السلام عليكم

ابحاول اقول قصتي وأتمنى تعطوني رأيكم ومشورتكم.

انا تزوجت بنت عمي على الطريقة التقليدية (باختيار الاهل). صار لنا قرابة 9 سنوات متزوجين. حاليا انا عمري 32 وزوجتي 27 سنه. انجبت منها طفلين. انعم الله علي بوظيفة مرموقة ذات مرتب عالي ولكن وظيفتي تستدعي ذهابي للعمل لفترات طويله تصل الى أسبوعين.

زواجنا كان مثل اي زواج فيه الأيام الحلوه مع وجود بعض الخلافات الصغيرة الطبيعية. اغلب المشاكل اللي تحصل بيننا هي بسبب كثرة ذهابها ونومها في بيت أهلها مما يسبب في بعض الإهمال في بيتها. خصوصا ان أمها اهي اللي تصر عليها بالقدوم وهي ماتقدر ترفض (أهلها ساكنين بمدينه تبعد ساعتين).

الثلاث سنوات الأخيرة صارت زوجتي تفكر تكمل دراستها بس المشكله الجامعه والتخصص الي ترغب فيه مش موجود في المدينة اللي ساكنين فيها فحاولت تقنعني انها تجلس في بيت أهلها الى ماتخلص دراستها الجامعية. انا رفضت لان الدراسة الجامعه قد تصل الى خمس سنوات. طبعا جاها احباط وصارت تلومني. باستمرار اني سبب في عدم إكمال دراستها وتقول لي اني عثره في طريقها الى الاستقلالية ونجاحها على مستواها الشخصي. بحكم طبيعة عملي كل كم شهر تذهب لبيت أهلها وتجلس عندهم أسبوع الى 10 ايّام. المشكله اذا راحت ماتحب ترجع بيتها واذا رجعت دايم تحسسني انها مغصوبه على رجوعها وعلاقتي معاها تكون متورتره. هالشي سبب بيننا تباعد على المستوى العاطفي والمشاكل بدأت تكون اكثر حدية و كل شخص يتمسك برأيه اكثر. رغم هذا ماكنت مقصر معاها وكنت دايم احاول اعوضها بالطلعات والسفرات الى اوروبا سنويا.

من حوالي سنه صارت تقضي اغلب وقتها على الجوال والسوشال ميديا. ودايم تحسسني انها ماعندها رغبه في الجماع او مش في المود. هالشي زاد التباعد بيننا اكثر وأكثر. طبعا انا كنت فاكر انها مرحلة وتعدي. بس للأسف طلعت غلطان. جا يوم كانت بالمطبخ تاركه جوالها قريب مني وجاتها رساله على احد برامج السوشل ميديا.لاحظت ان اسم المرسل رجل وكان يمزح معاها. شدني الفضول اني افتح جوالها واقرا المحادثة. اكتشفت انها علاقتهم صار لها شهر وصدمت بكمية المعلومات اللي يعرفونها عن بعض. تقريبا يعرف كل شي يخصني انا وزوجتي وأطفالي. طبعا انا جلست مع زوجتي وكلمتها وهددتها وقالت انها علاقة صداقة فقط. ووعدتني انها ماراح تكلمه مره ثانيه او اي شخص غيره. قلت لها اني راح أراقبها واشيك جوالها باستمرار. وقبلت بذلك.

طبعا مرت الأيام وحاولت انها تحسن العلاقة بيننا عشان أنسى الموضوع وما اكبّر السالفة. ولكن سرعان ماعادت الى نفس الوضع. بس أسوأ. صار الجوال دايم مايفاقها وتخبيه بجيبها. احيانا اجلس من النوم بنص الليل أشوفها على الجوال. ولما اسألها مين كانت تكلم يبان عليها الارتباك. شكيت انها رجعت لهالسوالف. وقررت اني اخذ جوالها واشيكه من دون علمها. (علما اني ما فتشت جوالها قبل كذا بالرغم اني اشترطت عليها هالشي عشان اسامحها اول مره)

شيكت الجوال وياليتني ماشيكته. محادثات مع عشرات الشباب. وضحك وقلة حياء. والطامة الكبرى انها عايشة قصة حب مع واحد منهم. تعبر له عن اشتياقها له وتقول له كلام عمرها ماقالته لي. انا طبعا انصدمت واشتعلت النيران داخلي. واجهتها وانهارت في البكاء وان استر عليها. قلت لها انك وعدتيني ماترجعين هالطريق ولكن خذلتيني وخذلتي أطفالك. اعترفت لي انها بالفترة الأخيرة ماتت جميع مشاعرها تجاهي وأنها مستمرة في الزواج عشان الأطفال اللي بيننا. ترجتني ما افضحها وأحل الموضوع ودي معاها سواء بالانفصال او غيره.

انا حاليا بالرغم من القهر والانكسار من ألم الخيانة. قلبي ماطاوعني افضحها. ابي أخذها لبيت أهلها وماني عارف ايش اقول لأبويها اذا رجعت بنتهم عندهم. اكثر شي معذبني في الموضوع هم اطفالي. مالهم ذنب حرام. الموضوع مسوي لي ازمه نفسية مالي نفس اكل ودايم افكر. للأسف ورغم الألم اللي سببته لي قلبي يبي يعطيها فرصة اخيره عشان أطفالي بس عقلي مو مطاوعني. خصوصا اني أشوفها تتعامل مع الموضوع بأنانية وعدم نضج بحيث انها بينت اي اكثر من مره انها مستعده تتخلى عن زوجها وأطفالها عشان تكمل دراستها وتشتغل وتصير حره على حسب تعبيرها.

ايش تنصحوني؟ هل فيه أمل في إصلاح ماتبقى بيننا عشان خاطر الأولاد؟ او الفراق افضل؟




المصدر...