رمضان قرب .. سخنت ولا لسه !!

الحمد لله رب العالمين وصلاة وسلاما علي أشرف وأحب خلقه إليه ..

ثم أما بعد :

النهاردة كام رجب .. ؟؟ 20 صح ؟؟

وبعدين ؟؟

رمضان قرب ..

أهلا وسهلا .. ما احنا عارفين مش جبت جديد يعني

استعديت ؟؟

استعديت ! إنت قلت النهاردة كام ؟؟

20 رجب ...

طب ما هو لسه بدري .. أستعد أعمل ايه يعني .. يوم 29 ان شاء الله يوم ما يجي سيادة المفتي ويقول غدا

المتمم لشهر شعبان ..

هاستعد ..

إزاي بقي ؟؟

هنوي أصوم ان شاء الله وأجيب كتاب عن فضائل شهر رمضان وأقراه

اه وتقعد تقري طول شهر رمضان لحد ما يجي المفتي يقولك بكرة العيد .. مش كده

خلاص أبقي أبدأ ليلة 28

عموما أحب أقولك إنت أتأخرت أووووي .. اللي بدأ بدأ من زمااااااااااااان عشان يقدر يوصل

لما بتجي تسوق العربية الصبح .. بتعمل إيه ؟؟

بسخن ..

ممتاز أهو هو ده اللي أنا عاوزه لاااااااازم تسخن عشان تقدر تدخل السبق وتسبق

يعني أسخن إزاي ؟؟

طيب أنا هقولك علي حاجات بسيطة أوي .. تبدأ بيها ولازم لازم تواظب عليها عشان لحد رمضان ان شاء الله يكون قلبك مهيأ ونفسك هادية تقدر تخوض السباق بجدارة .. لو أنك إتأخرت يعني

خلاص يا بني ذلتني .. قول وإخلص

بداااااااااااااااااااااية .. صلي علي حبيبك المصطفي

اللهم صل وسلم علي رسول الله محمد وعلي آله وصحبه أجمعين



نبدأ بالحاجات اللي المفروض نكون مواظبين عليها في رمضان أو غير رمضان يعني طوووول السنة

صلاة الفجر

إوعي تكون مقصر في دي


إلا دي دي بداية طريقك يعني لو معرفتش تجيبها .. يبقي هتركن ومش هتعرف تكمل

لا أنا الحمد لله بقوم في معظم الأيام ..

مفيش حاجة إسمها معظم .. إحنا مش هنفاصل

بعد ما تصلي الفجر ..

هنام

لااااااااااا .. تنام إزاي ورزقك من ياخده

يعني ايه ؟؟

متعرفش ان الارزاق تقسم وقت الفجر وعجبا لمن يقسم رزقه وهو نااائم

يعني عاوزني أقعد بعد الفجر .. مش عاوزك ده هو لازم

هو كل حاجة لازم

لو عاوز تسبق

كمل .. كمل

تقعد تقول أذكار الصباح وتقرألك جزء ونص من القرآن و

بص بقولك إيه أن أخري حزب

إيه أخري دي .. أنت هتضحك علي نفسك .. لما انت في الدراسة كنت بتذاكر قد الجزء ونص 10 مرات كنت تقدر تقول أخري .. ده يدوب





وبعدين تقعد بقي تذكر ربنا اللي تقدر عليه بس minimum يعني

100 سبحان الله وبحمده .. 100 سبحان الله العظيم .. 100 صلاة علي النبي .. 100 أستغفر الله .. 100 لا اله الا الله وحده لا شريك له له الملك وله الحمد وهو علي كل شيء قدير ..

طب انا بتلخبط في العد .. لا زي بعضه حاول .. عشان متقلش عن الرقم ده

النبي صلي الله عليه وسلم بيقول
"من قال سبحان الله وبحمده مائة مرة حطت عنه خطاياه ولو كانت مثل زبد البحر "

وأحاديث كتير فيها أرقام .. مش قصدي أشق عليك بس حاول عشان ربنا يأجرك .. ولو عديت الرقم وعاوز تزيد زيد براحتك من غير ما تعد ..

حاول تزود الذكر أوي .. لان ده من أكثر الوسائل لإحياء القلوب

سيدك النبي .. صلي الله عليه وسلم بيقول ..
"مثل الذي يذكر ربه والذي لا يذكر ربه مثل الحي والميت "

لازم تكتر عشان تقدر توصل لقمتك في رمضان ان شاء الله ..

بعدين يا سيدي تكون الشروق طلع .. تبدأ تصلي الضحي جميلة أوي الصلاة دي وثوابها عظيم أوي

كده ممكن تنام سا عتين ولا حاجة

كتر خيرك والله .. جزاك الله كل خير


في يومك بقي يسيدي ..

