارت مشكله بينا ماحد يدري ماحد يشوشه علي مايتركني ويروح ينام عند امه زي البيبي
اخوانه عايشين معانا بالبيت اخوه الكبير
متزوج وعنده اطفال وشقته ماشاء الله كبيره والثاني اكبر منه بعد عايش في ايجار والثالث مو متزوج يدرس في امريكا وثنتين من خواته متزوجات وساكنين في عماره اللي جنبنا وكل يوم عند امهم
يعني امه مو لوحدها مستغربه ليش زوجي مو متقبل فكره الطلعه بشقه ايجار
ومن افتح الموضوع يصرخ ويسب وكأني غلطانه عليه والمكان مايأهل للسكن ومافي مجال نوسع
معاملته لي متاأثره بعيشتي مع اهله يحب ينفش ريشه قدامهم ويبين ان هو الامر الناهي وكل ماعلا صوته اكثر كل ماكان رجال وصاحب حق
جربته بسفر سافرنا لوحدنا أسبوع لو تزاعلنا او صار سوء تفاهم بعدها بشوي يجي يكلمني ويحاول يحل الموضوع لكن هنا من يسمعون صوته يصرخ او يعرفون ان فيه مشكله كبروها امه تدق على جواله تقوله انزل بسرعه واخوه يدق الباب وينزل لهم ومايرجع الا الفجر واوقات مااشوفه ينام عندهم مره من المرات بعد مشكله بسيطه انا قلت له عط بنتك مصروف للمدرسه واهو مو موافق يقول عطيها فطور من البيت وقام يصرخ علي ويبهذلني انتي غبيه وانتي مخك قافل لو افطرت البنت في البيت ماتحتاج مصروف وووو....المهم دقوا عليه ومن راح ماشفته جات الفجر دقيت عليه لين ماتعبت مطفي جواله نزلت اسأل عنه عند امه ماعطتني وجه تسوي نفسها مشغوله وبعدين قالت لي نايم ومسكر الباب عليه وكان يوم جمعه قلت لها طيب بدق الباب عليه محتاجه شي ضروري ودقيت الباب لحد ماتعبت
في الاخير طلعت الغرفه فاضيه وزوجي مسافر دولة قريبه منا يعني مشوار ساعه وانا عارفه ان اهله هم اللي دخلو في راسه السفر واوقات ادق على تلفونهم الثابت اذا طول الزعله وترد امه تقولي يسبح او نايم والكذابه تتكلم واهو جالس جنبها
يمكن تقولون لي لاتدقين عليه اذا راح انا مو كل مره ادق عليه انا ذكرت بعض المرات اللي دقيت عليه فيهم لاني اكون محتاجه بامبرز لولدي مثلااو حاجه ضروريه واهو طالع من 8ساعات او حتى يوم كامل واضطر ادق عليه
وش الحل اهلي في بداية حياتنا دخلتهم ومااستفدت شي صار يقولهم بنتكم طفله بنتكم مراهقه انا اللي صابر عليها ماحترم حتى ابوي وامي ياما سبها وغلط عليها اذا فتحت معاه الموضوع ان لازم تحترمها ولاتدخل اهلك بالمشاكل فيروح يصرخ على امي ويكلمها كلام ماينقال الحين اهلي من 5 سنوات برا الموضوع
والمراهقه كبرت وكل شي صار واضح اهو تربيته غلط ومبين هالشي من كلام امه وتصرفاتها ونصايحها له ولخوانه وعيشتي في وسط هالبيت ضارتني اكثر
اذا في حل ساعدوني بنصايحكم..
اداره نزلوا موضوعي :jwlh::jwlh:




المصدر...