ابيات .*. دينيه

ياذا الجلال اللي عروشك فوق واملاكك حدر
مهما تسامت به عروشه مستحيل يطولها
ياحي ياقيوم ياذا الانافه والكبر
منافسك في عظمتك مكر العباد وغولها
ولانافسك من عمر بيوته على سطح القمر
واللي ترسي فوق اقاليم المياه اسطولها
ولانت بحاجة من عبد ولابحاجة من كفر
ولابحاجة ثابت الدنيا ولامنقولها
انت السميع لمن حمد وانت المزيد لمن شكر
واللي مايشكر نعمة منعم عليه تزولها
ياذا الجبروت العظيم يالقدير المقتدر
تفزع لنا في معضلات مانريس حلولها
تلعبنا خلان فرغتنا كما لعب الكور
ان اقبلت صاحوا لها وان ادبرت صاحوا لها
لا هبنا الطايف بعض الاحيان في فية عصر
شهب الليالي من ورانا يسحبن ذيولها
انت السلام اللي لك الاسلام وانت المشمخر
اللي عجايب قدرتك في المعجبين ذهولها
سلام يا محمد رسول الله راع الوجه الاغر
وسلام ياروح ملائكة السماء صلولها
وسلام يابو بكر ياعثمان ياعلي وعمر
وسلام ياسبع الافاق اطلالها وسفولها
وسلام يا شمس الضحى تشرق على بر وبحر
تشرق على كل الدير جبالها وسهولها
وسلام ياصدق النوى سلام ياوسع الصدر
سلام يامفتاح بيبان الفرج وقفولها
سلام ياغر السحاب اللي يتبجح بالمطر
وشم الجبال اللي يتبجح بالسحاب قذولها
وسلام ياهوج الرياح اللي عطاها مستمر
مهما خذو منها من الحسنات ماردولها
ليت اللحى اللي لنا بوجيها حق وقدر
ماتضمحل من الزمان ولانشوف سمولها
وياليتنا لاما سرحنا اليوم الابيض من فجر
تبطي عباة الليل ماتضفي عليه سدولها
والا ليامنها ضفن سدولها يطلع بدر
ياصل ضياه اللي على الكوره تطق طبولها
المعتبر ياخذ على الدنيا دروس من العبر
والناس يكسبها معاملات قد عقولها
احيان تصدف لعبة الشاطر مع غلطة عمر
مره لكن لاعدت الغلطه ماعاد ينولها
وحنا عرفنا كلنا ماطال من شئ قصر
والاحلام ماتوا قبلنا شرهين ماوصلولها
حتى الجمال اللي نحملها الهقاوي بالصبر
يالله بحملتها تقوم وتدرج بحمولها
والحب سيسان العباده والعباده بالجهر
اما قدرت تقولها وجه الصحيح يقولها
يسرون عميان المحبه تيه في غدر الغدر
للي تحد سيوفها واللي تعن خيولها
ولاتفكر في غناه ولاتفكر في فقر
وتشفع لبيضان الصدور حضوضها وفعولها
واهل التكلف بالمعرفه والتصنع بالبشر
والله ماهي حول الصحيح ولاالصحيح بحولها
اللي يفضل مايقيم بو (مائه) من بو (عشر)
حتى الفضوليه عن الفاضل بطل مفعولها
اللي تخبره لحيته ذا طولها يصبح بزر
واللي تخبره بزر يصبح لحيته ذا طولها