احس بمشاعر سلبية جدا جدا تجاه زوجي
لدرجة اتمنى افقده وأحيانا أدعي عليه
تزوجنا قبل ست سنين عمرنا بآخر العشرين وعندنا طفلين
انا شخصيتي مو كذا
نيتي صافية تجاه جميع البشر
عمري بحياتي كلها والله ما تمنيت لشخص غير الخير
لكن مع زوجي....!
حرمني الحياة حرمني اترزق ربي
أحيانا أحس أني عايشة عشان اخدمه وأربي اطفالنا وبس
حرمني الوظيفة مع ان تخصصي مطلوب وجميع من تخرجو معي الآن موظفات
وحرمني افتح لي مشروع طبخ مع اني ماهرة فيه ماشاءالله (متفشل من الشغلة)
ومع ذلك إذا طلبته شي يرفض
ومستحيل يعطيني ريال واحد بدون اترجاه
عايشين بقرية نائية بكل ما تعنيه الكلمة من معنى
والمرة الوحيدة اللي قابلت فيها صديقتي وطلبته يوديني نكد علي وطلعها من عيوني لدرجة كرهت الطلعة
وبعد كم شهر ذكرني فيها يبي يذلني تراني طلعتك ذاك اليوم يعني متفضّل علي!! هههه!!
يحطمني بشكلي كثييير وباين انه غير راضي عني من جميع النواحي ، ما بقول إني مثالية وكاملة لكني عادية ومعتدلة من ناحية الشكل والاهتمام وكل شي
ومخليته براحته يطلع يروح ويجي مااسأله عن شي الا اذا هو تكلم وسولف
من عرفته وهو يمارس العادة ويحسبني ماادري ادخل عليه فجأة القاه مرتبك ومعه الجوال وادلة كثيرة هههه مادري يحسبني غبية ولا ايش
يحب يمارس العادة ولا انه ينام معي
وبالأخير طقت كبدي وطفح الكيل دخلت عليه وهو منهمك بالموضوع أعلاه^
قلتها له بكل صراحة وبالحرف الواحد
أنا لي ست سنين عارفة وساكتة
لكن صبري نفذ عف نفسك بالحلال يا فلان
أنا موب عاجبتك تزوج واجد البنات بتلقى اللي مالقيته فيني ، لأن على حالك هذا عمرنا ما بنتوفق وانت تارك فراش الحلال وتدور الحرام بجوالك
رده؟
مدامك شايفة شي غلط علي ليش ما تكلمتي من زمان؟
يحسبني بربيه بعد هالعمر
ويحسبني بصدق انه بيتوب وبيستحي من ربه ثم مني!
مازال مستمر على حاله بكل وقاحة وقواة عين بس صار يحرص أكثر
مع العلم كل اللي قلته ما يبرر لأهلي اني اتطلق
وبصراحة ومع الاطفال مستحيل احرمهم من أبوهم مستحيل أيتمهم وهو عايش
بس أبي حل ماابي اكرهه أبي أتأقلم مع كل ما ذكرته
ما أبي أدعي عليه وربي
كيف اتغاضى عن بخله
واتقبل تحطيمه
واسكت عن خياناته الافتراضية
وأرضى أعيش حياته وأنا ع الهامش
باختصااارر كيف اتأقلم مع الكبت؟؟




المصدر...