بيتي جحيم

بيتي جحيم

السلام عليكم

تحية طيبة وبعد احب اعرض لكم مشكلتي وهي من بداية زواجي وليست جديدة
مع العلم اني متزوج من 4 سنين وعندي طفل .

المشكلة هي النكد والعصبية على اتفه شي من زوجتي ، زوجتي تشتعل اسرع من البنزين

لا احد يقول لي بسببي ، اهلها قالوا لي انها جداً جداً عصبية واذا عصبت تقلب البيت فوق تحت

مع انها عايشة في بيت اهلها حياة مثالية جداً وامها وابوها علاقتهم ممتازة جداً .

طبعاً اهلها قالوا لي انها عصبية بعد الزواج والا كان ماتزوجتها .

المهم ، صارت مسيطرة على حياتي بشكل لا يصدق تسأل عن تفاصيل يومي وتحاول ان

تخلق مشكلة ، مثلاً تقول لي متى طلعت من الدوام ؟ اقولها الساعة 2 تقول طيب انت وصلت

البيت الساعة 2.30 ولا دخلت الا الساعة 2.45 خلال ربع ساعة وين كنت ؟ اكيد كنت عند امك !

( اهلي يسكنون تحتي ) اقولها ايه دخلت سلمت على امي ومن هنا تبدأ براكين الغضب والشتم

والانتقاد ، تقول انت عند اهلك 25 سنة ما شبعت منهم ؟ خلاص تفرغ لحياتك الزوجية .

لو تطلب شي من البقالة وانسى اجيبة تبدأ الموشحات والانتقاد اللي ماينتهي .

اقسم بالله اني اول ما ادخل بيتي آخذ نفس عميق واذكر الله وادعو الله ان يلطف بي ويرحمني

ويجيرني منها لأني عندما ادخل البيت لا اعرف ماهو مزاجها هل هي رايقة هل هي مبسوطة وهذا نادراً مايحصل

احياناً اذا كانت متضايقة وانا مثلاً اطالع التلفزيون تقوم تطفي التلفزيون وتقول سولف علي !!!

عن ايش تبيني اسولف لك ؟ عن اي شي انا متضايقة وابي اسمع سواليف ، واذا قلت لها سالفة عن

احد اصدقائي او احد المواقف وما اعجبها تقول سولف لي غير هالسالفة .

انا اكرهها بسبب تصرفاتها وماصارت تعني لي شي ، لدرجة اني ما اغار عليها بسبب كرهي لها .


طبعاً انا استخدمت وسائل لإصلاحها ولكن يبدو ان زوجتي فوق هذه النظريات والوسائل

اول ايام الزواج تناقشت معها بهدؤ ماطلعت بنتيجة تفسر كل كلمة اني اكرها واني ما احبها

ثاني شي كلمت اهلها اكثر من 10 مرات مافي حل بالعكس يزيد نكدها وعصبيتها .

صرت حازم معها وشديد لكن صارت هي ترفع صوتها وتهدد ان انا صرت حازم معها .

استخدمت الهجر في الفراش فما زادها الا عتواً ونفورا .

المشكلة اني اذا عاملتها بحب ورومانسية ودلع تحس اني عبد عندها تتحكم حتى بموعد نومي

يعني انا استخدمت كل الطرق لإصلاحها الا الضرب لأني ماراح امد يدي على امرأة مهما كان

للمعلومية انا اعاملها بشكل ممتاز سواءً حقها الشرعي او المادي او الترفيهي واسافر بها كثير

واعطيها مصروف واي وقت تبي تروح لأهلها او اي مكان انا حاضر لكن ماحصلت نتيجة

انا ماني كامل لكن مو مقصر معها بشي وبإعترافها قدامي وقدام اهلها اني مو مقصر بشي

افيدوني وش اسوي معها انا تعبت وصار بيتي جحيم وكرهت اليوم اللي تزوجت فيه .

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

fdjd [pdl

المصدر...