السلام عليكم،
اخواني اخواتي، الحمدلله انا مو واقعه في مشكله حقيقة
لكن في شي مضايقني حيييل ما ادري انا مكبرة الموضوع و الا؟

اخوي يحب يجمع إلكترونيات و احنا البنات اذا بنبيع جوال نبيعه عليه، ع أساس انه من العائلة و ما نخاف ان نبيع الجوال له، اقصد ما نخاف على صورنا الشخصية.

المهم انا كان عندي جوال قديييم حق ايام الثانوي، ذيك الايام كنت متصاحبة على صحبات سيئات و كانت علاقتي مع وحدة فيهن بزيادة خلينا نقول ان اسمها س، من بعد الثانوي قطعتهن كلهن، الا س متواصلة معاها بشكل متقطع، و حاولت اني أتخلص منها نهائي لكن ما حبيت اكون نذلة، وخصوصا ان كلنا تصلحنا و تركنا خبال الثانوي. ف من باب العشرة نسال عن بعض كل كم شهر.

المهم اني قبل ما أبيع جوالي هذا ع اخوي مسحت كل الأشياء السيئة فيه، الأشياء هذا سيئة بكل معنى الكلمة.
لو بيدي امسحها من راسي حتى، مو متخيلة اني كنت من هذا الإنسانة، اقرف لما تجيني هذا الذكريات.

الزبدة اخوي ذا قبل فترة جلس يرسل لنا ع القروب فيدوهات و صور قديمة لنا مضحكة. و قال كلام بمزح في مجملة انه لقى فضائح بس مو حاب يرسلها.

اليوم الثاني جيت بيت اهلي و كان موجود هو، سال كيفك و و زوجك و. و لين فالآخر قال بابتسامة مش لطيفة كيف حال فلانة!!! متوصلة معاها؟ (هذي البنت اللي س اللي ذكرتها فوق) صدمني
قلت طيبة، نتواصل بين فترة و فترة. و سكتنا،
اهلي كانوا يعرفونها و دايم يسألوني عنها لكن بعد ما قطعتها، كنت معصبة مره و قلت بيوم (لا احد يسألني عنها)
.

و بعد مره، كنّا نتناقش باسم بنت اختي و انا اقترحت اسم نفس اسم س، طبعا مو عشانها بس اسمها حلو ف قلته و الا هي و الله و لا كانت ع البال، قام هو قال اي مثل اسم صاحبتك هذيك!


لما قال كذا الكل أنصدم لان انا قطعت سيرتها بشكل نهائي من سنين


من هنا فهمت كلامه ع القروب. و فهمت انه الأشياء ما انمسحت من جوالي. لان غشيمة بامور الجوالات.
متضايقة حيل انه عرف،
احس كان احد كشف ستري اعوذ بالله.

اخوي جدا طيب و ما اعتقد انه كان يحاول يفتش، بس قهرني والله، احسه هدم كل محاولاتي أني إنسى الماضي. ما اتمنى اي احد يشوف هذي الخصوصيات.

سوالي هل المفترض اني اطلب جوالي من اخوي؟ مع ان كان بيننا بيع و شراء؟ او كذا افتح عيونه اكثر. هل ابين له امتعاضي من اللي سواه؟ او اسكت؟

لو لمح مره ثانية. هل أوقف له وقفة جدية؟؟ و اعصبب؟




المصدر...