زوجي يشك فيني
 
زوجي يشك فيني
السلام عليكم ورحمة الله
مشكلتي الي ماقدرت اسكت عنها ولا توقعت بيوم اني بنحط بهذا الموقف
فالبدايه بتكلم عن شخصيتي وشخصية زوجي انا عمري 26 خريجة طب
الحمدلله ناجحه بحياتي ومرضيه والديني طبعي عقلانيه بزياده وهذا بشهادة الجميع الحمدلله
واغلب اقاربي واهلي يستشيروني بمشاكلهم ويثقون برايي حتى تعاملي مع زوجي احاول قد ما اقدر
اني ارضيه وما انقص عليه شي وابي اعيش معه حياه بالمستوى الي انا ابيه من حيث التفاهم
ولا انقص عليه من حقوقه شي وهو ماينقص علي شي من ناحية البيت ونظافته والطبخ وحتى اهتمامي
بنفسي اما زوجي عكس كذا تماما اهم ماعليه نفسه والتعامل عنده صفر لدرجة انطرد من وضيفته بسبب اسلوبه يحس انه المفروض الناس كلها تمشي على كيفه هو وهذا الشي مطبقه معي انا بعد يبيني على مزاجه
مثلاً احيانا يكون نايم وانا لازم اصحيه لدوامه اجهز له قهوه وحلا واجي اصحيه بهدوء بطريقه الي يحبها
عشان يقوم مروق بس قام وقعد بعدين طالع فيني ويرفع صوته علي يقول قومي طفي المكيف انا انصدمت
مدري ايش الغلط الي سويته يخليه يرفع صوته علي على انه هو الي طلب مني اصحيه بهذا الوقت كثر خيري بعد جيته با اسلوب كويس عشان مايقوم متنكد انقهرت على نفسي اني عاملته كذا حسيت اني ذليت نفسي
وانا والله طبعي ما انشب له بالعكس اخليه براحته لين يجي هو يسولف معي حتى احيان يطلب مني اجلس اسولف معه يعني ماني لازقه فيه عشان يتنرفز علي كذا
المهم يوم طلعو خواتي شاليه قلت له خواتي طالعين ابي اروح معهم فالبدايه قال لا وبالعافيه وافق طبعاً كالعاده
مستحيل يوافق على طول وحنا بالطريق يسمعني كلام يغث وانه مو مجبور يوديني ويحلف انها اخر مره يوديني انا مقهوره وساكته مو اول مره اي مشوار يوديني له بعد ماينشف ريقي يسمعني كلام يغث لين انزل وانا ابكي احياناً من القهر لاني احسه يظلمني انا مو مقصره عليه بشي وهو مقصر بكل شي ماعمره طلعني من نفسه واذا طلعني ذلني فلوس مايعطيني الا بعد ما اطلبه واكون فعلاً محتاجه ويعطيني شي مايكفي
المهم بعد ماوصلنا الشاليه قال هذا كله شباب وين بتنزلين انتي طبعاً هو يشوف السيارات الي واقفه عند الباب لانه اكثر من شاليه وكلهم عوايل انا استغربت من كلامه قلت اكيد سيارات الناس الي حولنا مو مستوعبه انه شاك فيني وقعد يسأل الحارس يقوله من فيه داخل هذا الشاليه فيه رجال ولا حريم الحارس قال ايوه فيه ناس قلت خير مانك مصدق تعال انزل شوف بنفسك وسكت ونزلني بعد ربع ساعه ارسل لي في سياره عندكم لمين وكانت سيارة اخواني انا انهبلت يعني بتكون سيارة مين قال اي انتي قلتي خواتي وانا اشوف سياره داخل يعني فيه رجال انقهرت وبكيت لما رجعنا البيت مسوي نفسه زعلان ورايح ينام برا سألته وش تقصد بسؤال انا ابيك بس تقول وش تقصد عشان اعرف اتصرف انا عمره ما احد شك فيني تجي انت تشك فيني وش شايف علي المشكله انا توني مشفته قبل شهر محادثات مع بنات واعتذر مني وحذف كل شي وسامحته
بس توصل فيه يشك فيني ماني مستوعبه الحين بعد 3 سنين زواج احس اني ارتبطت بالشخص الغلط مايعرف قيمتي ولا يقدر الي اسويه له انا متأكده اني مرضيته من جميع النواحي بس هو ولا يفكر حتى باخر مشكله لما كشفت خيانته كان يقولي انا ما استاهلك ولا عرفت قيمتك وصدقيني بتغير وبتشوفين بنفسي بس للاسف انسان فاشل بالوضيفه حياته كلها نوم وضعه المادي تعبان اخلاقه على حسب مزاجه ويعتبر اني انا مالي اي حقوق بس واجبي اطبخ وانظف حتى اسلوب وتعامل صفرر وشايف نفسه على ولا شي
جدياً افكر بالطلاق احس مافي رجاء اخلاق زفت خيانه واخر شي يشك فيني
احتاج رايكم والله يجزاكم خير الجزاء
المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين
.,[d da; tdkd
المصدر...اثبت وجودك
..
تقرأ وترحل شارك معنا برد أو بموضوع
|