تعقيب للمره الاولى ابي اتزوج وامي تشوف اني صغير !!

ابي اتزوج وامي تشوف اني صغير !!

السلام عليكم ورحمة الله
هذا تعقيب على مشكلتي
http://forum.z4ar.com/f116/t415538.html

وابي اصحح بعض المفاهيم الي انفهمت غلط
وراح ارد على الردود الي انكتبت

ليه كذا ،
كتبت فقدت اغلى ما املك طبعا باستثناء الي قلتيها
وهذي مفروغ منها لكن حبيبتي هي الي
كانت ماليه يومي اكثر من اهلي
ومهتمه فيني اكثر منهم وكل شي كان اكثر منهم
وبالعكس 8 سنوات كافيه اني اعرفها من جميع جوانبها
وعارف كل شي عنها ياما مواقف حصلت واشياء حصلت
كفيله اننا نعرف بعض من كل النواحي
انا ماقلت انها ملاك بالعكس انا راضي فيها بعيوبها
واما اني انساها هذي مستحيل ولو 20 سنه
لان كل شي حولي يذكرني فيها
اذا ماكان فيه شخص بدالها ماراح انساها
وشي طبيعي مع المعامله والتعود مع الزوجه
راح انساها تدريجي واهتم بالي على ذمتي
يمكن انتي مو فاهمه نظام عيلتنا شوي
ترا عائلتنا شبه مفككه
من النادر اننا نجتمع ونجلس مع بعض
كل واحد مشغول في نفسه
هالكلام الي قلتيه صعب اني افتحه معها
زي ماتقولين بيننا حواجز نوعا ما
شكرا لك

عروب1،
بالنسبه للبنت تراها رفضت 7 خطاب عشاني
وكلهم ناس افضل مني باكثر من ناحيه
لانها تبغاني وانا ابغاها وراضين ببعض
اهلها مو من النوع الي يجبرون بنتهم
لكن مرت بظروف صعبه
وانا ماعرفت هالظروف الا باخر لحضه
ماتدري قد ايش هي تحبني ولا تقدر تتركني
حسب الي فهمته انها مرت بظروف صحيه
لدرجة انو جاها الضغط على صغر سنها
واصبحت تتعالج عن شيوخ
وماصارت تكن شعور لاي شخص بحياتها
فجاه ماصارت تبي اي احد
حتى اعز صديقاتها واقاربها قطعتهم
خاصه انا الي كنت مالي يومها وماتستغني عني
وماتبي تظلمني معاها على كلامها
لدرجة انها جلست تبكي تقول مدري شفيني
شي فوق طاقتها ولا هو بيدها الي يصير
مع اني راضي فيها وحاولت فيها
حتى مو راضيه اجي اخطبها
لذلك فضلت البقاء بعيد عن كل الناس
وانا ماقدر اتامل فيها واقول يمكن ترجع
لان هالشي راح يمرضني ويتعبني

ام يوسف22،
انا اقصد ماشفتها على الطبيعه و قابلتها
لكن اعرف شكلها تماما
السبب الي خلاها تبعد كتبته بالرد الي قبلك
ومو نفس السبب الي كتبتيه نهائيا
اكيد انا ناوي اكلم يا امي او اختي
لكن مدري كيف راح افتح الموضوع

هموسة الروح ،
ماقدر انساها بكل سهوله
كل الي حولي خاطبين ومتزوجين
وهم اصغر مني
اذا مافي شي ينسيني ماراح انساها

عنفوان ،
انت فهمتني غلط ياخوي
انا متخرج من الجامعه من سنتين
واقصد وظيفه مؤقته
يعني لين يجيني التعيين الحكومي وليست دائمه
وبامكاني اجلس فيها على طول
لكن الوظيفه الحكوميه افضل بكثير
على الرغم ان راتب الشركه مناسب للزواج مايقل عن 7
اما البنت سبق وكتبت اني حاولت اخطبها
لكن رفضت لنفس الظروف الي كتبتها فوق
وهي الي خايفه تظلمني بسبب ظروفها الصحيه
وان المشاعر الي راحت ما ترجع
ومافهمت قصدك ( الخبيثون للخبيثات )
وش تقصد !!

