ابي ارجع لزوجي تعبت مررره

ابي ارجع لزوجي تعبت مررره

السلام عليكم ورحمة الله وبركاته

انا عمري 28 وزوجي 35 تزوجت من مطلق عنده ولدين ولنا سنه متزوجين وش اقولكم فيه مواصفات اي وحده تتمناها حنون وكريم وسيم ويسمعني كلام حلو وهدايا وانا مو مقصره معاه نفس الشي انا قاعدتي معه تسوي لي اسوي لك وهو يكره هالشي يقول مايعجبني
المهم انه متضايق شوي وزعلان مدري من ايش اكلمه يرد بكلمة وبس ارسلت له ولده يستأذنه نروح لاهلي ووافق وبالليل ارسل لنا السواق انا كنت ناويه انام عند اهلي دقيت عليه تعال خذ العيال انا بنام عند اهلي مايرجعون مع السواق الحالهم قال انا بعيد برجع متأخر خلاص ارجعي مع السواق قلت له مابي وهنا بدت غلطتي انا متضايقه لانه منفس ومابي اجلس معاه ابي نفترق الى مايهدأ
قال ارجعي ولاتكسرين كلمتي قلت له طيب و ارسل له بالواتس فلان متى بتطلع من عند اخوياك فلان فلان فلان وزوجي عنده عادة يقرأ الرسايل على الشاشة دون مايفتحها فقلت له عارفه انك تشوف الرسايل ومطنش قلت له ماني راجعه واللي يصير يصير والسواق مشيته متى ماطلعت تعال خذ العيال انا بنام عند اهلي
وطلع واخذ العيال وارسلت له اسفه ولارد علي وطنشني يومين وارسلت له بروح انام عند اهلي تفتك مني دامك ماتبيني قال روحي ولما رحت ماسأل ولا شي ارسلت له ابي مصروف قال المصروف للي بالبيت تخدمني مو للي منحاشه من المسؤوليات قلت انا استأذنت وانت سمحت لي قال وش تفرق اسمح لك ولا لا بتكسرين كلمتي وتسوين اللي براسك وانا مابي العنيده ولا اقدر اتحمل وقلت لكم لما خطبتك مااحب العنيده قلت زين اذا ماتبيني طلقني نفخ علي وقال كم مره قلت لك لاتجيبين طاري الطلاق لنا سنة متزوجين وطلعت لاهلي اطلب الطلاق 2 وهذي 3 قال تبين الطلاق ابشري بتجيك ورقتك وقف التأمين وبطاقة الصراف وفصل جوالي الرجال عزم يطلق طلع للدوام جيت شلت ذهبي وملابسي واغراضي المهمه دق على اخوي وقال عيب تجي للبيت وتشيل اغراضها كنها حراميه قاله اخوي وعيب ومو مرجله تذلها وتفصل جوالها وتوقف تأمينها ولاتعطيها مصروف بس احنا نتكفل بها قاله اختك كسرتني وفعلا انا مو رجال وتستاهل اللي ارجل مني انا كنت ابيها تحس بالفرق بين حياتها معاي وعندكم لكن بما انك بتتكفل بها هالدرس ماراح يفيد
جا زوجي يكلم ابوي وانا مرررره معصبه امي وابوي وخواتي يقولون احمدي ربك واطلعي للرجال طيبي خاطره انتي غلطانه
جلست معاه ساكته قالي انه اسف وعنده مشاكل بالشغل وبدال مااوقف معاه صرت ضده قلت له مشاكل الشغل لاتجيبها للبيت وتنفس علي وانت اهنتني وخليتني احتاج قال مقهور منك وابيك تشوفين وش انا مقدم لك قلت له احنا مانصلح لبعض وزي مادخلنا بالمعروف نطلع بالمعروف جا اخوي من برا وشافنا جالسين سلم وقال ان تصرفاته صبيانيه وانه لازم يكبر عقله رد وقال عقل اختك بكل كبيرة وصغيرة تطلب الطلاق وناظرني وقال متأكدة من قرارك انا شاريك قلت متأكدة وطلع

اخوي تهاوش مع زوجته على نفس المشكله وانها ماسمعت كلامه ولعن جدفها وضرها بشكل جنوني ولا مصروف ولا مصروف لبنته وولده وغير قفل الشقه ويقول خلها تتأدب
الغمامه اللي على عيني راحت وفهمت ان الرجال مايقبل تنكسر كلمته مهما كان وزوجي كان لين كنت ادور اعذار واني معصبه لانه معصبني
وهالفترة اشتقت لزوجي حيل والحاله برمضان وكلمته من جوال اختي الصغيره ورد قلت له وش مسوي برمضان وكذا يرد بدون نفس وقلت له سامحني قال انتي خسرتيني وبعد العيد بخلص لك اوراقك ذليتيني جاي لين عندك ارضيك وانتي ملزمه على الطلاق والعيب مو بطيبتي العيب فيكم انتوا
كلمت امه قالت مانتدخل بين الرجال وحرمته ابد وقالت انه يفكر بعد الطلاق يرجع ام عياله يقول كل الحريم زي بعض مع انه قلنا له وقت الخطبه اذا ناوي ترجع ام عيالك من الحين رجعها ولاتتزوج ثانيه
بس اكيد امه تقول كذا بس تحرني مو صحيح ماادري شلون اغير تفكيره عني والله ماني عنيده بس طلب الطلاق ابيه يتمسك فيني واخر مره قال لي زي كل مره تطلبين الطلاق وماتبينه واللي تطلب الطلاق عايفه لاعاد تطلبينه قلت هالمرة غير انا معزمه وتحرم علي الرجعة

دمرت نفسي كل خواتي يرجعون مع ازواجهم وعيالهم ويقولون كلميه لاتطول المده ويقسى وانا حاسه انها بتنحل بس مدري شلون اوصل له بيأدبني والله تأدبت كلمت ابوي لانه الرقم الوحيد اللي يرد عليه وابوي رفض يكلمه يقول لو يبيك بيدق عليك ويمكن يرجع ام عياله تستاهلين وخلي اخوك ينفعك وابوي كبير بالسن ويقول ابي اتطمن عليكم كل وحده ببيت رجلها طيب ساعدني كلمه يجي ثانيه وانا بتولى الباقي واقنعه يردني قال انا ناديته وانتي واخوك فشلتوه والله يهديكم

خايفه انه فعلا يرجع زوجته ام عياله ويعلقني وخايفه يطلقني

الله يخليكم لاحد يقولي غلطانه واهنتي الرجال هو اهانني بحصاره لامصروف ولا شي وفاهمه غلطانه ابي حلول علشان يجي نتفاهم ونفتح صفحة جديده هو يحبني انا متأكدة وانا احبه

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

hfd hv[u g.,[d jufj lvvvi

المصدر...