عاوزك يبقي ليك ورد قرأني تحفظه في اليوم .. عاوزك تحط لنفسك هدف الاجازة دي تختم قد ربع القران مثلا .. وتقدر

يعني مثلا احفظ كل يوم صفحة او اتنين .. لازم تحفظ

وعشان تواظب لازم تروح جمعية .. وفي رمضان تدعي ربنا يحفظك كتابه

حاجة تانية هقولك عليها حلوة أوي عندك حصالة ؟؟

لا

طيب تروح تفتح ضلفة المطبخ بتاع بيتكوا هتلاقي برطمانات مربي فاضية أدي كده .. وعلبة طحنية فاضية .. خدلك واحدة

وكل يوم تحط فيها صدقة لربنا ولو جنية .. بس كل يوم .. وتيجي أخر الشهر تلم الفلوس دي وتحطها في حاجة خير
جامع .. فقير .. دين

عاااااااااااااااااارف ثوابها لا يحصي بجد .. بس احتسب النية




أخر حاجة بقي هختملك بيها .. عاوزك تمسك كتاب سيرة أو سلسلة لأي شيخ بيحكي فيها سيرة الصحابة والتابعين
مثلا د عمرو عبد الكافي .. أو أي حد بتحب تسمع منه ..
نزل حلقات السيرة بتاعته وأسمع كل يوم عن صحابي .. عارف ده هيملا قلبك حب ورقة .. وتلاقي نفسك مشتاق للناس دي فتشتغل أكتر ..
وبعدين حاول تحكي القصة اللي سمعتها لحد .. منها تثبت في مخك ومنها دعوة الي الله ..

نفذ ده وإن شاء الله تكون جاهز علي رمضان



والله مش عارف أقولك إيه .. جزاك الله خيرا ؟؟

متقولش كده .. دا انت اخويا

طيب سلام عليكم ..

رايح فين ؟؟

مروح ..

كده من غير حاجة

إنت عاوز فلوس ولا إيه .. لا بقولك إيه إحنا متفقناش علي كده كنت قولت من الأول

فلوس إيه ياعم .. إنا لا نريد منكم جزاء ولا شكور

أمال عاوز إيه ..

إنوي بجد

أنوي .. أنوي علي إيه؟؟

اعزم إنك هتنفذ اللي إتفقنا عليه

لا متخفش هنفذ إن شاء الله ..

ما انا عارف إنك هتنفذ .. وعندك نيه

بس لازم تعرف حاجة .. من إنتظر أن توانيه نفسه بالخير .. فلينتظر طويلا

يعني متستناش من نفسك خير

لازم يكون عندك عزم وإصرار .. عشان تساق معاك راغمة أو راغبة

دي فرصة لازم تنتصر فيها علي نفسك عشان تقدر توصل في رمضان وتكمل بعد رمضان
لو نفسك انتصرت عليك .. هتبقي خسرت كتيــــر وانت مش عارف اذا كنت تلاقي حد يذكرك تاني ولا لأ

حط الجنة والنار قدامك .. واعرف إنها حاجة من الاتنين واختار اللي عاوزه

بس إوعي تنسي مش هتفرح غير معاه .. هو حبيبك وهو خلقك وعارفك
وعارف طريق سعادتك

في بعدك .. حليم
وفي قربك .. حنان
وفي حاجتك .. كريم
وفي مرضك .. رحيم

مين غيره يسترك ويجود عليك .. خليك مع ربنا تكسب
واتخلي شويه عن شهوات الدنيا
" وَفَرِحُواْ بِالْحَيَاةِ الدُّنْيَا وَمَا الْحَيَاةُ الدُّنْيَا فِي الآخِرَةِ إِلاَّ مَتَاع "

ومتنساش تدعي لصاحبك )







~ جزى الله خيرا من كتبه ~
م/ن

اسمح لي ابدي اعجابي بقلمك وتميزك واسلوبك الراقي وتالقك

اقتباس : المشاركة الأصلية كتبت بواسطة مسلمة سلفية [ مشاهدة المشاركة ]

اسمح لي ابدي اعجابي بقلمك وتميزك واسلوبك الراقي وتالقك

جزاكى الله خيرا
انا اقل من ذلك
نورتى الصفحة بمرورك الكريم

حيا الله صاحبة الموضوعات الجميلة والهمة العالية
موضوع أكثر من رااائع
نسأل الله تعالى أن يتقبل منا أعمالنا ويجعلها خالصةً لوجهه .

جزاكِ الله خيراً أختي ونفع بكِ .

جعلكِ الله مثل الغيث النافع
إذا أقبل استبشر به الناس
وإذا حط نفعهم
وإذا ذهب بقى أثره الطيب .

وعليكم السلام ورحمة الله وبركاته

حبيبتي وأبنتي الغالية .. التائبة
ما شاء الله عليكِ
موضوع رااائع يحمل في طياته الكثير من الفائدة
أسأل الله أن يثقل به ميزان حسناتك وأن ينفع بكِ حبيبتي
وكم تمنيت لمثل هذه المواضيع المفيده أن تكون باللغة العربية
ليسهل على الجميع الفهم مع أحترامي لجميع اللغات العربية العامية
بارك الله فيكِ وزادك الله من فضله
حفظكِ الله ورعاكِ

وعليكم السلام ورحمة الله وبركاته

جزاك الله خيرًا أختي الحبيبة على الموضوع الرائع والنصائح الطيبة

نفع الله به وبك ، وجعله في ميزان حسناتك

بارك الله فيك وسدد خطاك

اللهم بلغنا رمضان

اللهم أعنا على ذكرك وشكرك وحسن عبادتك

~ جزى الله خيرا من كتبه ~


آمين ، ومن نقله