أقسم بالله أنها حقيقة 😞

أقسم بالله أنها حقيقة 😞

السلام عليكم

بدخل على طول بقصتي ...

أنا بنت غير متزوجة عمري 33، أسوق سيارتي و اروح دوامي وقبل اطلع اقول اذكاري و اكثر من (( اللهم يامقلب القلوب ثبت قلبي على دينك)) و (( اللهم اني اعوذ بك من أن اضل أو أُضل ....الخ)).

دوامي تقريباً من الساعة 8 إلى الساعة 5 العصر، بالصباح أمر آخذ كوفي من مكان ما اغيره دايم لانه بطريقي، و انا راجعه آخذ غداء من مطاعم بنفس المنطقة.

طبعاً أنا عندي قناعة ما اتزوج بدون ما احس بانجذاب بالشوفة أو على الاقل راحة و قناعة بالشخص اللي شفته
ومارح اتزوج عشان الناس تسكت، غير اني سبق ملّكت و انفصلت كونه يشرب و يتعاطى للاسف، ومن بعدها زادت عندي هالقناعة.

عشان تعرفون بس جزء من شخصيتي، عمري ما طالعت برجل في مكان عام او حتى بصورة أو مسلسل وقلت هذا وسيم و الا تخيلت هذا فارس احلامي أو أو ، يعني ولاعمري انبهرت بمنظر شخص.

جاء يوم من الايام وكنت اخذ غداء قبل كورونا بشهرين يمكن ومر شخص برا الشارع لابس بدله شفته من باب المحل القزاز رايح سيارته ، ومادري وش صار بقلبي من قوة الاعجاب، قلت ماشاء الله ، يارب اذا جاني شخص يخطبني يكون مثل هذا بهيبته و رزانته وشكله 🙂، كانت خاطره بقلبي حتى مانطقتها بلساني ونسيته نسيان تااااام.

بعد شهر ... جاني عريس.. عمره 40 ماسبق له الزواج و عطوني معلومات بسيطة عنه, وحسيت بكتمه و ضيقه و وافقت ع الشوفة عشان خاطر امي، ولمن شفته زاد الهم و الغم و تقلب وجهي و لاحسيت براحة، وكلمته عشان يمكن يتغير الوضع، و اقنعتني امي ان الوضع بيتغير بعد الملكة و الزواج، ولكن للاسف الوضع كل ماله يسوء، واجلس امثل الكلام الحلو و احاول اقتنع اني موافقه و انه عاجبني و فوقها كان يغلط علي و يحطمني و يسب شكلي ويضحك على طموحي و عملي رغم انه ممتاز ولله الحمد ، وبعدها يرجع يقول امزح وانتي حساسه 🙂🙂🙂، وبعدها وصلنا الى مفترق الطريق و انهينا اللي بيننا.

للامانه جاتني صدمة الانفصال بعدماتركنا بعض رغم انه اختياري، زيادة على شتمه لي بكلام ماينقال قبل يبلكني، وحسيت ان الدنيا تقفلت و يأست من نفسي ومن اني راح اقبل الزواج وامشي زي بنات خلق الله, والكل يقول لي مافي شيء اسمه راحه و الا اعجاب بالشوفه, والا انتي فيك شيء يمنعك من الزواج!!! وشكيت بنفسي لان فعلا ماارتحت لاحد و تجيني ضيقة الى درجة البكاء الشدييييد.

مكالمتي استمرت مع خطيبي السابق من قبل كورونا الى ماقبل شهرين، و بما ان الدوام صار اون لاين فما كنت اطلع كثير من البيت و صرت منعزلة و كئيبة، وقررت اطلع عشان تتعدل نفسيتي بعد اللي صار و رحت المكان اللي اخذ منه قهوتي دايم، وانا طالعه التقت عيني بعين شخص، وعلى طول رحت بطريقي ، وانا امشي احس باحد يمشي وراي😭😭, ركبت سيارتي و ناظرني من قدام السيارة كانه يسال ومارديت عليه ، وحركت سيارتي ورحت وانا بنص الطريق طالعت المرايه لقيته يتبعني، الين قربت من البيت ، وقفت. و وقف ينتظرني، قلت انت اللي كنت هناك, قال ايه انا سالتك اذا اقدر اكلمك و وافقتي 😳😳😳😳, عطيته من الكلام الصح و قلت انت ماعندك اهل و وو قال اسف جداً و صدقتي بكلامك و اعتذر منك لكن فكرتك وافقتي اكلمك😳.

