تصرف أبو خطيبتي الصادم والغير متوقّع !

تصرف أبو خطيبتي الصادم والغير متوقّع !


تصرف ابو خطيبتي الصادم !

ملاحظة : اذا ماتقدر تعطيني 10دقايق من وقتك فضلاً ارجع للموضوع لاحقاً ..

السلام عليكم ،
اسعد الله اوقاتكم بكل خير / اخوان وخوات ..



انا رجال مطلِّق .. عمري 27 عندي طفلين
تقدمت لوحده مطلّقه عمرها 30 بدون اطفال
طبعاً فارق العمر كان بناءاً على طلبي .. انا ابيها اكبر مني ..
المهم ان كل شي ماشي زي الحلاوه ومثل ماهو مخطط له ولله الحمد ..

بعد ماتم الاتفاق بين الحريم على كل التفاصيل المعروفه
رحت انا ومعي الوجاهه من الرجال لابوها وعمامها عشان الطلبه الرسميه ..

ابوي تكلم مع ابوها بالمجلس امام الجميع وقال يابو فلان حنا تحت امركم اذا لكم طلبات او شروط او اي شي من هالقبيل ..
قال ابوها : مانبي الا الوفق والستر والله يتمم على خير ..
اتفقنا ان الكتاب الاسبوع الجاي بعد مايطلع التحليل وطلعنا ..

طلع التحليل وجا اليوم المنتظر ..
والشيخ يكتب قال كم تبون مهر قال ابوها 80 الف !
البنت ثيب ياجماعه !

المهم ان كل الرجال انخرسوا بالمجلس ونزلوا عيونهم وقلبت وجيههم حمرا ومحد قال شي .. كنه ضرب الجميع كف جماعي !

طبعا البنت ماهي سلعه ولا سياره عشان اجلس احرّج عليها واطلب منه يقلل المهر .. لذلك فضلت اني التزم الصمت لان الموضوع اخذ وعطى وعرض وطلب والزواج قائم على شروط والمهر من اول هالشروط .

مشكلتي ياجماعه عشان تكونون بالصورة ابداً مو بالمهر ..
مشكلتي ان ابوها الاسبوع الماضي يوم قلنا وش الشروط ماقال انه يبي 80 ! ليش انتظر لما تحين ساعة الصفر والشيخ يكتب يطلب هالطلب !! يعني بالعربي حطنا بالزاويه ونكب عفشنا ..

اقسم بالله لو انه ماحدد مهر وقال له كلمتين حلوه اني ماراح اقصر على بنته بمثقال ذره .. بالعكس اذ حسيت انه فعلاً مشتري رجال راح يحط على ظهري حمل ويتجمل بي وبالتالي هالشي راح بنعكس على بنته وحياتها .

فيه عدة نقاط مهمه لازم اذكرها :
-بعاداتنا وعادات اهل البلد المعروفه منذ الازل ان مهور المطلقات بين 30-45 .. علماً ان هذا المبلغ اللي انا حاطه للمهر ..

-ايضاً بسلومنا وكما هو معروف ولي الامر غالباً يقول "ريال وشيمة رجال" .. مايحدد مبلغ .. خصوصاً انه يعرف انك من بيت مشهود له بالكرم والطيب والجود .. يعني ماعلى بنته قاصر باذن الله .. ( اعلم يقيناً انه من ابسط حقوق البنت الشرعية هو طلب المهر ) وانا لي حرية القبول او الرفض ..

-النقطه اللي استغربتها جداً ..
المأذون كان سابقنا لهم ، وسأل ابوها عن وضع البنت وقال الاب البنت بكر وهي ثيب !
وهالشي اكتشفته صدفه لما طلعت وجلست اقرا العقد !!
كلمت المأذون ورجع لهم طلب ورقتها بعدين عدل العقود والكتاب !

-المعروف ان ولي الامر يحط بالشروط عدم المنع من الوظيفه . بيت شرعي . يكلمني بخصوص اطفالي ، بس هو ماتطرق لاي شي غير المهر بتاتاً !!

-طليقها كان بخيل جدا جدا جدا وهذا السبب الرئيسي لطلاقها قبل عامين .. ( اتوقع ان هالحادثه لها دور بموقف ابوها ) ..

-البنت لم يسبق لها الحمل طوال فترة زواجها 6 سنوات ومع ذلك قبلت بها .. مع ان هالشي اثار الريبه في نفسي .. بس قلت دامها قبلت اطفالي وتنازلت راح اتنازل لها .. لما تتمتع فيه من مواصفات ارغبها بشريكتي .

-انا مستأجر ، وقمت بتغيير الشقه القديمه بشقه جديده عشانها فقط .. وأثثتها أثاث جديد من الى بقيمة 35 الف.

-جبت لها شبكه عشان الملكه ب8 الاف + 3 الاف لها عشان تتجهز ..

-جميع تجهيزات كتب الكتاب من فاكهه وحلويات انا جبتها بناءاً على طلبهم مع ان الكتاب ب بيتهم هههه وهذي سابقه تاريخيه لم تحدث من قبل .

-كان تخطيطي اني اتزوج باجازة المنتصف وممشي اموري على الورقه والقلم لكن ابوها خلاني احرق بكل شي مع بالغ الحزن والأسى !!

-العرف بين الناس والمجتمعات والقبائل يأتي بعد القرآن والسنه ويعتد به بالقياس وهذا معروف شرعاً .. وابوها كسر العرف عسى الله يكسر البنك اللي جالس ياكل قريشاتي ):


الزبده ..

والذي نفسي بيده اني للآن لم اشعر بأي فرحه وكأن شيئاً لم يكن .. ابوها الله يصلحه نحرني من الوريد الى الوريد ..

انا في حيره من أمري ما ادري وش التصرف المناسب اللي اسويه .. طبعاً افكر جدياً بتأجيل الزواج لأجل غير مسمى وكله من ابوها .. الله يصلحه برضوه ..

انتم اخواني واخواتي
ابي العون والمشوره من اصحاب الفكر
ويقولون ماخاب من استشار

تنويه : لاصحاب التجريح والناس القاسيه ):
اجرحوا لبى الجروح اللي تجي منكم بس اعطوا اخوكم الفقير لله حل ينقذه من هذي الورطه وهذا المأزق ):

شكراً لسعة صدوركم .. شكراً للجميع سلفاً
احبكم .

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

jwvt Hf, o'dfjd hgwh]l ,hgydv lj,r~u !

المصدر...