اماني حناني،
سبق وكتبت وظيفتي الحاليه
اقدر افتح فيها بيت بكل سهوله
والحمدلله الماده موجوده
معقوله 25 سن صعير عن الزواج ؟
طيب الي اصغر مني ومخلفين وش وضعهم ؟!
وعايشين احلى عيشه
انا عارف ان الزواج كله مسؤوليات
وانا مقدر هالشي وعندي استطاعه اتحمل كل مسؤولياته
زي ما انا قايم بمسؤوليات البيت حاليا
ومعتمدين علي بكل شي

الاء،
الارتباط مو بس عشان انسى
خلاص عمري مناسب للزواج
وبخصوص البنت زي ماذكرت فوق
سبب الفراق شي خارج عن ارادتها
الا هي تبيني ولا تبي غيري ولا تبي تظلمني

اخصائي اجتماعي،
ايه ماني حق حريم وخرابيط
انا هذي البنت احبها وكنت ابي اتزوجها
لكن ماكان فيه نصيب
والي حق حريم الي يعرف كم وحده ويطلع معاهم
زي اغغغغغلب الشباب
انا ماعمري طلعت مع بنات ولا ابي هالشي
مدري وش دخل العيال في اني اوطي راسي واخجل
قصدك صغير عمريا ولا عقليا ؟

تفاؤل،
اقصد ماعمري قابلتها ع الطبيعه
واعرف شكلها تماما زي ماتعرف شكلي وماقد قابلتني
هذا مو شرط ان الي يحب او تحب
ماعندهم تربيه او فكر
انتي مادخلتي بيوت الناس ولا قلوبهم
مالك حق تتكلمين عنهم بالطريقه هذي
وتتهمينهم انهم غير مربين !!
وزي الي قبلك كتبت سبب الفراق فوق
لا عشان لقت غيري او غيره
اسباب صحيه ونفسيه والله يشفيها
واما بالنسبه للعلاقات
انا احب ادميه وابي اتزوجها
وين العلاقات والحريم والخرابيط !!
لا طلعت مع بنت ولا ابي هالشي اساسا
ولا لعبت في عرض البنت او شوهت سمعتها
والحمدلله مصلي جميع فروضي وقايم بواجباتي الدينيه
بالعكس الحمدلله شخصيتي قويه والي ابيه يصير
لكن هالموضوع ماقد انفتح نهائيا بالبيت
عشان كذا مادري كيف افتح الموضوع معهم

بنت السنافي ،
ماخانت احد هي والحب مو خيانه
والرسول يقول ( ما ارى من المتحابين الا الزواج )
او زي ماجاء بالحديث
الحب مو حرام ولا عيب دام في حدود
وانا سبق وقلت ماقابلتها ولا شفتها ولا ابي هالشي
الا بعد ماتكون حلالي لكن مافي نصيب
ولا تتهمين احد ماتعرفينه انتبهي
مو عشانها عشانك انتي
راح تحاججك يوم القيامه لانك تكلمتي بعرضها
مو كل وحده حبت واحد اصبحت زي ماتشوفين
الا الاعراض لا تتكلمين فيها



يا اخواني واخواتي
يبدو اني المفترض اني اذكر كل التفاصيل
عشان محد يألف من راسه قصه ويجاوب عليه
ويتهم خلق الله ويتكلم باعراضهم
اول شي انا ماني راعي بنات وخرابيط
بالمعنى ما اعرف الا هالادميه الي احبها
وناوي اتزوجها لكن مافي نصيب لاننا افترقنا
وسبب الفراق زي ماقلت
البنت عانت من ضغوطات نفسيه لين جاها الضغط
مع ان عمرها ماتعدى 22
واصبحت تتعالج عند شيخ الله يشفيها
وماصار بقلبها اي مشاعر لاي شخص
سواءا انا او حتى اعز قريباتها وصديقاتها
قطعت كل علاقاتها غصبن عنها
تقول مدري شفيني وكل ماعاتبتها لانها تغيرت فتره
تجلس تبكي وودها ترجع مثل اول بس
شي فوق طاقتها ومو بارادتها
وانا عارف انها الان تتالم اكثر مني بهالفراق
ولو ماتبيني مارفضت 7 خطاب بسنه وحده عشاني
حتى صارت مشاكل مع اهلها بسبب هالشي
لانها ترفض باسباب تافهه او بدون اسباب
واما بالنسبه لصفاتها
8 سنوات كفيله اني اعرف كل تفاصيلها
سواءا الخارجيه والداخليه
واذا جينا للحق الصراحه مافي مثلها صددق
لا جمال ولا تربيه ولا طريقة تفكير ولا سناعه
يعني شي يغبن كل هالشياء تتجمع ببنت
ولا تكون من نصيبك وعارفين بنات اليوم !!
لكن لازم احمد ربي على الي بتكون من نصيبي
مهما كان واعرف ان المقارنه مررض وتعب
الله يوفقها ويكتب لها ابن الحلال الي يعوضها
واتمنى محد يتهمها او يتكلم بعرضها
لاني ما ارضى هالشي ولا ربي
لكن انا ماكتبت موضوعي عشانها
كتبته عشان كيف افتح موضوع الزواج مع امي
وهي تفكيرها بالشكل الي ذكرته
وهالموضوع ماقد انفتح ببيتنا نهائيا
بحكم تفكك عائلتنا على الرغم من وجودنا ببيت واحد
نادر جددددا اني اجلس معهم بالبيت
يابغرفتي يا اطلع برا او اوديهم مشاويرهم

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

hfd hj.,[ ,hld ja,t hkd wydv !!

المصدر...