السلام عليكم


انا مشكلتي مشكله اللي اهياا
انخطبت خطبة تقليديه زواج اقارب وتمت الملكه ومافيه بيني وبين خطيبي اي تواصل بحكم العادات والتقاليد استمرت ملكتنا فترة طويله بسبب ضروف خاصه بوقتنا صرت اراقب خطيبي في البرامج بالانستقرام بس كنت الاحظ عليه يضيف حسابات مو كويسه وبنات واحيانا حسابات اباحيه استغربت لاني كنت اخذه عنه فكرة غيير والمشكله ضايف اخوانه معاه بعدهاا لعب فيني الشيطان وسويت حساب حبيت اختبره وانتم عارفين حركات البنات مادري ليش نجيب لانفسنا وجع الراس بس بلحظتها كنت مقهووووووورهه منه كل يوم يضيف حساب بنت حسيته مشفوح على البنات المهم سويت الحساب واضفته وهو ماقصر جاني من حساب ثاني واظافني طلع الاخ عنده حسابين بدال الحساب واحد رسمي والثاني اباحي يضيف بنات من نفس مدينته ونصهم جادات ويطلعون بفلوس صراحه خفت عليه وعلى نفسي اكثر وارسلي عالخاص والاخ جاد وارسل رقمه وصورته ويحدد الوقت بعد ماتحملت اللي صار وانهرت وبلغت اخوي في الموضوع واخوي واجهه وهو انكر الموضوع وانا بلحظتها كرهته مووووووووت تمنيت افركش الزواج لاني استقرفت منه ماتوقعته كذا
اللي صار تزوجنا بس بعد فترة طويله وهو حاطط براسه اني مو مصدقه الموقف وانه مافيه ادله عليه بعد ماواجهه اخوي هو انكر ويحاول يغطي على نفسه على انه كل شي يدل على انه هو عدت السالفه وحسيته متغير كثيرررررر من كلام اخواني انه ندمان وزاد اهتمامه فيني وخايف افركش الزواج
و انا بعد صدمتي فيه صرت ماطق خبر ولا تهمني اخباره حسيت فيني تبلد وصرت اضيف شباب بالانستا والسناب شات وتعرفت على شاب بس سوالف واضيع وقتي صرت حتى استغرب من نفسي معقوله الجرح يسوي فيني كذا لاني كنت مجروحه منه كثير وصرت اشغل وقتي ادري غلطانه بس مو بيدي مقهوره المهم الشاب استمر معاي فترة طويله واعرفه زين واعرف اهله لانه من نفس مدينتي محترم صراحه بس ماحبيته بعد ماقرب زواجي حذفته بس الطامة الكبيره انه ليلة دخلتي كان زوجي طاير فيني وخاق ومو مصدق انه تم الزواج وانا بداخلي مقهوووووررهه وحتى ماكنت مرتبكه وخايفه بس حاسه بغصصصصصه لاني مصدومه منه واخواني قالوا كل انسان يخطى وهو واضح ندمااااان قد شعر راسه المهم ليلة الزواج هو كان جالس يغازلني ويبوسني انا فجاءهه غلطت بالاسم ناديته باسم الشاب اللي كنت متعرفه عليه زوجي انصصصصصصدم وقام من السرير ويسالني مين فلان ؟؟؟؟؟
قلت اي فلان من زود الصدمه ماقدرت اتكلم قال انتي قلتي اسم مو اسمي انتي مغصوبه على مين فلان وصار يحقق
انا ماقدرت اتكلم

فجاءهه هو صار يبكي وانا سسساكته مندهشه حسيت اني جبت العيد بنفسي قلت انا قاصده اقول الاسم لاني حابه اشوف ردت فعلك وحابه اقهرك لانك قاهرني وصرت ابكي ليش تخوني وتقهرني واصرررررف توهقت

قال هذا مو عذر يعني تغلطين باسم رجال غيري عشان تقهريني قلت اي بقهرك لانك قاهرني ومو حاب تكون صريح معاي وانا عارفه انك كذبت على اخواني وانكرت المحادثات والحسابات وحتى رقمك وصورتك قال مو انا قلت الا انت بس مو حاب تقول قال انا الحين موضوعي عن الاسم اللي ناديتيني فيه ميييييييين ؟؟

قلت مافيه اسم ولا شي حبيت بس انرفزك حسيته اقتنع وبعدها صار يتاسف لي انه فهمني غلط ووووالخ

راحت السالفه بس مع الوقت حسيته مو كثير مقتنع لاني مو مهتمه فيه وصار يكرهه اسم الشاب اللي ناديته بالغلط واي شخص نفس اسم الشاب يكرهه واحيانا احسه صار يشك فيني ويغار واحيانا احسه يحبني موووت وواثق فيني
وانا صايره نفسه احبه وماعندي ثقه فيه ماتخيل حياتي بدونه بس مع كذا للحين قاهرني اذا جلست معاه انا اكون ماسكه جوالي هو يكون حاطط جواله بعيد عني عشان بس م امسكه وافتش فيه لانه للحين ينكر الحساب اقوله ابي اضيفك انستقرام ابيك تتابعني واتابعك كل صديقاتي ازواجهم معاهم الا انا يقولي البرامج هذي تافهه ومضيعه وقت وخراب بيوت والشخص اذا غلط مرهه خلاص يكبر عقله ومايرجع لنفس الغلط حسيته ندمان ومقهور ومو حاب يذكرني في الموضوع واحسه اصلا كرهه حسابه


المشكله اننا نحب بعض بس كل واحد مننا مقهور من الثاني او يحاول يقهر الثاني بالذات انا مو قادره انسى محادثاته وصوره ورقمه وهو مو قادر ينسي غلطتي باسم الشاب وبنفس الوقت مهتم فيني ويحبني شعورنا متناقضضضض
نفسي اكون واثقه فيه احط راسي على صدرهه وانا مو مقهوره منه وهو نفس الشي احيانا احسه يحب ينرفزني لان هو متنرفز مو فاهمه بس حاسه انه حياتي معاهه مو مستقره كثير وش الحل برايكم💔




المصدر...