دار حماي سببولي المرض

دار حماي سببولي المرض

السلام عليكم ورحمة الله وبركاته
بدي ادخل بالموضوع على طول.. و بتمنى تعطوني آرائكم و تحكولي اللي بدي اعملو صح ولا غلط
يا اخوان انا متزوجة من سنة ونص.. ببداية زواجي كانت تصير تدخلات من قبل دار حماي بحياتي
بس كنت اسكت وما اعرف شو احكي انا عند اهلي متعودين ما نتدخل بحياة اخواني المتزوجين اطلاقاً واهلي من النوع اللي بفضل اللي بتزوج يسكن بمكان بعيد ومنفصل تجنباً للمشاكل.. لما سكنت جنب دار حماي تعبت نفسياً من التدخلات شبه اليومية.. انا الكنة الوحيدة اللي ساكنة عندهم بقية الكنات ساكنين بمدن بعيدة ما حدا بتدخل فيهم.. و.. و ولا وحدة فيهم رضيت تسكن قريب من دار حماي انا اضطريت لانو بيتنا عندهم.. بس ما توقعت هيك يصير لو يوم كان عندي شغل وما رحتلهم يا ويلي لو تأخرت بالروحة يا ويلي غير التمييز بيني وبين بقية الكنات.. وصارت مشاكل كبيرة بيني وبين زوجي لاجل هالموضوع و طلبت منو نسكن ببيت تاني مشان حياتنا تستقر.. ما رضي لأنو حماي حالتو الصحية مش مستقرة و عندو اكتر من جلطة و ما بقدر يمشي منيح.. ف سكتت و حاولت ارضى بالامر الواقع و خففت روحاتي مشان اسلم من التدخلات ولما حدا يتدخل بلتزم السكوت والصمت.. بعدين بفترة قد ما كبتت و ضغطت على اعصابي صار معي متل الحالة النفسية و رجع صار معي اختناقات و رحت الدكتور قلي معك حساسية شديدة بالانف والصدر و للاسف صار معي ثقب بالحجاب الحاجز من العصبية وكثرة البكاء والتعب.. الله وحده بعلم كم تألمت و كم عانيت بهالسبب وما حدا حاس.. راجعت مستشفيات واطباء وحتى شيوخ و اخر شي نصحوني اغير بيتي.. لاني تعبت وهلكت منو لما اطلع بترتاح نفسيتي ولما ارجع بتعقد كرهتو خلص حاسة حالي تحملت فوق طاقتي انا حاملة هم كل شي بصير كانت تمر علي اسابيع كاملة ما تنشف دمعتي من الخوف و الرعب ما بعرف شو مشكلتي بالزبط.. ولما ازورهم ما حدا يرضى يسلم علي لاني طولت وما زرتهم.. بينما باقي الكنات من الاسبوع للاسبوع لحتى يجوا وبستقبلوهم بالاحضان و الضحك انا ما حدا بعبرني.. و لما اشكي لزوجي ما بعرف شو يعمل احياناً بعصب وبقلي طنشي احياناً بقول انتي مزوديتها.. انا بدي اطلع من كل هالحياة اللي مرضتني و زوجي خايف من كلام الناس عن سبب خروجنا من البيت كان الناس بتعاني عني حكيتلو الناس بكل الاحوال رح تحكي.. واخر شي طلعولي دار حماي بقصة اني لازم انزل كل يوم الصبح اشتغل البيت عندهم.. انا بيتي يا دوب اقدر اشتغله من المرض كل يوم بالمستشفى باخد تبخيرة بالطوارئ او ابرة للتحسس.. و المشكلة بيتي متل الكهف الشمس ما بتدخله وهالشي بأزم الموضوع وكلو عفن و رطوبة.. بدون مبالغة اكتر من ساعتين ما بقدر انام فيه من الرعب والضيق والحزن.. والله ما كان حدا قدي بحب الحياة والضحك ذبلت وجهي تعب جسمي نحف صحتي خربت.. الحمد لله على كل حال.. لا اعتراض على حكم الله لكن سببولي مشاكل صحية ونفسية انا بغنى عنها الله يسامحهم على كل حال.. طولت بالكلام بس ما حدا حاس فيي بدي افضفض.. اهلي حاسين في بدعولي وبساعدوني مادياً ومعنوياً بشكل كبير وسعوا معي للعلاج مع انهم مش مجبورين واخر شي دار حماي بقللوا من قيمة كل شي بتعلق فيهم
يا الله شو متمنية ارجع زي زمان كنت وردة مفتحة صرت ذبلانة. حسبي الله ونعم الوكيل بس
هلا اللي بدي اسالكم اياه هل من حقي اطلب انقل لبيت تاني؟ هل بكون مذنبة بحق حماي ؟ زوجي بفكر اني بدي انقل مشان ابعد عنهم بس والله مشان تتحسن صحتي بيتي فيه شي مش طبيعي دايماً بشوف كوابيس مرعبة فيه ودائما مشاكل مشاكل ما بتنتهي.. حماي رجل كبير في السن وانا ما بدي ابعد زوجي عنه دايماً بوصيه فيه بس فيه غير زوجي اربعة ابناء ليش احنا اللي نتحمل كل شي على حساب صحتي و راحتي ونفسيتي؟
انا ما بدي اعمل شي يغضب وجه ربنا بس اللي بصير اكبر من قدرة تحملي انا مش مجبورة الا بزوجي و ببيتي ومع هيك قلت لزوجي خلينا نطلع من البيت وحماي يسكن عنا متل ابوي رح اعاملو بس ما برضى حماي طيب انا شو اعمل؟
كل واحد من اولاده و زوجاتهم عايشين بعيد ومش سائلين بزوروهم اخر الاسبوع و واحد من اسلافي بحاول يشوه صورتي قدام حماي.. كتير بحاول اكسب رضاه لحماي بس عالفاضي دايماً زعلان علي ومكشر بوجهي و بحكي لزوجي عني..
هلا زوجي تقريبا اقتنع بالخروج من البيت ولما قال لحماي حماي زعل كتير.. طيب ليش ما زعل على بقية اولاده لما طلعوا؟
زوجي طيب وبحس الكل مستغل هالنقطة فيه بطالبوه بشي فوق طاقته وانا الكل بسيء الي لانو عارفين زوجي ما بنتبه لهاي الامور و مش من النوع اللي بجاوب بينما ما حدا بسترجي يحكي مع بقية الكنات..
هل احنا بنكون مذنبين لو طلعنا من البيت و حماي مش راضي حتى لو هالأمر بزيد علي مرضي؟
حماي مش مقتنع بمرضي بقول للكل اني مريضة نفسياً ومعي وسواس الله المستعان بس
اوف كتير طولت بالكتابة بس قد ما بعاني والله تحملوني امانة ما بعرف لمين احكي..

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

]hv plhd sff,gd hglvq

المصدر...