رد: د: @@## يوميات .........تلبيس إبليس ##@@
 
الحلقة السادسة
جاء آخر أيام الاسبوع ومنى ما زالت في غفلتها ذهبت للجامعة كالعادة وقابلت صديقاتها وجلسن في الكلية يتحدثن ويستمعن إلى الاغاني
دينا : شوفتي حلقة امبارح في المسلسل التركي كانت جامدة
منى : اه ديه كانت تحفة
ندى : بس يا ترى حيحصل ايه انهاردة بقى
رنا : انتو تافهيين حد يتابع المسلسلات التركي ديه ....ديه بتعقد اصلا
دعاء: يا سلام يعني انتي مش بتتفرجي
رنا : لا بتفرج طبعا عشان اتعقد انا بغلس عليكوا بس ههههههههههههههه
ضحك الجميع ثم قالت ندى لدعاء: يا بنتي ما تغيري الأغنية ديه بقى ديه رابع مرة تسمعيها
دعاء: اصلها عاجباني اوي ومش حسيبها الا اما احفظها
الشيطان : احفظيها احفظيها ما هو ده القرآن بتاعي اوعي تحفظي حاجة تانية خليكي انتي كده تماااااااااام
ندى : على ايه ديه حتى نكد
دعاء: اسكتي انتي ايه فهمك انتي
( في هذا الوقت مرت أميرة من أمام الشلة ولكنها وجدتهم مندمجين في سماع الأغاني وقد علت اصواتهم بالضحك فلم تشأ الجلوس معهم ولكن رأتها رنا فنادتها :بسسسس بسسس أميرة ...أميرة
الشيطان : لا لا لا بلاش تناديها انا بكرهها ومش بطيقها
سمعتها أميرة فشعرت بالاحراج وذهبت اليهم
أميرة : السلام عليكم
الشلة في صوت واحد : وعليكم السلام
قالت رنا : ايه يا بنتي مش عايزة تسلمي علينا وللا ايه
قالت أميرة في إحراج : لا أبدا بس انتوا عارفين اني مش بحب اقف مع حد بيسمع اغاني
قالت دينا في عند : ومالها الأغاني عادي
قالت أميرة : لا طبعا مش عادي ديه حرام انا الحمد لله بطلتها ومش عايزة ارجعلها تاني
الشيطان : انا خلاص حيجرالي حاجة بكرهههههههههههههها
قالت ندى : ماشي يا ست الشيخة
قالت أميرة : هو انا يعني لما اقولكو حاجة صح تتريقو
قالت دعاء: بس يعني عادي طالما بنسمعها في وقت ما فيهوش عبادة زي الصلاة مثلا خلاص عادي
الشيطان: هو ده الكلام
منى: انتي تعرفي انا اصلا ليا كام اغنية كده ما ينفعش انام ابدا غير لما اسمعهم وبنام عليهم اصلا
قالت اميرة وهي تحاول ان تتظاهر بالمزاح: يعني بدل اذكار قبل النوم يعني
الشيطان : مشوها من هنا حتبوظلي دمااغ البت
منى وهي تحاول ان تداري احراجها : لا ما انا ساعات بقول ايه الكرسي والمعوذتين قبل ما انام بس عادي زي ما قالت دعاء لو مش في وقت عبادة خلاص وبعدين انا سمعت ان الاحاديث اللي في الموضوع ده كلها ضعيفة
أميرة : طيب انا حسألك سؤال وانتي تردي بنفسك يوم القيامة تفتكري الأغاني حتكون مع الحق وللا الباطل .... بلاش كده سؤال تاني وانتي اللي تجاوبيه بنفسك تحبي اخر حاجة تموتي عليها وانتي بتسمعي اغاني او بتندني بأغنية تحبي اخر حاجة تقابلي بيها ربنا وبدل ما تنطقي الشهادة تنطقي كلمات اغنية ؟؟؟؟
منى بخوف واحراج : لا طبعا
قالت أميرة : لييييييييه مش هي مش حرام وعادي والاحاديث اللي فيها ضعيفة لو هي مش حرام بقى ممكن تسمعيها عادي وممكن برضه تموتي وانتي بتسمعيها واكيد طبعا مش حتتضايقى لما ملك الموت يجيلك وانتي بتدندني بكلمات أغنية ما هي مش حراااااااااااام ولا ايه ؟؟؟
صمتت الشلة ولم يعرف احد بماذا يجيب
الشيطان : انا قولت البت ديه حتموتني انتي ايه اللي جابك اصلا بس انا برضه حخليهم ما يبطلوش اغاني ما هو لو انا خليتهم ما يبطلوش بعد الكلام ده حيبقى عذابهم اكبر لان الكلام ده حيكون حجة عليهم يوم القيامة لان ديه تذكرة ليهم بس انا حخليهم ولا كأنهم سمعوا حاجة
قالت منى في نفسها : انا ...انا فعلا ممكن اموت وانا بسمعها انا ساعتها حقول لربنا ايه
الشيطان موسوسا : وانتي ايه اللي حيموتك دلوقتي انتي لسه صغيرة عيشي حياتك
منى في نفسها : وهو الموت ليه سن فاكرة قريبتك اللي ماتت وهي لسه ما كملتش عشرين سنة وللا الاطفال الصغيرة اللي بتموت كل يوم وللا الناس اللي بتبقى سليمة وفجأة يجيلها مرض انا ممكن اموت في اي لحظة انا ...... انا لازم ابطل اغاني
الشيطان موسوسا : بس ازاي تسيبي الاغاني ده انتي لسه ما خلصتيش الالبوم الجديد اللي نزل امبارح
