انا ربي بلاني بأخت خبيثة لدرجة ماتتخيلونها ..
هي اصغر مني ولسانها طويل والله ماتتخيلو كيف اعاني منها .. دائما تسوي مشاكل بيني وبين امي وتنقل لها كلام عني وتحط فوقه ملح وبهارات وتنقل الكلام بطريقة خبيثة ..
يعني تخيلو تسولف معي وتضحك وتسحب كلام وبعدين تروح تنقله بأسلوب ثاني.. واكره شي عندها تشوف امي راضية عني او تمدحني والله تطلع كل شياطينها وماترتاح لين تخرب ..
وامي تحبها وماتسمع فيها بحكم انها آخر العنقود وتوصل مع امي ايام ماتكلمني بسببها او تاخذ بخاطرها مني ..انا همي اني ارضي امي واتعب نفسي واشتغل واكرف عشان تكون راضية عني وتجي اختي السوسة بكلمة وحدة تقلب راس امي علي وتخلي امي تجحد كل شي سويته ..
حاولت اكسب امي واجلس معها كثير وافاتحها بس مافيه فايدة لان مهما قلت لها ومهما سويت لها تجي اختي بكلمة منها تغير كل شي .. واختي هذي ام وجهين تجي تجلس معي او مع اي احد وتسولف وتضحك واول ما تطلع تستلمه حش..
والله ما انسى موقف حصل معها كنا جالسين نتقهوى ونسولف ونضحك ونتناقش في موضوع بعدين قمت عندي شغل ورجعت باخذ شاحن جوالي واسمعها تتكلم علي والله تقولون تتكلم على يهودية مو على اختها ودخلت اخذت شاحني وطالعتها وهي فهمت من وجهي اني سمعتها وبدل ماتتأسف او تبرر قلبت علي وقاطعتني كم يوم .. وعلى فكرة هي كذا مع كل خواتي بس خواتي متزوجات وموب دايم عندنا وانا الوحيدة الي تستفرد فيني وتشمت فيني بحكم وضعي الاجتماعي وبحكم اني مطلقة ..
والله دايم امسك نفسي ما ادعي عليها وادعي ربي يزوجها واحد في مدينة ثانية ويفكني من شرها ..
ومن كثر ماتشمت فيني وترمي كلام علي سبحان الله كل موضوع خطبة يحصل يتفركش ووالله اني ازعل واتضايق وابكي لاني اتمنى لها الخير تبقى في النهاية اختي
وماجيت هنا اكتب لكم الا بعد ماضاقت فيني وكثرت تصرفاتها الفترة الاخيرة لدرجة والله صرت اعزل نفسي عن اهلي بسببها

اعتذر عالاطالة بس متضايقة واحتجت اني افضفض




المصدر...