زوجي غريب الاطوار

زوجي غريب الاطوار

السلام عليكم ورحمة الله
اليوم جاية اكتب وافضفض واطلع شوي من الزحمة اللي داخلي
زوجي اخخ وما ادراك ما زوجي
شخصية غريبة جدا الى اليوم وعجزت افهمه
انسان غرييب جدا هادي جدا
طيب مشكلتي ياطويلين العمر والسلامة ان زوجي انسان لصقة شوي الله يسامحني
بيتنا صغير واخوانه العزوبية ماسكين قسمالرجال اللي هو شوي منعزل عن البيت
المهم نرجع للمشكله اكون مثلا بالغرفه منسدحة ع السرير يجي وينسدح وبس نقعد ع الصامت
اقوم الصاله اتكي ع الكنب يجي يتكي معي بدون هدف اروح المطبخ يجي يحوس بالثلاجه يحوس بالدواليب
هذا ايش وهذا ينوكل ؟ وهذا بكم والخ اروح غرفة الحريم على امل اني اقعد شوي لحالي ومافي امل برضة يجي المشكله تحسبون عنده سوالف ولا يتكلم لا ع الصامت ويقعد يراقبني كأني كائن غريب
والله اني استحي من نظراته خلاص اوقف الشي اللي كنت اسويه هو الله يهديه مايدري انه يحرج الواحد بالنظرات التفحصية اللي يعطيها للشخص كأنة يدرسني يوم يناظر فيني تخيلو اشتغل اكنس عينة مايشيلها عني لا تقولون لي نظرات اعجاب مدري وش لا نظرات غريبه عجزت اوصفها واذا قلت لها في شي ؟ راح سوا نفسة مشغول بجوالة وبرضة نظرات خاطفه
المهم تعبت والله تعبت وين ما اروح يطلع لي احس ماعنده اصحاب ماعنده حياه انا انسانه ما احب اطلع من البيت مرا

المهم خلاص عاد هو ما صدق خبر صار مقابلني اربع وعشرين ساعه بالبيت مايروح مايجي صرت ما اصدق شي يخلص بالبيت علشان انشب له يروح يجيبه ع الاقل اقعد ربع ساعه لحالي
طحت لي بحركة قبل فتره كانت من افضل الايام اللي مرت من يوم ما اخذته
اسوي نفسي نايمه بالليل واخليه لين يناااام واقوم عاد واعيش حياتي اقعد مع نفسي شوي والله يا اني احس بشعور حرية بشكل محد يتخيله بعدين انام الصبح واصحى الظهر اسوي القهوه والاكل له ولاخوانه بعدين يجي العصر تعبانه بنام واروح بنام القاه جاي بينام بعد مع انه مو وقت نومه ولا متعود على ذا النظام بس وش اقول
المهم ياطويلين العمر بعد اسبوع من حركتي الرهيبه ذي اكتشف الاخ وسوا نفسه نايم وخلاني لين اطلع واجهز قهوتي وترويقتي وجاء لحقني بيكمل السهره ما احكيلكم عن شعوري لما شفته بعدين لما يجي مايتكلم مافي ملامح في وجهه بس يجلس يتكي ع الصامت بعدين بعد شوي تبدا الاسئله عاد قلت بشوف وش اخرتها سهر معي للصبح ونام :cry: والله انهرت ياخي هذا الوقت الوحيد اللي قاعده احس فيه بنفسي الحقيقه اللي اختفت من يوم ما تزوجت هو من نظراته لاني قادرع اجلس براحتي ولا اكل براحتي ولا اتفرج براحتي ناشب لي نشبه
نفسي يوم يطلع برا البيت من نفسه نفسي يقولي معزوم عند واحد من خوياي نفسي يروح ويجي نفس باقي الشباب حتى دوامه دلع يداوم يوم ويسحب شهر واخوانه اللي عندنا يروحون ويجون ويطلعون ولا يفكر يطلع معاهم اقوله روح مع اخوانك غير جو يقول مالي خلق واذا اصريت عليه وراح يرجع على طول لما يروح زواجات عيال عمه مايقعد ساعه الا راجع
صرت اغبط ولا احسد الحريم اللي يشتكون من قعدة ازواجهم بالاستراحه والله انكم بنعمه ما تتخيلونها اقل شي تكلمين صاحباتك اهلك براحتك تسوين خلطاتك تجلسين شوي مع نفسك تشتاقين لزوجك يصير عنده مواضيع جديده تتكلمون عنها يعني تعطون بعض مساحه تتنفسون فيها
قاعده اقنعه يروح يشتغل باي مكان عقار اوبر اي شي يشغله قال ماني محتاح الحمدلله قلت له زياده الخير بركة لكن لا حياه لمن تنادب
قاعده اقول جيب سوني وشغله العب اون لاين ابغى شي يشغله زي الاطفال يقول مو جوي ما عنده اي اهتمام بالحياه حتى الجوال ما يقعد علية زي العالم اذا شافني اتفرج مسلسل مليوون سوال عنه بعدين يقول بالله كيق تتابعين الاشياء ذي مقدر اسوي شي براحتي مقدر اكلم براحتي مقدر اعزم الناس اذا عزمت وحده راح وتكى في المجلس لحاله قريب من الصاله وخلاص احسه يسمع سوالفينا فا ما اخذ راحتي اصلا كل اللي يجوني عارفين انه موجود فا مايطولون على طول يمشون
اكيد معظمكم يشوفها ماهي مشكله وبتقولون لي احمدي ربك الحمدلله على كل حال طبعا
لكن الشي اذا زاد عن حده انقلب ضده وهو ليته من الناس اللي يوسعون الصدر بسواليفهم لا كله اسئله بعدين يقعد ع الصصصامت مايتكلم
ايش الحل ايش اسوي احس اني بنفجر منه تعبت من كثر مايطلع لي بكل مكان
واخيرا لا اله الا الله محمد رسول الله

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

.,[d yvdf hgh',hv

المصدر...