تورتة الكيت كات من مطبخ مايا علي,حفلة نجاح بنتى كنزى 2015

تورتة الكيت كات من مطبخ مايا علي,حفلة نجاح بنتى كنزى 2015


السلام عليكم ورحمة الله وبركاته

ازيكم النهاردة يابنانيت
وحشتونى
زى ماقلتلكم انى بعد أول تجربة للتورتة عملت تانى والحمد لله ظبطت معايا ونالت اعجاب الموجودين:13:
تورتتى المرة دى هى تورتة الكيت كات أكيد شفتوها كتييييييييييير بالنت وكتير نفذوها وانبسطوا من النتيجة
ندخل في الموضوع علطول

التورتة المرة دى عملتلها كريمة جبنة وكريمة نوتيلا حتقولولى ايه التبذير ده حاقولكم الحاجات دى انتوا مش بتعملوها كل يوم وأكيد المناسبة بتبقى مميزة ومهما كانت التكلفة بتبقى نص تمن بره
نشوف الأول صورة للتورتة وكنزى بتقطعها
على فكرة دى كانت في حفلة نجاح بنوتى كنزى في نجاحها التيرم التانى في جونيور1 العام الماضي
وكنت عملت فيها تورتتين كل واحدة شكل وكب كيك من نفس شكل التورتة وسابليه وكرات كيك
رغاية أنا آخر حاجة:8:
شوفوا الصورة









دي كريمة الجبنة



ودى كريمة النوتيلا

طريقة كريمة الجبنة
كوب كريمة خفق
علبتين كيرى
كوبين أو 3 سكر بودر
2 ملعقة ك لبن
فانيلا
اخلطى كله بالعجان إلى أن تختفى المكونات جيدا

كريمة النوتيلا
230 جم سكر بودر
100 جم نوتيلا
ملعقة ص فانيلا
ملعقتين زبدة عشان تساعد على تماسك سور الكيت كات بالكيك جيدا

وطبعا حتجيبي 7 شوكولاتة كيت كات اللى هى بتبقى 4 ألواح مع بعض في كل واحدة
ونص كيلو شيكوبون و2 ام آند امز سودانى

حتعملى 2 كيكة بالطريقة العادية بتاعتك
طبعا حتعمليها من قبلها بليلة لو في الشتا خليها في جو الغرفة عادى وغطيها
لكن لو في الصيف ضعيها في التلاجة طول الليل
وحتقسمي كل واحدة لنصفين لما تطلعيها
حضري كل حاجة جنبك وقسمي ألواح الشوكولاتة وخلي بالك عشان ماتتكسرش واقسميها بإيدك بلاش السكينة زى ماعملت كنت يعنى عايزة شطلها مظبوط لكن بقت بتتكسر في ايدى وضاع من كتير للأسف
كسريها بإيدك عادى وحيطلع شكلها مظبوط
كده كل حاجة الشغل قدامك يالا نبتدى

حتحطي أول طبقة للكيك وتسقي بجليز الشوكولاتة وتحطي من كريمة الجبنة وحطى باقى الطبقات لحد ماتوصلي لآخر طبقة ودى حتحطى من كريمة النوتيلا وتغلفيها من الجوانب كمان كويس
وتجيبى ورق زبدة وامسحى بيها عالكريمة حتلاقيها مظبوطة ومتساوية تمام ولا اسباتيولا ولا غيره حتنجز معاكى بسرعة ودى تكة أخدتها من فيديو من موقع أجنبي وبصراحة ظبطت معايا تمام:13:
كده تورتتي جاهزة للزق سور الكيت كات الزقيهم وبعدين هاتى شريط ستان عريض ولفيه واربطيه فيونكة حطى بقى من فوق الشيكوبون ارميه جوا التورتة وحطى الإم آند إمز السودانى وبكده تورتتك جاهزة حطيها في التلاجة لو في جو الصيف من الصبح لمعاد حفلتك أما لو في الشتا حطيها ربع ساعة في التلاجة وطلعيها عادى لان التلاجة في الشتا بتخلى الحاجة ناشفة ويارب يجعل أيامكم كلها فرح:228:










مع تحياتى مايا علي:0451:




المصدر: منتدى عدلات

للوصول الينا ومتابعة كل جديد اكتبي بمحرك البحث (منتدى عـدلات) او (3dlat)



المصدر...