قصة مؤثرة جدا

القصة منقولة

السلام عليكم ورحمة الله وبركاته
هقولك حكايتى عشان يمكن دعوة منكم بظاهر الغيب تعفى عنى وتكون سبب فى شفائى

انا يا بنات تعبانة اوى من سنتين الحمد لله يارب

الاول كان وجع فى كل عضمى ودوخت عن الدكاترة واحد يقولى روماتيزم والتانية روماتويد

وكل واحد برأى زى ما انتوا فاهمين

المهم بعد ما الموضوع زاااد اوى وصلت لدرجة انى امشى فى الشارع اعيط من الالم

واجرى على الصيدلية اجيب مسكن ده لو كان مش معايا فى شنطتى

ومش بتحمل حتى لمسة ابنى الصغير على جسمى

بعد معاناه مع الدكاترة والادوية امى ربنا يحفظها ليا قالتلى على دكتور شاطر جداا فى القاهرة وبيجى فى التليفزيون

اسمه محمد يسرى عنده مركز لمعالجة الالام

المهم قلت لجوزى وحددنا ميعاد السفر لان احنا من اسكندرية وفعلا حجزنا ووصلنا

الدكتور لسه بيقولى مالك بتشتكى من ايه وانا دموعى دى جريت من كتر الاحساس بالالم وبقلة الحيلة والعجز

وبعد ما خلصت كلامى الدكتور قال لجوزى انا اولا شايف انها وصلت لمرحلة الاكتئاب بسبب كتر الوجع اللى هى حساه

وشخص الحالة ان عندى تليف فى العضلات كلها وطبعا بعد الكشف اكتشف ان عندى 14 مركز للالم من 18 مركز متخيلين ؟؟

والعلاج حقن تسريب وريدى عنده واوية مكثفة وعلاج نفسى كمان

خلاص كده خلصنا ونزلنا ركبنا ميكروباص واتصلت بامى اطمنها عليا واطمن على ولادى انا عندى ولد عنده 3 سنين

وولد عنده 7 وونص وقلتلها احنا خلاص ركبنا وطالعين اهو

طبعا الخروج من القاهرة فى الوقت ده كان صعب جداا وانا كنت تعبانة فنمت جنب الشباك وحطيت راسى كده وغرقت فى النوم

بعد شوية تعبت جداا وكتفى وجعنى روحت الناحية التانية ونمت على كتف جوزى ربنا ما يحرمنى منه

وفجاة يا بنات وبدون اى مقدمات حسيت بالالام رهيبة

وجوزى بيشيلنى وانا بقوله لا لا نيمنى فى الارض وساعات بتعدى ببطء رهيب حسه انى بغيب عن الوعى ولما برجع

بقول يارب واغيب عن الوعى تانى

ولما ابتديت افوق ميزت صوت جوزى بيزعق فى التليفون جاامد وبيقول مراتى بتموت ابعتوا عربية الاسعاف حالا

فتحت عينى لقيت الدنيا ضلمة جداا والناس بتصرخ

شفت جوزى بيبكى وماسك ايدى وبيقولى متخافيش يا حبيبتى هتبقى كويسة

انا مش فاهمة حاجة كل اللى حساه الااام رهيييبة فى نصى الشمال ووشى

قلتله كلم امى انا عاوزة اكلم امى قالى لا مش هينفع

طبعا انا مش بقول غير ااااه وبعدين اغيب عن الوعى تانى ولما ارجع اقول اااه يا ولادوى وبعدين قلتله خد بالك من العيال

وبعد كده فقت لقيتى فى مستشفى وجوزى عمال يزعق انهم مش بيعملوا ليا حاجة طلبت منهم مسكن وركبوا ليا كانولا

وحسيت وهما بيعطونى المسكن وغبت عن الوعى تانى


انا يا بنات جوزى ظابط جيش فاتصل بمستشفيات كوبرى القبة وحلمية الزيتون وطلب منهم اسعاف يجى ياخدنى من مستشفى الشيخ زايد

اللى حصل بالظبط ان سواق الميكروباص نام فخبطنا فى عربية مقطورة كبيرة من الجنب اللىانا كنت فيه

السواق ربنا توفاه والست اللى ورايا وباقى الصف كلهم ربنا توفاهم وطبعا انا لو كنت ناحيه الشباك لسه كان زمانى

انا كمان مت لكن دى ارادة ربنا

الست كان صوتها لسه فى ودانى وهى بتكلم فى التليفون وبتضحك ربنا يرحمها يارب ويرحمنا جميعا

طبعا وصلت مستشفى كوبرى القبة لقيت ناس كتير حواليا وانا بشعرى من غير حجاب

قلتله فين حجابى يا احمد قالى انا شلت حديد العربية من على وشك يا حبيبتى الحجاب اتقطع فى الحادثة معلش

ربنا غفور رحيم

عيطت وقلتله لا مش عاوزة الرجالة تشوفنى وانا بشعرى كده هاتولى اى حاجة تغطينى وكل ما ممرضة تقرب منى

