ام زوجي حرفت كلامي بدون سبب

ام زوجي حرفت كلامي بدون سبب

السلام عليكم

انا متزوجه صار لي 4 سنين عمري 27 و زوجي 31 و عندي ولدين اعمارهم سنتين و الثاني 4 اشهر

زوجي من منطقه غير منطقتي ولكن زوجي وانا نشتغل ف منطقتي و ساكنين لحالنا تقريبا كل نهايه اسبوع اروح مع زوجي لمنطقته و نقعد مع اهله وانا ساكنه معاهم فملحق واقضي الاجازة كلها معاهم عشان يشوفوا العيال مع المسافه تاخذ منا فوق الساعتين بعد اقول تهون عشان زوجي

علاقتي حلوة مع اهل زوجي مع ان ام زوجي صعب ارضاءها و دايما تحاول انها تفتعل المشاكل لكن الحمدلله انا كنت عارفه كيف اتعامل وياها و ما انكر ان زوجي ساعدني في هذا الشي خاصه انها كل زوجات عيالها ما سلموا من مشاكلها الله يهديها

بس للاسف مافي شي يدوم الاسبوع اللي فات صارت لي مشكله مع ام زوجي والسبب تافه ... من اسبوعين اخو زوجي اللي ساكن جنبنا خبر زوجي انهم كانوا يسمعوا اصوات ف بيتنا اللي فالمنطقه اللي نشتغل فيها و نحن شاكين ان البيت مسكون بالجن و ام زوجي عرفت بالموضوع وقالت لي و لزوجي عشان نخلي العيال عند اهلي لما نرجع منطقتنا وهذا اللي سويناه و خليتهم طول الاسبوع خلال هذا الاسبوع عمة العيال كانت تكلمني ع الواتس و تطلب مني صور العيال و وقتها كنت فالدوام وما كانت عندي صور وانا مو دايما اصورهم لاني اكون مشغوله معاهم و اخلي الموبايل بعيد عني و نسيت ارسل لها.. لما جت نهايه الاسبوع صار عندنا عزا عم امي توفى الله يرحمه و ما نزلت مع زوجي لمنطقته بحكم ان لازم اكون مع امي فالعزا ... و انشغلت كثير كنا طول اليوم فالعزا وانتوا عارفين كيف يكون الجو ... المهم اجا يوم السبت و انتبه ان في مس كول من ام زوجي و الصراحه حسيت ان في مشكله جايه فالطريق .... لما وصل زوجي سألته شو صاير قالي ماعرف قالي كلميها عادي ... لما كلمتها كانت نبرة صوتها حادة و تعاتبني ليش اني ما ارسلت لهم صور العيال قلت لانهم كانوا عند اهلي وانتي بنفسك قلتي لي اخليهم ... قعدت تهزأني اني مش قد مسؤوليه العيال وماعرف ايش و قالت كلام كبير وانا وقتها تنرفزت بس سكت احتراما لها ولما خلصت قلت لها كلامك على عيني و على راسي وانا ما اسوي اي شي الا وابنك اللي هو زوجي يكون عارف و راضي و سكرت عنها ... اتصلت لزوجي وكنت معصبه و قلتله روح اتصل لامك و شوف شو الموضوع لانها هزأتني من دون سبب و تخيلوا راحت كلمت زوجي و حرفت كلامي كله ع اساس اني اتمنن عليهم وانا والله ما قليت ادبي ولا قلت اي شي غلط لكن هي الله يهديها خذت اللي تبيه من كلامي بس عشان تكبر الموضوع رجع كلمني زوجي وقالي الكلام قالوه له عن كلمي وانا حلفت له يمين اني ما قلت اللي سمعه وقلتله بالضبط الكلام اللي صار امبينا المهم ان الموضوع كبر وانا كلمت ابو زوجي و زوجي كلم ابوي والحمدلله بالاخير طلع الحق و زوجي بين لهم اني ما قلت اللي هم قالوله له و زوجي عرف ان الحق معاي


من بعد كل اللي صار اكتشفت ان اخت زوجي حاذفتني من الواتس و السناب و قطعوني كلهم وانا اللي كنت معاهم مثل بنتهم و اختهم ...بعد اللي صار زوجي قرر ان ما ياخذنا معاهم هالاسبوع وانه يروح لحاله وانا متأكدة انهم بيفتحوا الموضوع مره ثانيه مع زوجي ومش بعيدة انها تحلف عليه بالطلاق لاني ياما سمعتها تقولها لاخو زوجي ... انصحوني كيف اتعامل مع الموضوع مع اني الصراحه كثير متضايقه و مقهوره منهم

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

hl .,[d pvtj ;ghld f],k sff

المصدر...