جمعنا القدر و فرّقنا

جمعنا القدر و فرّقنا

السلام عليكم ورحمة الله وبركاته
بعد ماضاقت بي السبل وكثرت علي الضغوطات قلت أستشيركم والمستشار مؤتمن
قصتي طويله تحملوها ارجوكم لأني محتاره ولاني قادره اتخذ قرار
بكتب لكم من البدايه حتى تفهمون المشاكل وتنصحوني
أحس إني ماني بعلم وكل اللي جرى حلم
انقلبت حياتي رأساً على عقب بدون أدنى تدخل مني

ونصيحتي لكل رجل .. لااااا تظلم زوجتك وأبنائك في سبيل إرضاء رغبات أهلك وأعط كل ذي حق حقه.



قبل مده تشاوروا أهل زوجي وباعوا بيتهم لأنه قديم ومهوب عاجبهم وخرجوا منه هم و ولدهم الثاني المتزوج و أعطوا زوجي الفلوس لأجل يشري لهم أرض ويعمرها ونسكن كلنا جميع
المبلغ اللي عطوه مايغطي قيمة أرض أصلاً في المنطقه اللي هم راغبين فيها
خذا زوجي مني كل ورثي ياللي ما أملك غيره كان عندي مبلغ طيب كنت ناويه أستثمره في أرض أو شقه لكن كان حاط عينه عليه ويرفض ويقول خلي فلوسك يمكن أحتاجها انتي اقرب الناس لي اتدين منك ولا اطلب من الغريب وسمعت كلامه لأني أثق فيه وهذي كانت أول غلطاتي معه
أذكر لكم ان عمر زواجنا 10 سنوات وأنا وياه في الثلاثين وعندنا ثلاثة أطفال وقتها اكبرهم تسع سنوات ومن عشرتي معه كنت أحبه بجنون ومتعلقه فيه ومافي داعي أذكر كيف كانت حياتنا سعيده وتكاد تكون مثاليه وكل اللي حصل شي غصب عنا كله بسبب اهله الانانيين والاتكاليين و ماحسبت حساب تقلبات النفوس


المهم إنه شرى القطعه وبدأ بالعمار وباع كل شي وخذا قروض على راتبه وديون لين صرنا عالحديده بسبة هالبيت والله إنه مر العيد ماشريت لعيالي الا من ابو 10 كل واحد قطعتين وانا خذيت بلوزه وكلها 70 ريال و عصب علي وقتها ونكد علينا وبكاني واني مسرفه وماراعيت ظروفه كان مقصر علينا جدا في مقاضي البيت وكنت استحي من عيالي لاسيرنا على اهلي ياكلون تقل مفاجيع من الجوع وراتب ابوهم خير ونعمه لو انه باقي لهم , ومقصر علينا بسبب اهله وانانيتهم وهم عايشين ومبسوطين ولافكروا في ظروف ولدهم
بتقولون وحيد اهله بقول لكم لا عندهم غيره لكن زوجي موظف واخوه عنده تجارته الخاصه وهم نظرتهم ان الموظف بنك متحرك وان اخوه مسيكين ماعنده شي وزوجي الملزوم يوفر لهم سكن ويلمهم كلهم تحت جناحه بما انه الكبير وهو شهم جداً وعزيز نفس لدرجه انه والله استاجر لهم في نفس حينا قريب منا و صار يدفع لهم اجاراتهم اول سنه من فلوس بيعة بيتهم و اللي بعدها من جيبه
وصلنا لمرحله كنت فيها أنا المتنفس لغضبه وزعله وضيقته وأي شي يصير له من العمال من اهله من ضغوطهم أنا واجب علي أتحمله واكل تبن واسكت صار عصبي جداااا جداااا يسبني ويشتمني ويغلط علي ويلعني ودايم يقول اذلفي عني وعن حياتي مانيب طايقك ويضرب عيالي ياللي يشوفه يقول مهو صاحي مجنون وكنت صابره متحمله حتى اخواني وخواتي محد يدري عن حالي الا أمي ربي يطول بعمرها كانت تصبرني وتعطيني اللي يمشي اموري وتساعدني بعد ماراح زوجي الطيب الحنون وصار وحش قلبه قاسي علينا وانقلب 180 درجه كنت احس رجفه في قلبي اذا سمعت صوت مفتاحه في الباب من سوء أخلاقه
صبرت صبر مايعلم فيه غير ربّي
الين قبل سنه تقريباً من الآن
وقتها كنت حامل للمره الرابعه ولا أحد يقول ليه حملتي بهالظروف الصعبه الحمل رزق ومكتوب من الله ولا اعتراض على حكمت الله
المهم كنت داخله شهري في بدايته وكان حملي كله تعب في تعب حتى النفسيه زفت

المهم
يومها اتصلت عليه العصر قلت انا خارجه امشي رايحه حديقة الحي مع عيالي قال روحي وخرجت
بقينا في الحديقه انا احاول امشي مثل مانصحني دكتوري لتسهيل الولاده و عيالي يلعبون لين تعبت قبل المغرب وقلت لهم يالله رجعنا
في طريقنا مرينا من تحت العماره اللي ساكنينها أهل زوجي واخوه وعيالي شافو سيارة ابوهم وقالوا بنطلع عندهم وطلعنا وليتنا ماطلعنا