راح و مرت الايام وانا طالعه من الحاره الا هذا يطلع من نفس المكان رغم انه مو ساكن فيها، و نزل نفس المقهى بس ماكلمني، ومرة ثانيه حاول بس رديته وشفته وهو يركب سيارته وتذكرته انه نفس الشخص اللي دعيت ان ربي يرزقني مثله.

انصدمت و تعوذت من الشيطان الرجيم و قلت انا ماني راعية هالخرابيط الله يرحم والديك اتركني بحالي، ومرت الايام و اروح مكان ثاني و الاقيه قدامي و ماكلمني برضو بس كان يحاول يطالع ، ومرة لقيته يجلس بنفس المطعم اللي انا فيه بس يناظر ما يتكلم.

الان لمن رجعت الدوامات رحت الصباح اخذ لي قهوة و اكمل طريقي ولقيته يوقف بنفس الوقت اللي وقفت فيه ودخل معاي وكان مبسوط و متفاجيء و نفس الشيء اليوم اللي بعده ، بعدها ماتحمل وجاني يكلمني لكن من اول كلمه تلعثم و ماقدر يقول شيء وراح، وجا بعد بومين و حاول قلت له وش فيك و و ، قال انا مادري ليش شفتك و من يومها وانا احاول اكلمك و والله لا اقصد اذيتك و لا اسيء لك!!!!!

لا شعورياً من الخوف نهرته و منعته و رفضت اكلمه رغم اني عمري ما ارتحت لانسان مثله، قال اسف و اعتذر على ازعاجك و قررت ما اروح هناك مره ثاني ونبهته لو التقي فيه بمكان راح اشتكيه و قدرت اطلع معلوماته كامله و لقيته بنفس عمري بس مادري اذا متزوج او لا، وانسان متعلم وموظف ومن قبيلة غير قبيلتي، طبعا نسيت اقول انه قالي لي اسمه وقبيلته بدون ما اساله .

وفعلاً ماتعرض لي بعدها و لاشفته و لا شافني ، لكن مايمر يوم ما افكر فيه و مايمر دقيقة ما احس اني ابكي واقول يارب وش هالموقف الغريب و هل هي دعوة و استجيبت و الا ابتلاء و اختبار وفتنه، طبعاً الى اليوم مادري وش كان بيقول و الا وش وده يقول و الا وش نيته ؟؟؟؟

اليوم شفته من بعيد وكان على عادته رزين و هادي اخذ له قهوه وراح في حاله 😥😥
لاهو بصباص و لا يطالع بالناس 😭😭😭

صرت ادعي له كل يوم لا شعورياً وادعي ربي يصبر قلبي اللي قاعد يتعذب

مادري مراهقه متاخره و الا وش

احسه الانسان اللي اتمناه رغم ان مايعلم النفوس الا الله لكن وش هالموقف الغريييييب و ندمانه ماخليته يسالني او يكلمني 😞 على الاقل اعرف وش يبغى بعدين احذفه على قولته.

انصحوني وش اسوي 😭 وهل هو لعاب زيه زي اي رجل و الا ممكن يكون صادق و وده يجي من الباب، لانه مايعرف مين انا و لا وش اسمي و لا عمري و لا حتى وجهي شافه !!!

المصدر: منتدى الحياة الزوجية | دليل النساء المتزوجات | الثقافة الزوجية والعائلية - من قسم: مشكلتي - مشاكل زوجية - معالجة المشاكل بين المتزوجين

Hrsl fhggi Hkih prdrm 😞

المصدر...