وتقولى سلامتك اقولها بالله عليكى هاتى اى حاجة غطى بيها شعرى

فضلو يغطونى بالملايات ويعملوها على شكل حجاب ويقولولى معلش اقولهم لا افرضوا انى مت دلوقتى اقابل ربنا كده يعنى

وفى الاخر مش لاقيين حل الا انهم جابولى بونيه بتاع العمليات عشان يسكتونى

لما فقت ولقيت جوزى بيبكى قلتله انت بتبكى كده قدام ناس عسكريين وهما عارفين انك عسكرى مش عاوزة اشوفك كده

مهما حصلى انا الحمد لله كويسة قالى ميهمنيش حد فى الدنيا غيرك

طبعا اشاعات كتيييرة فى كل حته وكل الانواع عشان يتأكدوا ان مفيش نزيف داخلى

انا يا بنات كانت لحظة التحول فى حياتى لما عرفت انا كل الصف اللى كان ناحية الخبطة مات الا انا

حسيت انا ربنا بيدينى فرصة تانية عشان ارجع ليه زى ما كنت

حسيت انى مش عاوزة اى حاجة من الدنيا غير انى استعد لاخرتى

حسيت انى فى فضل ونعمة ورزق من ربنا انى هبص فى وش عيالى واحضنهم تانى

حسيت انى فى رضا عمرررى ما حسيت بيه قبل كده انا كنت اكتر واحدة بتشتكى فى الدنيا

اصباتى يا بنات اكتر من 20 غرزة فى وشى فى اماكن متفرقة

كسر فى وشى من جحر العين وممتد لحد الفك وكسر تانى فى الفك

كدمات شديدة جدااا فى نصف جسمى الشمال وتورمات

انا والله يا بنات مش زعلانة على اى حاجة حصلت بالعكس حسه انى فى نعمة وفضل من ربنا والف حمد والف شكر ليك يارب

انى ارجع واكون موجودة فى وسط عيالى حتى لو مش قادرة اتحرك وحتى لو بقيت متشوهه وحتى لو كان حصلى اكتر

من كده مفيش حاجة اصعب من الموت

حكيت لكم كل الحكاية الطويلة دى عشان اقول لكل واحدة عندها حاجة مش راضية عنها مفيش حد بياخد من الدنياا كل حاجة

وعشان ربنا يديكى حاجة نفسك فيها اوى ممكن يحرمك من حاجة تانية متقدريش تعيشى من غيرها

نفسى كل واحدة فينا تدور على الرضا بقضاء الله وقدره فى حياتها

لو متجوزتيش افتكرى نعم ربنا الكتيرة عليكى يمكن فى صحة يمكن فى ام واب

لو مخلفتيش افتكرى نعم ربنا الكتيرة عليكى يمكن عندك فلوس او زوج بيحبك


لو مش عندك فلوس افتكرى ان فيه ناس كتيرة معاها فلوس لكن مش لاقيه الصحة

لو تعبتى نفسك وقريتى موضوعى للاخر فكرى فى ايه فى حياتك انتى ناقمة عليه وارضى

وقولى الحمد لله

ربنا يسترنا ويوقظ قلوبنا

وعليكم السلام ورحمة الله وبركاته

الحمد لله حمدًا كثيرًا طيبًا مباركًا فيه

أسأل الله العظيم رب العرش العظيم أن يشفيها شفاء لا يغادر سقمًا ، وأن يبارك لها في أمها وزوجها وأولادها

وأن يشف مرضانا ومرضى المسلمين

اللهم استرنا في الدنيا والآخرة

اللهم ارزقنا حسن الخاتمة

جزاك الله خيرًا أختي الحبيبة على القصة المؤثرة المليئة بالعبر

اقتباس : المشاركة الأصلية كتبت بواسطة أم معاذ [ مشاهدة المشاركة ]

وعليكم السلام ورحمة الله وبركاته الحمد لله حمدًا كثيرًا طيبًا مباركًا فيه أسأل الله العظيم رب العرش العظيم أن يشفيها شفاء لا يغادر سقمًا ، وأن يبارك لها في أمها وزوجها وأولادها وأن يشف مرضانا ومرضى المسلمين اللهم استرنا في الدنيا والآخرة اللهم ارزقنا حسن الخاتمة جزاك الله خيرًا أختي الحبيبة على القصة المؤثرة المليئة بالعبر

اللهم آميييين
جزانا واياكم
نورتى حبيبتى ام معاذ

جزاكى الله كل خير

لا حول ولا قوة الا بالله
فعلا قصة مؤثرة ومعبره .. وأثرت فيني جدا
حبيبتي .. التائبة
جزاكِ الله خير على نقل هذه القصة
لا يسعنا إلا أن نقول الحمدلله كما ينبغي لجلال وجهه وعظيم سلطانه
أسأل الله العظيم رب العرش الكريم أن يمن عليها بالشفاء العاجل
هو ولي ذلك والقادر عليه
وأن يشفى مرضى المسلمين أجمعين
بارك الله فيكِ يا الغالية
لقد أتحتي لنا فرصة للدعاء لها وللمسلمين
جعله الله في ميزان حسناتك
حفظك الله ورعاكِ

جميلة اوى يسلمو كثير
جزاكى الله كل خير

جزاك الله خير