ذاك اليوم زوجي تكلم معهم وقال لاخوه ان البيت وقف على التشطيب وكل واحد يشطب الدور الخاص فيه ودور اهله خواته الموظفات يحطون لأمهم وأبوهم وخلاص يسكنون لأن ماعنده القدره الماديه يكمل
عصب أخوه بحجة انه ماعنده الا شي بسيط وزوجي اللي بنى المفروض يتحمل ويكمل وصار بينهم تتش وتلاسنو و صارت مشكله
اخوه نزل شقته دخل على زوجته و مدري وش صار بينهم قام نازل فيها ضرب راحت لأهله تشتكي ولدهم وعرفت هي وقتها ان زوجها تهاوش مع زوجي وكلهم حطو اللوم على زوجي وكلمته امه و اخته و حتى زوجة اخوه كلمته تقوله لاتضغط على اخوك و لاتخسرون بعض بسبة الفلوس تراها وصخ دنيا وكل الموظفين يساعدون اهاليهم وكفايه اللي سواه فيني بسببك وقامت تبكي له وحن عليها ابوقلب رهيف طبعاً هذا كلامه بعدين وتبريره للي سواه
في هذيك اللحظه دخلنا انا وعيالي وانا مدري وش صاير عندهم لكن واضح فيه شي الجو مشحون

سألت وش فيكم عسى ماشر ؟ قام علي مثل الشيطان الرجيم كلي ... انتم وش جابكم قومي تقلعي انتي وعيالك وسب وشتم افجعني قلت وش فيك بسم الله عطاني كف ورى كف ضربني ضرب مارحمني ولارحم ضعفي و حملي
والله اني لأول مره في حياتي أنضرب وأنهان ابوي الله يغمد روحه الجنه ماضربني صغيره حتى يجي هالوصخ الله لايوفقه يضربني كبيره وقدام عيالي واهله ومرت اخوه عشان يوريها مو بس انتي انضربتي حتى زوجتي تنضرب مثلك
حاولوا يفكوني منه وانا اصرخ وابكي وبلحظة غضب مسكني بقوه وقال لي انتي طالق طااالق تعرفين وش يعني طالق ؟ ودفني وطحت وانا الصدمه والضرب شلت تفكيري ولساني وطلع وكانت ذيك اللحظات اخر مره لمسني فيها
بسبة الضرب خرجت من بيت أهله على المستشفى ويتصلون عليه مايرد على جواله مدري مسكره وصلنا وقالوا عمليه طارئه لأن صار انفصال في المشيمه و النزيف كان حاد وقالوا للدكاتره اني تزحلقت وطحت خايفين على ولدهم لا اشتكي عليه وأقل من ساعتين وانا والده وعيالي في الحضانه وأنا ربي وحده اللي عالم بحالي ماني قادره استوعب اللي حصل والله اني جلست طول اربعيني عقلي مومعي مفهيه وهدني التعب الجسمي والنفسيه الشينه ودمعتي مانشفت
طولت عليكم وبختصر لكم الباقي
خبرو اهلي وجاتني امي مع اخوي وجاحضرته مدري وش الحاله اللي صابتني يوم شفت وجهه قمت ابكي واصرخ ونا مافيني حيل واقول خرجوه مابي اشوفه بعدها اهلي عرفو باللي سواه وراح له واحد من اخواني وكفخه وصارت مشاكل بينهم

ومن يومها لليوم توأمي دخلو شهرهم الحادي عشر وقريب يكملون السنه وانا الحمدلله بفضل الله ثم دعم اهلي تجاوزت الاكتئاب و النفسيه و صحتي زانت ورجعت مثل قبل واحسن الحمدلله من قبل ومن بعد
وبحكم الشرع انتهت عدة طلاقي منه بولادتي
أسرع فترة عده بين طلاقي و ولادتي ساعات معدوده
حاول وراح للمفتي حتى يقول له الطلقه لاتحتسب ولكن تم احتسابها طلقه واحد و يجوز له ردي لعصمته بعقد ومهر جديدين
جاني يبكي يعض اصابع الندم على كم سنه عيشنيها في عذاب ومهانه وكنت صابره عليه لين قرر ينهي حياتنا بيده
حاول مرارا وتكرارا ارجع وماخلى احد يعتب عليه لاقريب ولابعيد حتى يقنعني يقول البيت الآن اكتمل وشطب اللي كان المفروض دورنا باقي أختار الاثاث على مزاجي ويبي يدفع لي مهر جديد بس اعطيه فرصه مدري كيف دبر اموره لانه ماعاد يهمني

قطعت علاقتي فيه وفي اهله كلهم

لكن من يوم العيد لليوم وهو يحاول وحتى اهلي صارو في صفه ويقولون لي سامحيه وارجعيله الرجال مندمر وكل من شافه حزن على حاله
وانا خلاص عفته وطاب خاطري منه صفحته انطوت من حياتي ومابيني وبينه الا هالاطفال يجي ياخذهم متى مافضي لهم ويرجعهم متى ماحب
سوء معاملته لي في نهاية حياتنا دمرتني و احرقت قلبي و مسحت كل ذكرى جميله بيننا والله مو بيدي لكن القلوب بيد ربنا احس بحقد عليه ولاني متحمله اشوف وجهه كل مافكرت بالرجعه اتذكر ضربه وسبه والعيشه الزفت اللي اجبرني عليها
شورو علي ارجع له والا اجلس على عيالي اربيهم احسن تربيه بعيد عنه؟لأني اخاف يستمر في معاملته السيئه
افكر اطالبه بالمبلغ اللي سحبه من حسابي افتح لي فيه مشروع لاني بدون وظيفه واحتاج تأمين لمستقبلي سواء رجعت او لا

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

[lukh hgr]v , tv~rkh

المصدر...