اهمال خطيبي

اهمال خطيبي

السلام عليكم
بصراحة ما اعرف كيف ابدي مشكلتي
تفكيري مشوش بس ان شاء الله تفيدوني
اني مخطوبه لي 4 شهور وكتبت كتاب ( عقد قران)
لي شهر تقريبا، خطيبي من ابناء عمامي، قبل عقد القرآن
بشهر او اثنين طلب انو يتواصل معي حتى نتعرف على بعض
اكثر تم التواصل بعلم الاهل، طبعاً كان تواصلنا بحدود واحترام
متبادل بين الطرفين، مشكلتي هي انو من هذيك الفترة وهو
يوم يظهرلي انو هو مهتم بيه كثير كثير وعشره ايام اهمال في اهمال
وكنت احس تواصله معي اجباري او تسقيط فرض ، واجهته بهذا
الموضوع وانو ليش هالتناقض ووالخ، قلي عندي اسبابي بعدين تعرفينها
بس اتأكدي انو ماكو اي شي اتغير اتجاهك واني متعلق ومندفع اتجاهك
فوق ماتتصوري سكتت وتحملت هالوضع وقلت يابنت لا تنكدي وتحملي
يمكن السبب انو لسه ما عقدنا القران وهو متقيد ، او او، يعني بديت اطلع له اعذار ، تم عقد القران وشفت بعيونه كيف يحبني ومهتم فيني، ويوم حفلة المهر
اعترف لي ان هو يحبني ( اني كنت متفقه معاه انو مايقولي كلمة حب اذا ما نابعه من قلبه) اني كذلك اظهرت له مشاعري بالحب، سألته ليش الفتره الماضية تغيرت علي، قلي لأنو ما كنه عاقدين القرآن ومن هذا القبيل، المهم بعدها صار يهتم بيه ويسأل علي الصبح ويتصل بالليل يعني اهتمامه واضح، بقى فترة
اسبوعين تقريبا وبعدها تدريجياً صار يقل اهتمامه، مره من المرات اني طفرت روحي من هالوضع، عاتبني انو ليش ما تسألين لو اني اسأل لو انتي ماكو
اني اسأل بس مو كثير لأنو اولاً هو دوامه من الساعه 8 الصبح لل3 العصر
بعدها يرجع يتغده يرتاح للساعه 6 من المغرب لل12 بالليل مع اقاربه و اصدقائه قلت له قبل لا تعتب علي اعطيني موعد اتصل في عليك، قلي وقتي كله لك انتي زوجتي، قلت له صح كلامك بس اني ما اخذ راحتي بالكلام لأن احسك متقيد من اللي يمك، صدقوني يا جماعه اني تعبت من هالوضع اني بنت واحبه واللي يحب يحب الشخص المقابل يهتم بي كدليل محبه، يمكن تقولون انو اني ممله او شي بالعكس والله ما امدح نفسي بس اللي علي اسوي، احاول دائماً مواضيعي وياه تكون متجددة حتى ما يحس بالملل مني، وهو ابد ما يفتح مواضيع الا ما ندر دائماً يطلب اني اللي اتكلم، بالوقت الحالي صرت ما اسئل واتصرف مثل ماهو يتصرف، ومطنشه عالاخر، بس من داخل تعبانه ومنزعجه، جيت هنا على امل احد يقدم لي نصيحه تفيدني او كيف اتصرف، على فكره اني قبل عقد القران اي شي انزع منه اعتابه قلت حتى ما تصير بينه فجوه ونكون من البداية صريحين مع بعض، وهو كان دائماً يقولي الحق معك، بس مايحاول يغير شي، للعلم هو ابد ما عنده سوالف صداقات مع بنات او من هذا القبيل واخلاقه حلوه يعني مستبعد انو اكو بحياته وحده ثانيه ، شباب لو انتوا بمكانه شنو كان جوابكم علي؟ ، بنات لو انتن بمكاني كيف رح يكون تصرفكن؟

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

hilhg o'dfd

المصدر...