ام زوجي تبي تعزلني عن الناس

ام زوجي تبي تعزلني عن الناس

تزوجت وسكنت في قرية بعيدة جدا عن أهلي وما أعرف فيها أحد
حتى زوجي وأهله عرفونا عن طريق صديق أبوي
المهم
علاقتي بأهل زوجي زينة
اعتبرتهم مثل أهلي وأحيانا أقدم لهم خاصة أمه اللي ما أقدمه لأمي
وإذا صار عندها عزيمة ولا شي تعطيني أصعب شغلة عندها وانا ما عندي مانع أبي أساعدها وهي تدري
إلى الآن كل شي تمام
لكني لاحظتها تبي تعزلني عن العالم

مثلا صار في عزيمة ما تقول لي أو تقول لي ترا فلانة عازمتك بس برد عليك وعلى الصغار اجلسي ببيتك احسن
وإذا أحد صار عنده مناسبة تحثّني ما أحضرها وتقول لي هم جو لك؟ هم وجبوك بأي مناسبة؟
وصرت فعلا أكره أروح وأجي أثرت علي بذكائها أنعزلت عن العالم بدون ماانتبه لنفسي مع اني اجتماعية

وقبل يومين كلمتني وحدة عزمتني وأصرت علي أحضر وفعلا حضرت عزيمتها
راحت أم زوجي لهذي الحرمة وقالت لها ترا فلانة اللي هي أنا تقول عنكم وتقول وتقول .. فلا عاد تعزمونها وافتكو منها
وصلني الكلام ومتأكدة منه مليون بالمية لأنه مو أول محاولة لها تعزلني عن العالم وتكرّه الناس فيني

أنا ما أبي أرد لها كيدها بالعكس ووالله والله أني أشعر بالشفقة عليها
حرمة كبيرة وتفكيرها بهذا المستوى ؟
حسيت ودي أجلس قدامها وأقول لها ليه تعاديني يا أم زوجي وجدة أطفالي وش بدر مني عشان تكرهيني وتكيدين لي؟ بس مستحيل أعاتب قلب يكره؟ شخص يكرهك ويظهر لك الحب شلون تعاتبه مستحيل؟ ولا تلوموني ع صدمتي يعلم ربي عمري ما عاديت شخص ولا كنيت الحقد على احد ولا نقلت حكي لأضر مخلوق
وحتى زوجي مستحيل أقول له ولا أخرب صورة أمه قدامه

بس أبي شي واحد
أبيها تدري أني فاهمة حركاتها
سؤالي لكم كيف أحسسها بأني أدري أنها تحاول تخرب بيني وبين الناس بدون ما أقول لها عن الكلام اللي وصلني

( قد يحس البعض أن مشكلتي تافهة بس هي فعلا مأرقتني من كم يوم.. للعلم مثل ما قلت لكم عايشة بقرية بلا خدمات و لا أشوف لا أم ولا أخ ولا أخت ومع ذلك أم زوجي وخواته مستخسرات فيني أتعرف ع الجيران وأجتمع معهم؟؟.. وزوجي توصفه جملة: رجل قرية ما همه إلا نفسه )

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

hl .,[d jfd ju.gkd uk hgkhs

المصدر...