سألت زوجي سؤال !! وصدمني بالجواب !!

سألت زوجي سؤال !! وصدمني بالجواب !!

السلام عليكم بكتب لكم مشكلتي اللي متعبتني من فترة طويلة لعل وعسى اجد عندكم الجواب الشافي

انا انسانة عايشة في دولة الامارات من زمان ونشأت وكبرت فيها وتزوجت فيها من شخص بنفس حالتي نشأ ودرس فيها ولله الحمد حياتنا مرتاحين فيها وعندنا بنتين ربي يحفظهم

زواجي كان تقليدي مو قصة حب ولا شي زواج اهل والحمد لله مقتنعين ببعض

من بداية زواجي كنت احس زوجي ما يحب لبسي .. انا انسانة لبسي محتشم جدا ولله الحمد .. كان يحب البس ملابس تبرز جمال جسمي وانا هالشي مستحيل عندي

يحب اني اكون بكامل زينتي وجمالي خصووصا لما نكون طالعين مع بعض وكان هالشي يزعجني جدا .. اللي اعرفه ان الرجال يغار على زوجته ويحبها مسترة هذا ليش تفكيره بهالطريقة ما فهمت!

طبعا انا مقتنعة بلبسي وما فكرت اغيره عشان زوجي لان لا طاعة لمخلوق على الخالق .. بس حاولت افهم منه وجهة نظره في هالموضوع

وبعد إلحاح قال لي بصراحة انا ايام الجامعة شفت نماذج حقيرة جدا من بنات لابسة العباية والحجاب والنقاب بس شكلا وهي من تحت لتحت تسوي بلاوي ومصايب

وبالمقابل البنات اللي حتى يمكن حجاب ما يحطون بس محترمين جدا وخلوقين وحتى اللي تسوي بلاوي تسويها بالعلن مو متخفية بلباس الدين

وهو من يومها يكره اللبس المحتشم يحس ان كل البنات اللي يلبسون اللبس الساتر يلبسونه شكلا فقط بدون جوهر او حتى يتخفون فيه ولما صارت قصة شبح الريم اللي معظمكم سمع فيها بعد زادت من كره لهذا اللبس!!

كلمته الف مرة انه هذه فئة قليلة جدا وفي ناس كثيييرة ملتزمة بلباس محتشم عن قناعة وايمان ولإرضاء رب العالمين مو لغايات اخرى بس هو خلاص مخه محشي بهذي الافكار السامة

واكيد بتقولون البسي لبس انيق .. انا ما البس الا افضل العبايات الماركة والراقية جدا ودائما لبسي مرتب .. لكن بالعربي وباختصار زوجي يبغا اللبس اللي يبرز مفاتن الجسم !!

هو شخص مصلي وصايم ويخاف ربه في كل امور حياته بس هالنقطة اللي مو قادرة اتحملها .. هو عنده قناعة ان اللبس حرية شخصية ويشوف ان من الممكن وحدة بالشورت تكون اخلاقها افضل من اللي متغطية بمليون قطعة قماش ...!! عجزت اقنعه واغير افكاره مافي فااايدة..

اللي خلاني انشر مشكلتي صدمتي فيه امس كان جالس على جواله قلت له يا ابو فلان افكر اشيل حجابي .. سألته بجدية قلت بشوف ردة فعله

بكل بساطة وبرود وبجواب صريح مو بمزح ولا ضحك يقول لي ايه والله ياليت... انتي بدون حجاب احلى بكثير!!!!

على فكرة اهله كلهم لبسهم محتشم... ولما سألته ليش تزوجتني مادام تحب المفصخات قال انه ارتاح لي بالشوفة الشرعية وصار النصيب وانه هو مو جابرني اتفصخ ترك لي حرية اختيار اي لبس أبيه حتى لو بلبس مايوه عالبحر ماعنده مشكلة!!!!!!

طالبة مشورتكم شلون اتصرف معاه ولاتقولوا طلاق هو ابو بناتي و انا مرتاحة معاه من جميع النواحي..وكلامه مستحيل يغيرني عن قناعتي وايماني بأهمية الستر

لكن خوفي على بناتي بالمستقبل يأثر عليهم

انقذوني بأفكاركم جزاكم الله خير

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

sHgj .,[d schg !! ,w]lkd fhg[,hf

المصدر...