ابغاكي بحلوك ومرك

ابغاكي بحلوك ومرك

السلام عليكم انا متزوجه من 3 سنوات بعد قصة حب وعندي طفلين والآن انا في فترة النفاس الفترة الاخيرة مع ضغوط العمل والحياة وظروف الحمل سارت مشاكل كبيره مع زوجي وكان متحملني مراعاة لوضعي ووضع البيبي ..
زوجي إنسان جدا طيب ومتعاون وحنون وكريم وكان يحبني من قلب ..
بالمقابل انا انسانه جدا عصبيه وتجيني نوبات غضب ماقدر أسيطر فيها على نفسي ..
قبل الزواج شرحتلو وضعي واني جدا عصبيه وهادا عيب فيا من قبل لايسير اي شي رسمي وقالي( انا ابغاكي بحلوك ومرك انتي فيكي اشياء وصفات تغطي على عصبيتك وانا حبيتك زي ماانتي)
ويوم الشوفه مسكو الوالد وقله بنتي حنونه جدا وطيبه جدا لاكنها عصبيه ..
وبعدها ملك عليا وتمم امورنا ..
وبدات الحياة كأي زوجين ..
بعد 6 شهور حملت وفِي الشهر الاول اكتشفت كارثه عن زوجي زعزعت علاقتنا شويه ومع الحمل نفسيتي تعبت بزيادة وعصبيتي زاااادت ..
وكم مرا كنت اخرج رعلانه ابغا اروح بيت اهلي ويرجعني يرفض اني اخرج ..
بعددها ولدت وطول فترة الحمل مشاااااااكل ..
وبعد الولاده جاني اكتئاب الولاده وبرضو مشاكل ونكد ..
بعدها بسته شهور تقريبا او 7 حملت عالمانع كانت صدمه عمري ..
والحمدلله على كل حال ربي رزقني بضنايا ..
وطول فترة حملي مشاكل مشاكل وكان يقلي ترا متحملك عشان وضعك ..
والحق هوا جدا متعاون معايا كان مايخليني اطبخ وجاب شغاله ويساعدني في بنتي وراحمني ومدلعني يقلي كافي عليكي دوامك ..
بالرغم من كدا طول فترة حملي مشاكل ماعرف هوا عين هوا ايش مادري ماتحمل كلمه منه الناس ليها الظاهر ويسحدوني عليه محد يعرف كيف عيشتي ومشاكلي..
طبعا الكل حيقول ليش المشاكل وهوا بهادي الطيبه مشاكلي كلها بسبب الكارثة اللي اكتشفتها ومحسستني بعدم الأمان بالإضافة الى عصبيتي الشديده ..
المهم ولدت الحمدلله قبل شهر ..
وتعبت جدااا في الولاده اكلت الم الطبيعي كله وفِي النهايه ولدت قيصري بالله كيف ممكن تكون نفسيتي ؟؟
كانت تجربه جدا صعبه بكل تفاصيلها شفت الموت فيها ..
بعدها في المستشفى كان يعاملني بمنتهى الحب والطيبه والحنان وانا كانت نفسيتي جدا تعبانه بس ابكي ومنكده ومابغا استقبل الضيوف وتعبانه جدااااا وكارهه الحياة ولحد يسألني ليش لأني انا ماعرف ليش ..
فرحتي مكسورة كانت في ولدي وغير كدا كانت في مشاكل بيت اهلي وكنت متأثره جدا عالوضع اللي هناك ..
المهم جلست 4 آيام وبعدها خرجت البيت ..
ومن اول يوم رجعنا بيتنا ماكان طايقني .. بس يستنى شي عشان ينفجر .. وانفجر ..
الشهر دا يومين نتصالح ويومين نضارب ..
يومين حلوين نحن لبعض ويومين زفت وعلى دا الحال ..
الين تقريبا قبل 3 ايّام سارت مشكله كبيره وسار تجريح بالكلام عمري ماسمعته كلام يعور القلب ولمح انه مايبغاني ولمح انو يبغاني اخرج من البيت ..
انا على طول خرجت وحسيت الموضوع لامس كرامتي وتركت أولادي من 4 العصر الا 9 الليل على بالو اني عند اهلي وانا رحت الحرم ماكنت عندهم ولايعرفو شي الا اخويا الصغير اللي وداني ..
جلست الا بعد صلاة العشا وانا في حالة انهيار بعد الملام اللي سمعته أحسه يرن في ادني ..
وبدا الحليب يتحجر في صدري وقلبي يتقطع على ولدي ( في حليب جاهز مفرزن في البيت ) مع العلم ماقلي خلي اولادك انا خرجت وتركتهم ..
وسرت اشم ريحته في يدي وعبايتي قلبي يتقطع عليه..
كلمت اختي الكبيره في مقام أمي ..
قلتلها ابغا الطلاق
انصدممممممت
كيف وكيف ؟؟
وكيف تخرجي وتسيبي طفلين عنده لحالهم كيف هان عليكي ووو الخ ..
الان ترجعي بيتك !! طيب كيف ارجع مايبغاني .. شبه انو طردني ..
كلمته .. وقلها ابغاها خليها ترجع وتهدى وتبطل عصبيه ..
رجعت بس مني قادره أكلمه مو قادره انسى الكلام اللي قالو مو قادره أبدا اتجاوزه ..
قلبي محروق نفسيتي مدمره .. وماعرف ايش وضعي عنده أتوقع يكرهني ورجعني بس عشان الأولاد ..
ايش اسوي ماعرف ايش اتصرف وكيف أدبر أموري معاه ..
يكلمني الكلمه اللازمة وطبعا ماينام معايا في الغرفه ..ينام لحاله ايش اسوي هل استمر في الوضع دا ولا في حلول اخرى ..
اختي طلبت اني اعتذر منه وأسلم على رأسه بس والله العظيم مجروحه مني قادره مني قادره افيدوني

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

hfyh;d fpg,; ,lv;

المصدر...