خطيبه اخوي وامها

خطيبه اخوي وامها

السلام عليكم،
انا من الامارات. وعايلتنا والحمد لله عندها خير و اخوي يشتغل بوظيفه زينه وراتبه زين. قبل فتره خطب بنت كان يحبها معاه بالجامعه. هالبنت من بلاد المغرب، ابو هالبنت يشتغل طباخ ووضعهم قبل كان جدا تعبان الي ان خلصت البنت جامعه و اشتغلت و صارت تصرف علي اهلها، بمعني اخر شوي ساعدتهم لكن للحين يعني وضعهم مو ذاك الزود. ساكنين بشقه تعبانه لكن اهون عن الي ابوهم كان مسكننهم فيها قبل لا تتوظف البنت.
وحتي يعني ملامح هالبنت جدا عاديه وحتي يمكن اقل من عاديه اخوي احلا عنها بمليون مره لكن هو يبغيها.
ابوي قال لابوها وقت الخطبه،
مهرها 20 الف درهم اماراتي
تجهيزاتها 10 الف درهم اماراتي
وذهبها 20 الف درهم اماراتي
وشبكتها ( طقم عقد و اسواره وحلق و خاتم ذهب او الماس ) بيكون علي المعرس يعني اهو بيدفعه من عنده و ماحدد سعر فعشان جي اهما استغلو الوضع
وغير هاذا الدبله الي هي خاتم الزواج راح يكون ايضا علي اخوي اهوا الي يدفع فوق الفلوس الي عطاهم
و ايضا فستان العرس اهي تختار و هو بيشتري لها
و العرس علينا وحتي الاكل الي بيجيونه وقت عقد القران فبي اهل العروس نحن بنجيبه
ومع هاذا ابو العروس ماعجبه و قال 20 الف ماتكفي حق ذهب وانا الي اعرفه ان المواطنين الاماراتين مجرد المهر مقدم 50 الف درهم اماراتي و مؤخر 50 الف درهم اماراتي.
بعد ماابوي تفاهم معاه واقنعاه ان هاذا الولد في بدايه عمره و مايبغا ياخذ ديون و يبغا يبدء حياته يشتري بيت و ياثثه و يعني اقلهن مهرا اكثرهن بركه و ساعه كامله المهم اقتنع ابو العروس وراح بعدها بشوي يكلم زوجته يقول لها الذهب شويه وجت ام العروس قالت ان يقولون الذهب 20 مايكفي والاسعار غاليه، امي قالت لها ان اهيا مهرها وتجهيزاتها كان نفس السعر طلعت عذر امها ان هاذا كان قبل 25 سنه المهم قعدت تقنعها امي و قالت لها اذا نقصها شي بنزيدها و مابنقصر معاها.
قبل كم من يوم رحنا نشتري دبل زواج و شبكه للعروس من سوق الذهب عشان وقت عقد القران تلبسه اول شي قعدو يختارون دبله العروس وابنت وامها عجبهم واحد من الخواتم و بدون لا يسالون عن السعر او يراعون فيه عالطول قالو هاذا عاجبنا وراحت بعيد عشان تشوف بقيه الذهب. طبعا اخوي انحرج وابوي نفس الشي طلع الخاتم ب 10,500 درهم، خلو هاذا ع جمب واحنا نختار محلات ثانيه حق الشبكه ابوي كان يعرف محل اسعاره زينه وعنده خصومات واحنا رايحين نمشي مرينا صوب محل الشعيبي للمجوهرات وهاذا يعتبر اغلا محل للذهب يحسبونه عالمصنعيه جدا غالي، ام البنت نادت امي وهي تمشي قالت لها خل ندخل هالمحل نشوف ، سارت صوب اغلا المجوهرات بالبدايه واختارت طقم جدا غالي بعدين ابوي قال حق الرجال الي يبيع مانريد هاذا الزبده الام اختارت طقم ب 23 الف درهم و سالت بنتها اذا عجبها والبنت متردده ف امها قالت لها روحي جربيه يمكن يعجبك. اخذناه بالنهايه. يعني باختصار الذهب مال العروس كله ع بعضه يطلع 55 الف لان امها طلعتها منا.
انا مو بس مقهوره من الفلوس انا مقهوره من اسلوب الاستغلال يعني قبل الخطبه كانت تقول احنا ماعندنا شروط و بس نبغي الستر وبعدين صار مايعجبهم شي ويطالعون فوق بس لان مواطن او اماراتي.
يعني نكون واقعين وحده ابوها يشتغل طباخ راتبه مايتعدا ال 4000 الاف مو عاجبهم المبالغ الي عطيناهم؟ بس لان مواطن ؟ يعني لانه مواطن لازم يحلبونه و يطلعون منه.
اذا كان ولدهم بيتزوج بيعطي زوجته اكثر من هالمبلغ الي عطيناهم؟
احنا قلنا طالما ان وافده ووضعهم تعبان اكيد بتكون متطلبتها قليله لكن اهما حاطين روسهم بروس الكباريه وانا مااقول هاذا بعنصريه احنا اصلا لسنا تجار مجرد ميسوري الحال الحمد لله واحسن عن الكثير من المواطنين الثانين ومع هاذا مرات مايكفينا الراتب.
يعني وحده بمثل حالها متعوده تشتري ذهب قيمته فوق العشرين الف ؟ يعني بنات الوزراء و التجار متعودات علي هالمصاريف ف من المتوقع ان يطلبون هالمبالغ لكن وحده بمثل حالها ليش موعاجبهم و يطلبون الغالي وهم وضعهم اصلا تعبان ! وحتي كلام ابوها يوم يقول المواطن يدفع ! وفوق هاذا كل شوي تعيد و تكرر اهيا وامها يبغون حفله في قاعه وبينتظرون لين شهر 3 عشان ذاك الوقت بيفتحون القاعات معنه الحين كورونا كل القاعات مسكره وكل الناس تسوي العرس ببيوتها اهيا في شو احسن عن بنات الناس ؟ اقل قاعه سعرها 50 الف درهم.
والله مقهوره اكره الاستغلال وخاصه لان كثير ينصبون و يستغلونا نحن الاماراتين لمجرد ان اماراتين.

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

o'dfi ho,d ,hlih

المصدر...