زوجي و بنتي

زوجي و بنتي

السلام عليكم
انا عمري 20 وزوجي 27 وبنتي سنتين زواجنا دام 3 ومع الخطبة والملكة 5 سنوات
المهم هالانسان احبه واعشقه بشكل ماتتصوره مدري ليش مهما سوى فيني
مشكلتي مع زوجي انه يطردني من البيت على اتفه مشكلة ويسبني ويهينني والفترة الاخيرة صار يضربني
ومشكلتي الاخرى انه نسونجي و خانني من اول اسبوع وللان من وحدة لوحدة اه ياقلبي
واربع وعشرين ساعة برا البيت بحجة العمل وانه تاجر ولا شفت منه فلوس ولاشي كل شي بالزن واجلس اشحت لين يقتنع يعطيني
مايرضى يوصلني ولا يقضي اي مشاوير للبيت كل شي روحي مع اخوانك ولا يطلعني تبغي تطلغي مع اخوانك
داخل البيت ما يحترمني يرجع عالتلفزيون كبسيني جيبي عصير تهزيء ولو كلمته اسكتي غبيه عقلك صغير ما ابغى اسمعك اجي احضنه يدفني مو فايقلك مايسير رومنسي الا لو بغاني بسس ....
كل شي يصير فبيتنا عند امه مثال تخيلو يقولها نسيت حفاظة بنتها عالمغسلة وامه تدق تهزاني طيب نسيت وتحصل فكل البيوت الله يكرمكم يقولها سوتلي اكل ناشف وانا سويتلهم ايدام مكشن وعصب وشلته وحطيتله مرقة وعدلته وعصب وقال مني اكل عندك وبرضه يقول لامه يرجع اخر الليل وهوا عنده ثوب واحد ويبغاني استناه واغسله واكويه وانا اكون نايمة ولو ماكويته ولا صحي ومالقاه جاهز يقولها وهية ماتقصر تهزء ومرة اشكتكيتها خياناته تقول انتي ماتشبعيه وعطيني محاضرة ولدها الصح وانا الغلط وهوا كل اشوي بحبيبة ومن قبل الزواج
انا اداوم في الجامعة و يبغاني اتركه باي طريقة لدرجة حتى امه تهزئني تقول انتي مقصرة فبيتك بسبب الدراسة
اخر مرة طردني ابوية قله المرة الجاية لو طردتها مني مرجعها لك
برضه طردني والمشكلة كالتالي كل يوم يرجع الساعة 3 او 2 وذاك اليوم دق الساعة 2 قال انا في الطريق جهزي العشا قلت طيب وجهزته وادق ساعة ونص وهوا شاغل الخط قام دق قلي ايش تبغي كنت اكلم شركة فمصر ورجع البيت وانا مقهورة وكنت عارفة انو يكلم وحدة وفكيت جواله واتاكد قمت طنشت قلت يسوي اللي يسويه بينه وبين ربه ورحت انسدحت على فراشي اتفاجات انو كان يراقبني و قلي انتي ملقوفة مالك شغل فيني وليش تفتشي وراية وطبعا سارت بيننا مضاربة قدام بنتي وانا اقوله ليش تسوي كذا وانتا ماتخاف ربك وانا تعبت وانتا ظالمني قام ضربني بكل قوته على كتفي وقلي ما ابغاكي روحي لاهلك ولمي عفشك
قمت زعلت ورحت لاهلي ورسلتله رسالة بجلس عندهم يومين وانتا فكر في اللي تسويه
قام قلي لمي عفشك ما ابغاكي انتي ماتعرفي الدين ومتجسسة وتنكري غلطك وانا مابيني وبينك غير ارجع ذهبك واعطيكي مصروف البنت وبعدها بيوم دقت اخته تقول متى تجي تلمي عفشك
وصارت مشكله قبلها اخته دقت تبغى تشيل بنتي السوق قلتلها تعبانة وكانت مسهلة الله يكرمكم ومسخنة قامت امه كلمته وقالتله زوجتك تقول ان البنت تعبانة ايشبها قام جا عندي ومسكني ورماني عالجدار وقلي لو ميته امي تبغاه ترسليها
مشكلتي الثانية بنتي متعلقة فيني وانا دحين عند اهلي ولميت عفشي بعد ما اخته كلمتني بس سارو اهله كل اسبوع يجو يشيلوها وترجعلي عصبية وماتسمع الكلام وتضربني وتخرمشني و كل البيت الصغير والكبير وحركتها زايدة وبس تبكي ومرات تسال عن ابوها وتعطيني الجوال تقول بابا اشغلها صوره كرهتني فحياتي واهلي ساكنين في فلة وتجلس طالعة نازلة بالدرج وتشيل اشياء ثقيلة وتطيح وتحوس كل شي وتدخل المطبخ وتفك البرادة وتتزحلق بالموية وكل ماقفلته اخواني يفتحوه باختصار ماسارت بنتي اللي اعرفها سارت اخلاقها ماتنطاق ومرات تجي تبوسني وتحضني وفجاة تعصب وتضرب تطلع عالكنب وتهددني انها بترمي نفسها عالبلاط مدري ايشبها تعبت احسها مو مستقرة ومتشتتة لانو البيت كبير وكله اوادم
مشكلتي الثالثة والحقيقة اني احب زوجي واعشقه مهما يسبني ويهينني عجزت اكرهه وطبعا ابوية قالي ماتكلميه يبغاكي يجي يكلمني بنفسه وانا قاعدة استخير لو فيه خير يردني ولو مافيه يطلقني بس قلبي يعورني عليه
افكر لو اطلقت اقول لابوية اخد غرفة في الدور اللي تحت بس ابوية حاطلي سرير انا وبنتي فغرفة اخواتي وهوا جامع البنات فغرفة والعيال بغرفة والغرف كبيرة ورافض انو احد ينزل تحت يقول ابغى قلوبكم على بعض ما ابغاكم مفرقين وانا ابغى بنتي تستقر وتعرفي اني امها لانها حتى سارت تناديني باسمي
اسفة عالا طالة انصحوني صحوني حتى لو غلطانة بشي نبهوني انا تعبانة لاقصى درجة

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

.,[d , fkjd

المصدر...