السلام عليكم ورحمة الله وبركاته
انا متزوجه من 9 سنوات عمري 26 سنه وزوجي عمره 36 تزوجت وانا بثاني ثنوي وعلى طول حملت وجبت بنتي وبعدها بكم شهر حملت وكان حملي صعب نزيف وتنويم بالمستشفى زوجي بهالفتره كان قاسي علي توني طالعه من المستشفى وتوه موقف النزف يقولي الشقه غبرت نظفيها وانا ماحب الوساخه ويبغى كل شي مثالي* ومع الحركه يرجع لي النزيف ومارحمني لين ولدت بالثامن* وحطوا ولدي بالحضانه شهر
*وبعدها دخلت الجامعه وزاد انشغالي طفلين ودراسه وزوجي يبغى كل الوجبات وبينهم حلى وشاي وقهوه وفي ايام اختباراتي كان يسبب مشاكل يطلع لي كومه ملابس يبغاني اكويها كلها واذا قلت له مااقدر يصرخ ويسبني ويسب اهلي واهله يسمعون صراخه ويجون لنا* وبكل بساطه يقولهم رافضه تكوي ملابسي مع اني مارفضت قلت له اختار بنطلون وقميص مااقدر اكويهم كلهم* ونفس الشي مره سويت عشانا سندويتشات* وماشبع ونزل لاهله يتكلم علي وبعدها جات زوجة اخوه وجايبه قطعه كيك وصحن* صغير كشري وكاس عصير عشاء لنفر** وتقولي عطيه زوجك مسكين جوعان حده عرفت من تصرفها انه متكلم علي* ومشوه صورتي وغيرها من الحركات اللي تتعب القلب* خلصت جامعتي بنفسيه زفت وجهد ومكافحه تخرجت* العام الماضي وانا ام لاربعه اطفال لاتستغربون* زوجي رافض تنظيم الحمل ومن افتح الموضوع هددني بالطلاق واذا مو عاجبك انقلعي عند امك
*طبعا خلال دراستي عيالي امي الله يعطيها الصحه والعافيه كانت تمسكهم لي لين ماارجع من الدوام* اخذهم* واخوي يرجعني شقتي طبعا زوجي يوديهم الصباح لامي ولما تفتح امي الباب له* يكون بيت اهلي* مو مرتب ولا منظف ملابس مرميه بالارض واكياس شبسات وعصاير وصحون اكل وصاخه بالمختصر
صار زوجي لما يشوف ابسط** شي بشقتنا* حتى لو درج مفتوح* فاتحه الولد يقول كل واحد يرجع لاصله !
او كل واحد على ماتربى عليه


والله اني انجرح وادموعي تنزل* طيب اذا اهلي كذا انا وش ذنبي* كانت غرفتي انظف غرفة في بيت اهلي* وريحتها شموع وعطر
ومن اخذني 9 سنوات وانا قايمه بكل شي طبخ غسيل تنظيف* بيتي دايما نظيف وبخور وعطور* ماانام لين مااحط كل شي بمكانه لكن مهما الشخص يكون حريص الا ما الاطفال يحوسون البيت
*مهتمه فيه وباولادي واولادي* الله شاهد* اذا شافوهم اهله* يسألونه من وين ملابسهم وجزمهم وعطرهم وطبعا اغلب شي انا اشتري لهم من فلوسي (مكافأت الجامعه جمعت منها مبلغ 30 الف) لان ابوهم مايحب يصرف على اشياء فاضيه حسب كلامه
*من فتره سلفتي متهاوشه مع زوجها تقوله شوف لبس عيال اخوك كله ماركات وشوف لبس عيالك* على بالها ان زوجي هو اللي يشتري
وفوق كذا* يتصيد علي اذا شاف ابسط شي الطفل* اكل شكلاته ووسخ ملابسه ولا رامي* العابه قال من وين متعلم* بيت جدك علموك !!!
ولما الولد يدخل البيت بجزمته وطبعا انا انبهه يفسخها عند الباب لكن ساعات يدخل بدون مايفسخها فعلى طول* زوجي من وين متعلم ماحد علمه غير اهلك لان ابوي يدخل البيت بجزمته* وزوجي يشوفه وعلق اكثر من مره يقولي* ابوك يمشي ع الفرش بنعال الشارع طيب انا وش ذنبي اروح اعلم ابوي واهو بو60 سنه
وامس كنت تعبانه من الدوره الشهريه الم لايطاق وقلت له بروح انام تعبانه قالي لا انتظري الملابس ينشفون وصفطيهم قلت له بكره اصفطهم اليووم مااقدر صار يصرخ ويقول اهلك بلشوني فيك وحده ماتعرف الاولويه ولا تعرف تحافظ ع النظافه اصلا انتو هذا نظامكم تحبون الوساخه وماتتضايقون منها واولادي تعلموا منكم
طيب وش دخل اهلي والله كل يوم يجيب سيرتهم** كلمته قلت له لاتتكلم عن اهلي اسلوبك يضايقني عيب مفروض تحترمهم لكن مافاد معه* وعايرته باهله بان بيتهم كل حشرات ذباب ونمل وحوشهم كله وزغ وفيران* وعيال اخوانه وخواته* دايم بالشارع رامينهم* اهلهم والله ماكان ودي اتكلم كذا لكن بغيته يحس.. واهلي* يوم اللي ازورهم اتعب وانا انظف بيتهم من الحمام للمطبخ والغرف وامي تتعذر باخواتي مايساعدونها وفعلا اخواتي انانيات يطلعون من غرفهم وقت الاكل بس ولو امي تقول لهم ساعدوني او غسلوا عني* وحده منهم تجلس باليومين ماتتغدى ولا تتعشى كانها تعاقب امي عشان قالت لها نظفي والثانيه عايشه بعالم المسلسلات التركيه والكوريه الغداء والعشاء تاكلهم فوق السرير وترمي مواعينها ع الطاوله لليوم الثاني والله بالساعتين والثلاث طول زيارتي انظف ماارجع شقتي الا مهدود حيلي والزياره اللي بعدها البيت يرجع كانه ماتنظف وش اسوي بزوجي شلون اغير نظرته عني والمشكله تجيني ضيقه لما يتكلم عن اهلي وخاصه انه الشي يفشل .




المصدر...