منى في نفسها ما فيش بس : انا لازم ابطلها يعني لازم ابطلها وحدعي ربنا يساعدني...يا رب خد بايدي وما تسبنيش لنفسي يا رب انا عارفة اني بعيدة عندك وخلفت وعود كتير وعدتهالك بس انت عارف اني مش وحشة اوي يا رب بلاش اموت وانا بعمل معصية خد بايدي يا رب
الشيطان ويكاد ان يصاب بالجنون : لا لا لالالا شغل سنين حتيجي البت ده تضيعهولي في يوم هو شيطانها مش قادر عليها وللا ايه انتي ايه اللي جابك هو اليوم باين من اوله ديه حتى انهاردة صلت الصبح بعد ما كان بقالها كام يوم مش بتصليه انا كنت متشائم من الاول بس انا اكيد ليه طريقة
رنا : ايه الصمت الرهيب ده يا بنات ساكتين ليه
دينا بلهجة ذات معزى : حنقول ايه يعني انا نفسي اتسدت ويومي قفل اصلا ما كنا مرتاحين
أميرة وقد احمر وجهها من شدة الاحراج ولكنها تمالكت نفسها وقالت بثقة : عمر ما كانت الراحة في معصية الله ولا في البعد عنه وعلى العموم انا اسفة اني قفلتلك يومك بعد اذنكوا
وانصرفت اميرة فقالت منى لدينا : على فكره كده ما يصحش اهي زعلت
رنا : ايوه ايه قلة الذوق ديه
لم ترد دينا وكأنها لم تسمع
منى: انا حروح وراها اصالحها ....واسرعت منى في مشيتها لتلحق بأميرة
ونادتها منى : اميرة .... استني يا بنتي ما تزعليش منها انتي عارفة دينا دبش
أميرة : لا عادي انا اي نعم اتضايقت شوية بس الكلام ده بيحسسني اني صح والحمد لله
منى : انتي عندك حق في كل كلمة قولتيها بالله عليكي ادعيلي ربنا ياخد بايدي ويهديني
أميرة : حدعيلك يا منى بس انتي حاولي ما تستسلميش لشيطانك حتتعبي شوية بس بعد كده لما تقربي من ربنا حترتاحي اوي
منى : ان شاء الله
الشيطان : ايه ده هي بتتكلم جد وللا ايه لااااااااااا احنا فينا من كده انا لازم اتصرف بسرعة
انتهى اليوم الدراسي وعادت منى الى المنزل بهمة عالية وهي مصممة على ترك الاغاني
دخلت منى حجرتها وفتحت جهاز الكمبيوتر الخاص بها وحذفت جميع الاغاني وقامت وتوضأت وصلت صلاة الظهر واخذت تدعي ربها ان يعينها على الطاعة كانت تدعي بصدق فأعاذها ربها من الشيطان فلم يستطيع ان يقترب منها ....
وفي اليوم التالي يوم الجمعة استيقظت منى ولأول مرة منذ فترة طوييييييييلة لصلاة الفجر وأخذت تدعي ربها أن يرشدها إلى طريق الطاعة ... والشيطان يكاد أن يصاب بالجنون ......
أنهت منى صلاتها ثم ذهبت لتشغيل جهاز الكمبيوتر وفتحت إحدى مواقع التواصل الاجتماعي فوجدت على صفحتها "قال صلى الله عليه وسلم : ( من قرأ سورة ( الكهف ) في يوم الجمعة أضاء له من النور ما بين الجمعتين) .....أوصيكم ونفسي بقرأة سورة الكهف "
قالت منى في نفسها : ديه رسالة ليا من ربنا أنا لازم أقراها انا بقالي كتير اوي ما قريتهاش
الشيطان موسوسا : طيب ماشي بس اقريها بعد ما تصلي الظهر كده ولا اقولك بعد العصر عشان انتي وراكي مذاكرة كتييييييييير انهاردة انتي ناسية ان عندك امتحان بعد يومين
منى في نفسها : بس............. طيب خلاص حقراها بعد العصر وكمان عايزة انجز في المذاكرة عشان رايحة لخالتو انهاردة
ما زالت منى غير متنبهة الى ان هناك عدوا يريد ان يمنع عنها الخير .... جلست منى تذاكر وتذاكر وأدت صلاة الظهر ثم العصر ولكن الشيطان أنساها قراءة سورة الكهف ..... ثم حان وقت ذهابها إلى خالتها وكالعادة وهي ترتدي ثيابها تذكرت السورة فقالت في نفسها : استغفر الله العظيم بقى .. انا كان لازم اقراها الصبح ... خلاص انا حقراها دلوقتي
الشيطان موسوسا : طب انتي كده حتتاخري يعني صليها لما ترجعي انتي كده كده مش حتتاخري يعني (انتي عايزة تاخدي ثوابها وتقهريني ولا ايه انسي )
منى في استسلام : خلاص لما اجي عشان ما اتاخرش
ذهبت منى الى بيت خالتها وكان هناك ايضا بعض اقاربها ... قضت معهم وقتا ليس بالقليل ثم استـاذنت للانصرف هي واحدى قريباتها وركبا سويا سيارة أجرة ...و بعد مدة شعرت منى وكأنما طعنت بخنجر في قلبها من الخوف .... وشعرت برأسها يدور ولم تتمالك عبرة سقطت من عينيها .......
ما الذي حدث ؟؟؟؟؟ وهل ستتخذ خطوة إيجابية في طريق التزامها ؟؟؟؟ وهل ستتنبه إلى وجود هذا العدو اللعين ؟؟؟؟ تابعوا الحلقة القادمة.......
ايه رايكم في الحلقة يا بنات
|